KO 1 SĀMIUELA 21
21
Ko e Hola ‘a Tēvita meia Saula
1PEA a‘u ‘a Tēvita ki Nopi, kia ‘Ahimeleki ko e taula‘eiki; pea tete ‘a ‘Ahimeleki ‘i he‘ene ‘alu ke fe‘iloaki mo Tēvita, ‘o ne pehē ki ai, Ko e hā ‘oku ke toko taha ai, ‘o ‘ikai ha‘u mo e ni‘ihi?#Māt 12.3-4; Ma‘ake 2.25-26; Luk 6.3
2Pea tali ‘e Tēvita kia ‘Ahimeleki ko e taula‘eiki, Ko e fekau au ‘e he tu‘i ‘i ha me‘a, ‘o folofola mai, Ke ‘oua na‘a momo‘i ‘ilo ‘e ha taha ‘a e me‘a kuo u fekau ai koe, mo e me‘a kuo u tu‘utu‘uni atu; pea kuo u tala ‘a e kau tama ki he potu ko Me‘a. 3Pea ko eni, ko e hā ‘oku ke ma‘u? Tuku mai ni ha fo‘i mā ‘e nima, pe ha me‘a pē ‘oku ke ma‘u.
4Pea tali ‘a e taula‘eiki kia Tēvita, ‘Oku ‘ikai ha mā noa ‘i heni, ka ‘oku ai ha mā tapu; ‘o kapau kuo faka‘ehi‘ehi ‘a e kau tama–kehe mei he fefine.
5Pea tali ‘e Tēvita ki he taula‘eiki, Seuke, kuo ‘aho tolu mo e ta‘ofi ‘a e kau fefine meiate kimautolu; ‘i he‘eku hū mai na‘e ma‘a ‘a e teunga ‘a e kau tama, pea neongo ko e fononga noa kae huanoa ‘a e ma‘a honau teunga he ‘aho ni.#21.5 ‘Oku fihi ‘aupito ‘a e veesi ni.
6Ko ia, na‘e ‘ange ki ai ‘e he taula‘eiki ‘a e me‘a tapu: he na‘e ‘ikai ha toe mā ‘i ai, ngata pē ‘i he mā fono, ‘a ia kuo hiki mei he ‘ao ‘o Sihova, kae ‘ai ha mā māfana ke fetongi ‘aki leva.#Lev 24.5-9
7Pea na‘e ‘i ai ‘i he ‘aho ko ia ha toko taha ‘i he kau tamaio‘eiki ‘a Saula, kuo tāpuni ‘i he ‘ao ‘o Sihova, ko hono hingoa ko Toeki ko e motu‘a ‘Ītomi, ko e to‘a ‘o e kau tauhi manu ‘a Saula.
8Pea pehē ‘e Tēvita kia ‘Ahimeleki, Pea ‘oku ‘ikai koā te ke ma‘u heni ha tao pe ha heletā? He na‘e ‘ikai foki te u ha‘u mo au ha‘aku heletā pe mahafu, he ko e me‘a ‘a e tu‘i na‘e fakavave?
9Pea tali ‘a e taula‘eiki, Ko e heletā pē ‘a Kolaiate ko e Filisitia na‘a ke taa‘i ‘i he lautoka ko ‘Ela, ko eni ia kuo kofukofu ‘aki ha tupenu ‘i he tu‘a ‘ēfoti: kapau te ke fie ma‘u ia, pea ke to‘o: he ‘oku ‘ikai mo ha taha heni.#1 Sām 17.51 Pea pehē ‘e Tēvita, Ko e tama ia: tuku mai.
10Pea tu‘u ‘a Tēvita, ‘o ne hola ‘i he ‘aho ko ia mei he ‘ao ‘o Saula, ‘o ne a‘u kia ‘Ākisi ko e Tu‘i Kati. 11Pea fakatau folofola ‘e he kau tamaio‘eiki ‘a ‘Ākisi ki he‘ene ‘afio, ‘Ikai ko Tēvita eni ko e tu‘i ‘o e fonua? ‘Ikai ko eni ia na‘a nau hiva fetāliaki ai ‘i he‘enau me‘e, ‘a e tā ‘e Saula ‘ene toko‘i afe, Mo e ngaahi mano ‘a Tēvita ē!#1 Sām 18.7; 29.5
12Pea kumuni ‘e Tēvita ‘a e ngaahi lea ko ia ‘i hono loto, ‘o ne manavahē lahi telia ‘a ‘Ākisi ko e Tu‘i Kati,#Saame 56.1 (Title) 13pea ne liliu hono anga ‘i honau ‘ao, pea ‘i he‘enau puke ia na‘a ne tō‘onga kehe, ‘o ne kohikohi ki he tāpuni ‘o e matanikolo,#21.13 matanikolo; pe palasi. pea ne tuku ke tafe hifo hono fāvai ki hono kava.#Saame 34.1 (Title) 14Pea me‘a ‘a ‘Ākisi ki he‘ene kau tamaio‘eiki, ‘Ā, ‘oku mou vakai ‘oku sesele ‘a e tangata: pea ko ho‘omou ‘omi ia kiate au koe‘uma‘ā? 15He ‘oku ou masiva sesele, kuo mou ‘omi ai ‘a e siana ni ke fai ‘ene sesele kiate au? ‘E ‘ikai hū ‘a e siana ni ki hoku fale.
Currently Selected:
KO 1 SĀMIUELA 21: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
