KO 1 SĀMIUELA 22
22
Ko Hono Tāmate‘i ‘o e Kau taula‘eiki
1KO ia na‘e hiki ‘a Tēvita mei he potu ko ia, ‘o ne hola ki he ‘ana ‘o ‘Atulami: pea ‘i he fanongo ki ai hono kāinga, mo e fale kotoa ‘o ‘ene tamai, na‘a nau ‘alu hifo kiate ia ‘i ai.#Saame 57 (Title); Saame 142 (Title) 2Pea fakatefua kiate ia ‘a e tangata kotoa na‘e faingata‘a‘ia, mo ia kotoa pē na‘e mo‘ua, mo e tangata fua pē na‘e kona hono loto; pea ne hoko ko honau kapiteni: pea na‘e fe‘unga nai mo e toko fāngeau ‘a e kakai na‘e ‘iate ia.
3Pea ‘alu mei ai ‘a Tēvita ki Misipa-Moape, pea ne fakatau folofola ki he Tu‘i Moape, ‘o pehē, Tuku mu‘a ‘eku tamai mo ‘eku fa‘ē ke ha‘u ‘o nofo mo kimoutolu, kae‘oua ke u ‘ilo pe ko e hā ‘e fai ma‘aku ‘e he ‘Otua. 4Pea ne tuku kinaua ‘i he ‘ao ‘o e Tu‘i Moape: pea na nofo kiate ia lolotonga na‘e ‘i he talitau‘anga ‘a Tēvita.
5Pea lea ‘a e palōfita ko Kata kia Tēvita, ‘Oua te ke nofo ‘i he talitau‘anga; ‘alu, ‘o hū ki he fonua ‘o Siuta. Pea ‘alu ‘a Tēvita, ‘o hū ki he vao ‘o Hēleti.
6Pea fanongo ‘e Saula kuo ‘ilo ‘a Tēvita, mo e kau tangata na‘e ‘iate ia; pea ‘oku nofo ‘a Saula ‘i Kipea, ‘i he lolo tamalisi ‘i he sia, ‘oku ne puke pē hono tao, pea ko ‘ene kau tamaio‘eiki ‘oku nau takatu‘u ofi mai. 7Pea folofola ‘a Saula ki he‘ene kau tamaio‘eiki na‘e takatu‘u ofi mai, Fanongo mai, hako‘i Penisimani; ‘e foaki koā ‘e he foha ‘o Sese kiate kimoutolu kotoa pē hani ‘api mo hani ngoue vaine? te ne fakanofo kimoutolu kotoa ko e kapiteni toko‘i afe, pe ke kapiteni. 8‘A ē ā kuo mou kautaha ai ke puleaki‘i au, pea ‘ikai ha taha ‘e fanafana mai kuo fai talite hoku foha mo e foha ‘o Sese, pea ‘oku ‘ikai hamou toko taha ‘oku mamahi koe‘uhi ko au, pe te ne tala mai kuo ue‘i ‘e hoku foha ‘a ‘eku tamaio‘eiki ke toka malumu kiate au, hangē ko ia ‘oku fai ni?
9Pea tali ‘e Toeki ko e motu‘a ‘Ītomi, ‘a ia na‘e tu‘u fakataha#22.9 na‘e… fakataha; pe Na‘e pule ki he kau tamaio‘eikí. mo e kau tamaio‘eiki ‘a Saula, ‘o ne pehē, Na‘a ku mamata ki he foha ‘o Sese, ‘ene ha‘u ki Nopi, kia ‘Ahimeleki, foha ‘o ‘Ahitupi.#1 Sām 21.7-9; Saame 52.1 (he ‘Ulu‘i Himí) 10Pea ne huhū ki he ‘Eiki ma‘ana, pea ne ‘ange hano ‘oho, ‘o ne tuku kiate ia ‘a e heletā ‘a Kolaiate Filisitia.
11Pea fekau ‘e he tu‘i ke ui mai ‘a ‘Ahimeleki foha ‘o ‘Ahitupi ko e taula‘eiki, mo e fale kotoa ‘o ‘ene ‘eiki, ko e kau taula‘eiki na‘e ‘i Nopi: pea nau omi kotoa pē ki he tu‘i. 12Pea me‘a ‘a Saula, Fanongo mai ā, ‘a e foha ‘o ‘Ahitupi. Pea ne tali, ‘Ēī, ko au eni.
13Pea me‘a ki ai ‘a Saula, Ko e hā kuo mou fakakautaha ai ke tu‘u kiate au, ‘a koe mo e foha ‘o Sese, ho‘o foaki me‘akai kiate ia, mo ha heletā, pea kuo ke huhū ki he ‘Otua ma‘ana, ke ne tu‘u ‘o toka malumu kiate au, hangē ko ia ‘oku fai ni?
14Pea tali ‘e ‘Ahimeleki ki he tu‘i, ‘o pehē, He ko hai ‘i ho‘o kau tamaio‘eiki ‘oku fai tōnunga hangē ko Tēvita, ko e foha mali foki ‘o e ‘Afiona, pea ‘oku ne kau ‘i ho‘o fakataha tokoni,#22.14 ‘okú ne kau ‘i ho‘o fakataha tokoní; Ko hono liliu ‘i he ngaahi hiki fuoloa ‘e ni‘ihi: ko e ‘eikitau ia ‘o ho kau ka‘até, ka ko hono faka-Hepeluú ko e na‘á ne afe ki ho‘o kau ka‘até. pea ‘oku ne mā‘olunga ‘i ho fale? 15Ko ‘eku toki huhū koā ia ki he ‘Otua ma‘ana? Molekemama‘o ‘a e ‘iate au ha loto pehē;#22.15 Ko ‘eku toki huhū… ha loto pehē; pe Pea ko eni, ko ‘eku faihala koā he ‘ahó ni ‘a ‘eku huhū ki he ‘Otuá koe‘uhí ko iá? Molekemama‘o! pe ‘Io, na‘á ku huhū ki he ‘Otuá koe‘uhí ko ia, pea na‘e ‘ikai ko ‘eku toki fai pehē. ke ‘oua na‘a tuku ‘e he ‘afiona ha me‘a ki ho‘o tamaio‘eiki ko au, pe ki he fale kotoa ‘o ‘eku tamai: he ‘oku ‘ikai ‘ilo ‘e ho‘o tamaio‘eiki ko au ha me‘a si‘i pe lahi ‘i he ngaahi me‘a ni kotoa.
16Pea folofola ‘a e tu‘i, Kuo pau te ke mate, ‘Ahimeleki; ‘a koe, mo e fale kotoa ‘o ho‘o tamai. 17Pea fekau ‘e he tu‘i ki he ka‘ate na‘e tu‘u ofi mai, Mou tu‘u takai, ‘o tāmate‘i ‘a e kau taula‘eiki ‘a Sihova; he kuo nau fepukenima‘aki foki mo Tēvita, pea koe‘uhi na‘a nau ‘ilo ‘ene hola kae ‘ikai te nau momo‘i tala kiate au. Ka na‘e ‘ikai loto ‘a e kau tamaio‘eiki ‘a e tu‘i ke ala ki he kau taula‘eiki ‘a Sihova ke tāmate‘i. 18Pea me‘a ‘a e tu‘i kia Toeki, Tu‘u takai koe, ‘o ‘ohofi ‘a e kau taula‘eiki. Pea tafoki ‘a e ‘Ītomi ko Toeki, pea ‘ohofi ‘e he taha ko ia ‘a e kau taula‘eiki, ‘o ne tāmate‘i ‘i he ‘aho ko ia ha toko valungofulu mā nima na‘e ‘ai ‘a e ‘ēfoti tupenu. 19Pea ko Nopi, ko e kolo ‘o e kau taula‘eiki, na‘a ne taa‘i ‘aki ‘a e mata ‘o e heletā; ‘io, na‘a ne have‘i ‘a e tangata mo e fefine, ‘a e tamaiki mo e kei huhu, pea mo e pulu mo e ‘asi mo e sipi.
20Ka ka moulu atu ha taha ‘o e ngaahi foha ‘o ‘Ahimeleki, foha ‘o ‘Ahitupi, ko e toko taha na‘e hingoa ko ‘Āpaiata, ‘o ne hola hifo kia Tēvita. 21Pea fakahā ‘e ‘Āpaiata kia Tēvita kuo fakapoongi ‘e Saula ‘a e kau taula‘eiki ‘a Sihova. 22Pea pehē ‘e Tēvita kia ‘Āpaiata, Na‘a ku ‘ilo pē ‘i he ‘aho ko ē, ‘i he ‘i ai ‘a e ‘Ītomi ko Toeki, kuo pau te ne tala kia Saula: kuo mole ‘iate au#22.22 kuo mole ‘iate au [‘a ia ko e pehē, ko e kovi ‘a‘ana] ‘a e mo‘ui kotoa ‘a e fale ‘o ho‘o ‘eikí. Ko hono liliu ia ‘i he ngaahi hiki fuoloa ‘e ni‘ihi. Ko hono faka-Hepeluú ‘oku ‘ikai ke mahino: Kuó u afe au koe‘uhí ko e mole ‘a e mo‘ui kotoa ‘a e fale ‘o ho‘o ‘eiki. ‘a e mo‘ui kotoa ‘a e fale ‘o ho‘o ‘eiki. 23Nofo koe kiate au: ‘oua te ke manavahē; he ko ia ‘oku ne kumi ‘eku mo‘ui ‘a ia ‘oku ne kumi ho‘o mo‘ui: pea ‘e matauhi koe ‘iate au.
Currently Selected:
KO 1 SĀMIUELA 22: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
