KO 1 SĀMIUELA 23
23
Ko Hono Fakahaofi ‘e Tēvita ‘a e Kolo ko Ki‘ila
1PEA na‘e fakahā kia Tēvita, ‘o pehē, Tokua ‘oku tau‘i ‘a Kī‘ila ‘e he kau Filisitia, ‘o nau pāpani foki mei he ngaahi haha‘anga. 2Pea huhū ‘e Tēvita ki he ‘Eiki, ‘o pehē, Ka u ‘alu, ‘o taa‘i ‘a e kau Filisitia ni? Pea folofola ‘a e ‘Eiki kia Tēvita, ‘alu, ‘o taa‘i ‘a e kau Filisitia, ‘o fakahaofi ‘a Kī‘ila.
3Pea lea kia Tēvita ‘ene kau tangata; Vakai, ‘oku. tau nofo manavahē eni ‘i Siuta, kae huanoa ‘oka tau ka ‘alu ki Kī‘ila, ke fai mo e ngaahi matatau Filisitia. 4Ko ia na‘e toe huhū ‘e Tēvita ki he ‘eiki. Pea tali ‘e he ‘Afio, ‘o pehē, Tu‘u, ‘alu hifo ki Kī‘ila, he te u tuku ‘a e kau Filisitia ki ho nima. 5Pea ‘alu ‘a Tēvita mo ‘ene kau tangata ki Kī‘ila, ‘o nau tau‘i ‘a e kau Filisitia, ‘o nau ‘ave ‘enau monumanu, ‘o nau taa‘i kinautolu ‘aki ha tā lahi. Ko ia na‘e fakahaofi ‘e Tēvita ‘a e nofo Kī‘ila.
6Pea ko eni, ‘i he hola ‘a ‘Āpaiata foha ‘o ‘Ahimeleki ki Kī‘ila, na‘a ne hifo ki ai ‘oku ne to‘o ha ‘ēfoti.
7Pea na‘e fakahā kia Saula, kuo hū ‘a Tēvita ki Kī‘ila. Pea pehē ‘e Saula, Kuo li‘aki ia ‘e he ‘Otua, ‘o tuku ki hoku nima; he kuo tāpuni ia he‘ene hū ki ha kolo ‘oku matapā mo fakama‘u. 8Ko ia, na‘e fanongonongo ‘e Saula ke ha‘u ‘a e kakai kotoa pē ki he tau, ke ‘alu hifo ki Kī‘ila ke kapui ‘a Tēvita mo hono kakai.
9Pea na‘e ‘ilo ‘e Tēvita ‘oku teu ‘e Saula ha kovi kiate ia; pea ne pehē kia ‘Āpaiata ko e taula‘eiki, ‘unuaki mai ‘a e ‘ēfoti. 10Pea pehē ‘e Tēvita. ‘E Sihova, ‘Otua ‘o ‘Isileli, kuo fanongo pau ‘e ho‘o tamaio‘eiki ko au ‘oku feinga ‘a Saula ke ha‘u ki Kī‘ila, ke faka‘auha ‘a e kolo koe‘uhi ko au. 11‘E tukuange au koā ‘e he hou‘eiki ‘o Kī‘ila ki hono nima? ‘E ‘alu hifo koā ‘a Saula, ‘o hangē ko e fanongo ‘a ho‘o tamaio‘eiki ko au? ‘E Sihova, ‘Otua ‘o ‘Isileli, ‘oku ou kole ke ke fakahā ki ho‘o tamaio‘eiki. Pea folofola ‘a e ‘Eiki, Te ne ‘alu hifo.
12Pea toki pehē ‘e Tēvita, Pea ‘e tukuange ‘e he hou‘eiki ‘o Kī‘ila ‘a au mo hoku kakai ki he nima ‘o Saula? Pea folofola mai ‘a e ‘Eiki, Te nau tukuange pē.
13Pea tutuku ‘a Tēvita mo ‘ene kau tangata, ‘a ia na‘e fe‘unga nai mo e toko onongeau, ‘o nau hū kitu‘a mei Kī‘ila, ‘o nau hola fano pē. Pea na‘e fakahā kia Saula, kuo moulu ‘a Tēvita mei Kī‘ila; ‘o ne tuku ‘ene ‘alu atu.
14Pea nofo ‘a Tēvita ‘i he toafa, ‘i he ngaahi toitoi‘anga, ‘o ne ‘i he mo‘unga ‘i he Toafa ‘o Sifi. Pea kumi kiate ia ‘e Saula ‘i he ‘aho kotoa pē, ka na‘e ‘ikai tuku ia ki hono nima ‘e he ‘Otua. 15Pea vakai ‘e Tēvita kuo hū kitu‘a ‘a Saula ke kumi ki he‘ene mo‘ui: pea na‘e ‘i he Toafa ‘o Sifi ‘a Tēvita ‘i he potu vao.
16Pea tu‘u ‘a Sonatane foha ‘o Saula, ‘o ne ‘alu kia Tēvita ki he vao, ‘o ne poupou hono nima ‘i he ‘Otua. 17Pea ne pehē kiate ia, ‘Oua te ke manavahē, he ‘e ‘ikai ma‘u koe ‘e he nima ‘o Saula ko ‘eku tamai; pea te ke Tu‘i ‘Isileli koe, ka u palēmia au; pea na‘a mo ‘eku tamai ko Saula ‘oku ne ‘ilo ia. 18Pea na fai talite kinaua ‘i he ‘ao ‘o e ‘Eiki: pea nofo ‘a Tēvita ‘i he vao, ka ka ‘alu ‘a Sonatane ki hono ‘api.#1 Sām 18.3
19Pea ‘alu hake ‘a e kau Sifi kia Saula ki Kipea, ‘o nau pehē, ‘Ikai ‘oku toi ‘a Tēvita ‘i homau feitu‘u ‘i he ngaahi toitoi‘anga ‘i he vao ‘i he mā‘olunga ki Hākila, ‘a ia ‘oku ‘i he potu tonga ‘o e lala?#Saame 54 (Title) 20Ko ia ka me‘a hifo ‘a e ‘afiona, ‘o hangē ko e holi ‘a ho finangalo; pea ‘e ‘amautolu ke tukuange ia ki he nima ‘o e ‘afiona.
21Pea tali ‘e Saula, ke monū‘ia kimoutolu mei he ‘Eiki, he kuo mou faka‘atu‘i au. 22‘Alu mu‘a; toe fakapapau, ‘o ‘ilo mo vakai ‘a e potu ‘oku ‘i ai hono va‘e: ko hai kuo ne mamata kiate ia ‘i ai; he ‘oku tala mai, ‘oku ne fai fakaoloolo ‘aupito. 23Ko ia mou vakai, ‘o ‘ilo ‘a e ngaahi toitoi‘anga ‘oku ne toi ai, pea mou foki mai mo e ‘ilo pau, ka u ‘alu mo kimoutolu; pea ka mahino ‘oku ne ‘i he fonua, te u ha‘ao ia ‘i he ngaahi toko afe ‘o Siuta.
24Pea nau tutu‘u, pea nau mu‘omu‘a ‘ia Saula ki Sifi: ka ko Tēvita mo ‘ene kau tangata na‘a nau ‘i he Toafa ‘o Maoni, ‘i he ‘Alapā, ‘i he potu tonga ‘o e lala. 25Pea ‘alu ‘a Saula mo hono kakai ke kumi. Pea na‘e fakahā kia Tēvita: ko ia na‘a ne ‘alu hifo ki he makatu‘u ko ē, ‘o nofo‘i he Toafa ‘o Maoni. Pea ‘i he fanongo ‘e Saula, na‘a ne tuli kia Tēvita ki he Toafa ‘o Maoni. 26Pea ‘alu ‘a Saula ‘i he potu ko ē ‘o e mo‘unga, ka ko Tēvita mo ‘ene kau tangata ‘i he potu ko ē: pea hoha‘a ‘a Tēvita ke ‘alu telia ‘a Saula; he ‘oku kapui ‘a Tēvita mo hono kakai ‘e Saula mo hono kakai ‘o‘ona, ke puke kinautolu. 27Mo e ha‘u ha talafekau kia Saula ke fakahā, Vave mai, he ‘oku pāpani ‘a e kau Filisitia ‘i he fonua. 28Ko ia na‘e foki ‘e Saula mei he‘ene tuli kia Tēvita, ‘o ne ‘alu ke fepaki mo e kau Filisitia: ‘a ē ā na‘e ui ai ‘a e feitu‘u ko ia ko Selahamaleko (ko Makatu‘u momole). 29Pea ‘alu hake ‘a Tēvita mei ai, ‘o ne nofo‘i he ngaahi toitoi‘anga ‘o ‘Eniketi.
Currently Selected:
KO 1 SĀMIUELA 23: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
