KO 1 SĀMIUELA 19
19
Ko Hono Fakatanga‘i ‘o Tēvita ‘e Saula
1PEA lea ‘a Saula ki hono foha ko Sonatane, pea ki he‘ene kau tamaio‘eiki, ki he tāmate‘i#19.1 ki he tāmate‘i; pe ke nau tāmate‘i. ‘o Tēvita. 2Ka ko Sonatane foha ‘o Saula na‘a ne manako lahi kia Tēvita. Pea tala ‘e Sonatane kia Tēvita, ‘Oku feinga ‘a ‘eku ‘eiki ko Saula ke tāmate‘i koe: ko ia, ke ke tokanga mu‘a kia koe ‘apongipongi, pea nofo ‘i ha potu lilo, ‘o toi: 3pea te u ‘alu atu au ‘o tu‘u mo e tangata‘eiki ‘i he vao ‘oku ke ‘i ai, pea te u talanoa mo e tangata‘eiki ‘iate koe; pea u vakai pe kuo fēfē, pea te u tala kiate koe.
4Pea lea ‘a Sonatane ki he‘ene ‘eiki ko Saula ki he mālō ‘a Tēvita, ‘o ne fakatau folofola ki ai, ‘o pehē, Ke ‘oua na‘a fai angahala ‘a e ‘Afiona ki ho‘o sevāniti ko Tēvita; he tala‘ehai kuo ne hia ki he ‘Afiona, pea kuo lelei ‘aupito ‘ene ngāue ma‘au: 5he na‘a ne ‘alu mo ‘ene mo‘ui ‘o ne taa‘i ‘a e Filisitia, pea feia ‘e Sihova ha fakamo‘ui lahi ma‘a ‘Isileli kātoa: na‘a ke mamata ki ai, pea ke fiefia: pea ko e hā te ke angahala ai ki he ta‘ehalaia, ke tāmate‘i ‘a Tēvita ta‘ehano ‘uhinga?
6Pea fakaongo ‘e Saula ki he lea ‘a Sonatane: pea fuakava ‘a Saula, Tangi ‘a e mo‘ui ‘a e ‘Eiki ‘e ‘ikai tāmate‘i ia. 7Pea ui ‘e Sonatane ‘a Tēvita, ‘o ne fakahā ki ai ‘a e ngaahi lea ko ia. Pea ‘omi ‘e Sonatane ‘a Tēvita kia Saula, pea ne taka ‘i hono ‘ao, ‘o hangē ko e taimi mu‘a.
8Pea na‘e toe fai ‘a e tau; pea hū kitu‘a ‘a Tēvita, ‘o tau mo e kau Filisitia, ‘o taa‘i kinautolu–ko e tā ka ko ha ta!–pea nau hola mei hono ‘ao.
9Pea hā‘ele kia Saula ha laumālie kovi meia Sihova, ka ‘oku nofo ia ‘i hono fale, ‘o to‘o hono tao; pea tā ha‘ape ‘a Tēvita. 10Pea feinga ‘a Saula ke veloi fakau‘u ‘a Tēvita ki he holisi; ka ka kalo pē ia mei he ‘ao ‘o Saula, pea tau ‘a e tao ‘i he holisi: pea hola ‘a Tēvita, ‘o ne hiki ‘i he pō ko ia.
11Pea kouna ‘e Saula ha kau talafekau ki he fale ‘o Tēvita ke lama ia, pea ke tāmate‘i ia ‘apongipongi: pea fakahā kia Tēvita ‘e Maikale ko hono uaifi, ‘o pehē, Kapau ‘e ‘ikai te ke kalofaki ho‘o mo‘ui he pō ni, ‘e tāmate‘i koe ‘apongipongi.#Saame 59 (Title) 12Ko ia na‘e tuku hifo ‘e Maikale ‘a Tēvita ‘i he kātupa: pea ne ‘alu, ‘o hola, ‘o hao. 13Pea to‘o ‘e Maikale ‘a e telāfimi, ‘o ne tuku ki he mohenga, mo ha ‘ufi‘ufi fulufulu‘i kosi ‘i hono ‘ulu, ‘o ne kafu ‘aki ha pulupulu. 14Pea ‘i he fekau mai ‘e Saula ha ni‘ihi ke puke Tēvita, na‘e pehē ‘e he fefine, ‘Oku mahaki. 15Pea fekau atu ‘e Saula ha ni‘ihi ke fakasio kia Tēvita, ‘o ne me‘a, ‘Ohake kiate au ‘i he mohenga, ka u tāmate‘i ia. 16Pea ‘i he hū mai ‘a e kau talafekau, tā ko e telāfimi ‘i he mohenga, mo e me‘a fulufulu‘i kosi ‘i hono ‘ulu. 17Pea folofola ‘a Saula kia Maikale, Ko e hā kuo ke kākaa‘i pehe‘i ai au, ‘o tuku ange hoku fili, pea kuo ne hao? Pea tali ‘e Maikale kia Saula, Na‘a ne pehē mai, Tuku ange au; koe‘uma‘ā ‘eku tāmate‘i koe?
18Pea ko eni, ne hola ‘a Tēvita, ‘o hao, ‘o ne a‘u kia Sāmiuela ki Lama, ‘o ne tala ki ai ‘a e me‘a kotoa kuo fai ‘e Saula kiate ia. Pea ‘alu ‘e ia mo Sāmiuela, ‘o na nonofo ‘i he Ako. 19Pea na‘e fakahā kia Saula, ‘o pehē; Vakai, ko Tēvita ‘oku ‘i he Ako ‘i Lama. 20Pea fekau atu ‘e Saula ha ni‘ihi ke puke ‘a Tēvita: pea ‘i he‘enau mamata#19.20 ‘i he‘enau mamata: ‘Oku pehē hono liliu ‘i he ngaahi hiki fuoloa ‘e ni‘ihi, ka ko hono faka-Hepeluú: ‘i he‘ene mamata. ki he fakataha‘i palōfita ‘oku nau palofisai, mo e tu‘u ‘a Sāmiuela ‘o angi, na‘e hā‘ele ‘a e Laumālie ‘o ‘Elohimi ki he kau talafekau ‘a Saula, ‘o nau palofisai mo kinautolu. 21Pea ‘i hono fakahā kia Saula, na‘a ne tuku atu hani talafekau kehe, pea nau palofisai mo kinautolu. Pea ne tuku atu mo ha ni‘ihi hono tu‘o tolu, pea nau palofisai mo kinautolu. 22Pea toki ‘alu ‘e ia foki ki Lama, ‘o ne a‘u ki he fu‘u lepa ‘oku ‘i Seku; pea ne fehu‘i ‘o pehē, ‘oku ‘i fē ‘a Sāmiuela mo Tēvita? Pea tali ‘e ha taha, Tokua ‘oku na ‘i he Ako ‘i Lama. 23Pea ne ‘alu ki ai, ki he Ako ‘i Lama: pea hā‘ele ‘a e Laumālie ‘o e ‘Otua kiate ia foki, pea ne ‘alu atu ai pē mo fai palofisai, ‘o a‘u ki he Ako ‘i Lama. 24Pea hu‘ihu‘i mo ia foki hono kofu, pea palofisai mo ia foki ‘i he ‘ao ‘o Sāmiuela, ‘o ne tō teketekefili ‘i he ‘aho kotoa ko ia mo e pō, ‘a ē ā ‘oku nau pehē ai, ‘Oku ‘i he kau palōfita koā ‘a Saula foki?#1 Sām 10.11-12
Currently Selected:
KO 1 SĀMIUELA 19: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
