Tīmoté 1 3
3
Ko e Kau Taki Fakalotu
1OKU mo‘oni ‘a e lea–Ka feinga ‘e ha taha ke ma‘u ‘a e lakanga ‘o e faifekau pule, ko ‘ene holi ki ha ngāue lelei. 2Ko ia, ko hono tonu ‘o e faifekau pule ke ta‘emele, ko e husepāniti ‘o ha fefine pē taha,#3.2 ko e husepāniti… taha; pe ke mali tu‘otaha pē. ko e toko taha ‘oku faka‘ehi‘ehi mei he konā, ‘oku anga fakama‘uma‘u, ‘oku maau ‘ene tō‘onga, ‘oku fa‘a fakaafe ‘āunofo, ‘oku poto ‘i he faiako.#Tait 1.6-9 3Ko e toko taha ‘oku ‘ikai uaine‘ia; ko e toko taha ‘oku ‘ikai fa‘a tā, ka ‘oku anga kātaki; ‘oku ‘ikai fie fakakikihi, ‘oku ‘ikai ‘ofa ki he pa‘anga; 4Ko e toko taha ‘oku pule lelei ki hono fale ‘o‘ona, ‘oku mapule‘i ‘ene fānau ‘i he faka‘apa‘apa ai pē: 5(ka ‘o kapau ‘oku ‘ikai lava ‘e ha tangata ke pule ki hono fale ‘o‘ona, pea fēfē ha‘ane tauhi ‘a e Siasi ‘a e ‘Otua?) 6Ko e toko taha ‘oku ‘ikai ko e toki liliu; na‘a ‘ao‘aofia hono loto ‘i he ‘afungi, ‘o ne tō ai ki he tautea ‘o e Tēvolo. 7Kae‘uma‘ā ko hono tonu ke ne ongoongolelei mei he kakai ‘o tua‘ā, na‘a tō ia ki he laua, pea mo ha tauhele ‘a e Tēvolo.
Ko e Kau Tokoní
8Pehē foki ko hono tonu ‘o e kau akonaki ke nau anga māopo, ‘o ‘oua ‘e ngutungutuua, ‘oua ‘e nofo ke inu kava lahi, ‘oua ‘e havala ki he pa‘anga ‘uli: 9ko e kakai ‘oku nau tauhi ‘a e misiteli ‘o e lotu ‘i he konisēnisi ma‘a. 10Pea ‘oua ke sivi foki kinautolu; pea ka ‘ikai ha lau ki ai, pea nau toki fai ‘a e ngāue ‘a e akonaki. 11Pehē foki ko hono tonu ‘o e kau fefine#3.11 ‘o e kau (tokoni) fefiné; pe honau ngaahi uaifí. ke nau anga māopo, ‘o ‘oua ko e kau fakakovi; ko ha ni‘ihi ‘oku faka‘ehi‘ehi mei he konā, ‘o falala‘anga ‘i he me‘a kotoa pē. 12Ke ma‘u ‘e he kau akonaki ha uaifi pē taha,#3.12 Ke ma‘u… taha; pe Ke mali tu‘otaha pē. ‘o nau pule‘i lelei ‘enau fānau, mo honau fale ‘onautolu. 13He ko kinautolu ne nau lava lelei ‘a e ngāue ‘a e akonaki, ‘oku nau ma‘u ai ma‘anautolu ha tu‘unga lelei, mo e fu‘u loto mālohi he‘enau tui, ko e tui kia Kalaisi Sīsū.
Ko e Koloa Fufū ‘o ‘Etau Lotú
14Kuo u tohi atu ‘a e ngaahi me‘a ni, neongo ‘eku ‘amanaki ‘e vave ‘eku ‘alu atu. 15Koe‘uhi, ‘o kapau te u tuai atu, ke ke ‘ilo ‘a e anga ‘oku totonu ke fai‘aki ‘i he lotolotonga ‘o e Fale ‘o e ‘Otua, ‘a ia ko e Fakataha tonu ‘a e ‘Otua Mo‘ui, ko e pou mo e tu‘unga ‘o e Mo‘oni. 16‘Io, ko e mo‘oni ka ko ha mo‘oni, ko e me‘a taumama‘o ‘a e misiteli ‘o ‘ete lotu–
‘A ia Na‘e fakahā he kakano,
Na‘e fakatonuhia he laumālie,#3.16 Na‘e… laumālie; pe Na‘e fakatonuhia ‘e he Laumālié.
Na‘e mātā ‘e he kau ‘āngelo,
Na‘e malangaekina ki he Senitaile,
Na‘e tui ki ai ‘i māmani,
Na‘e ‘ohake ‘o ‘afio he lāngilangi.
Currently Selected:
Tīmoté 1 3: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
