KO 1 SĀMIUELA 18
18
1PEA ‘i he ‘osi leva ‘ene fakatau folofola kia Saula, pea pīkitai ‘a e loto ‘o Sonatane ki he loto ‘o Tēvita, pea ‘ofa ‘a Sonatane kiate ia ‘o hangē ko ‘ene mo‘ui ‘a‘ana. 2Pea puke ‘e Saula ‘a Tēvita ‘i he ‘aho ko ia, ‘o ‘ikai te ne tuku ke foki ki he ‘api ‘o ‘ene tamai. 3Pea hanga ‘a Sonatane ‘o fai fuakava mo Tēvita, koe‘uhi na‘a ne ‘ofa kiate ia ‘o hangē ko ‘ene mo‘ui ‘a‘ana. 4Pea hu‘ihu‘i ‘e Sonatane ‘a e kofu tōtōlofa kuo ne ‘ai, ‘o ne ‘ange kia Tēvita, pea mo hono ngaahi kofu tau, ‘io, mo ‘ene heletā, mo ‘ene kaufana, mo hono no‘o. 5Pea ‘alu atu ‘a Tēvita ki he tau: pea ‘i he me‘a kotoa na‘e fekau ai ia ‘e Saula, na‘a ne fai fakapotopoto: pea fokotu‘u ia ‘e Saula ke pule ki ha kau tau, pea na‘e lelei‘ia ai ‘a e kakai kotoa, kae‘uma‘ā ‘a e kau tamaio‘eiki ‘a Saula.
Ko e Kamata Lotokovi ‘a Sauila kia Tēvita
6Pea ‘i he faifai pea nau omi ki ‘api ‘i he foki ‘a Tēvita mei he taa‘i ‘o e Filisitia, na‘e hū kitu‘a ‘a e kau fefine mei he ngaahi kolo ‘o ‘Isileli, ke hiva mo me‘e ‘i he tali ‘o Kingi Saula, ‘o nau to‘o ‘a e ngaahi nafa fāngongo mo e simika, mo e ngaahi tapatolu. 7Pea fetāliaki ‘e he kau fefine ‘i he‘enau ngaahi lakalaka, ‘o nau pehē,
‘A e tā ‘e Saula ‘ene toko‘i afe,
Mo e ngaahi mano ‘a Tēvita ē.#1 Sām 21.11; 29.5
8Pea tuputāmaki lahi ai ‘a Saula, pea na‘e tau kovi ‘a e me‘a ko ia; pea ne pehē, Kuo nau tuku kia Tēvita ha toko‘i mano, kae toko afe pē kiate au: pea ko e hā mo e pule‘anga ‘oku toe ke ne ma‘u. 9Pea talu ai mo e siosiofi ‘e Saula ‘a Tēvita.
10Pea pongipongi hake na‘e ‘ohofia ‘a Saula ‘e he laumālie kovi mei he ‘Otua, pea ne valelau ‘i loto fale: pea tā ha‘ape ‘a Tēvita ‘o hangē ko ‘ene fa‘a fai: pea ‘oku to‘o ‘e Saula hono tao. 11Pea fakapoi ‘e Saula hono tao; he‘ene pehē, Te u hoka‘i fakau‘u ‘a Tēvita ki he holisi. Ka ka kalo tu‘o ua ‘a Tēvita, ‘o hola ki tu‘a.
12Pea manavahē ‘a Saula ke fe‘ao mo Tēvita, koe‘uhi na‘e kau ‘a e ‘Eiki mo ia, ka kuo ne hiki meia Saula. 13Ko ia na‘e hiki ia ‘e Saula ki ha tu‘unga te ne mama‘o ai mo ia, ‘o ne fokotu‘u ia ke pule ki he toko afe ‘o ‘ene tau: pea na‘a ne hū kitu‘a mo hū mai ‘i he ‘ao ‘o e kakai. 14Pea ka ai ha fononga na‘a ne fai, na‘a ne lava me‘a ai; pea na‘e ‘iate ia ‘a e ‘Eiki. 15Pea ‘i he vakai ‘e Saula ‘oku ne fai me‘a lava ‘aupito, na‘a ne teteki ki ai. 16Ka ko ‘Isileli kātoa mo Siuta na‘a nau ‘ofa kia Tēvita; he ko ia ia na‘a ne hū kitu‘a mo hū mai ‘i honau ‘ao.
Ko e Mali ‘a Tēvita mo e ‘Ōfefine ‘o Saula
17Pea me‘a ‘a Saula kia Tēvita, Ko eni ‘a hoku ‘ōfefine lahi, ‘a Mēlape, te u ‘atu ia kia koe ke mo nonofo: kehe pē ke ke fakafitefita‘a ma‘aku, he fai ‘a e ngaahi tau ‘a Sihova. He ne pehē ‘e Saula, Ke ‘oua na‘a ala hoku nima ki ai, ka ko e nima ‘o e kau Filisitia.
18Pea tali ‘a Tēvita kia Saula, Ko hai au, mo hai hoku fāmili ‘i ‘Isileli, ke foha ‘aki au ‘e he ‘Afiona? 19Ka ‘i he faifai pea hoko ‘a e taimi ke tuku ‘a Mēlape ko e ‘ōfefine ‘o Saula kia Tēvita, na‘e ‘ange ia ke nonofo mo ‘Ātalieli ‘a e matāpule Mēhola.
20Pea ‘ofa kia Tēvita ‘a e ‘ōfefine ‘o Saula ko Maikale, pea nau fakahā kia Saula, pea na‘e hā lelei ‘a e me‘a kiate ia. 21Pea pehē ‘e Saula, Te u ‘ange ‘a e fefine kiate ia mōno tauhele‘i, kae ‘iate ia ‘a e nima ‘o e kau Filisitia. Ko ia na‘e me‘a ‘a Saula kia Tēvita, Te ke hoko he ‘aho ni ko hoku foha ko hono tu‘o ua. 22Pea fekau ‘e Saula ‘ene kau tamaio‘eiki, Mou alea fufū mo Tēvita, ‘o pehē; Vakai, ‘oku manako ‘a e tu‘i kiate koe, pea ‘oku ‘ofa kiate koe ‘e he‘ene kau tamaio‘eiki kotoa: ko ia ke ke hoko ko hono foha mali.
23Pea fanafana pehē ‘a e kau tamaio‘eiki ‘a Saula kia Tēvita. Pea tali ‘e Tēvita, He ‘oku mou pehē ko e me‘a ma‘ama‘a ke te hoko ko e foha ‘o e tu‘i; ‘osi, ko e masiva au mo ta‘etokanga‘i?
24Pea fakahā ki he ‘afio ‘e he kau tamaio‘eiki ‘a Saula, he‘enau pehē, Ko e ngaahi lea e ‘a Tēvita. 25Pea lea ‘a Saula, Ko eni ho‘omou lea kia Tēvita, ‘Oku ‘ikai manako ‘e he tu‘i ki ha koloa, ka ko e teau‘i kili‘i ‘ao ‘o e kau Filisitia, ke fai ‘a e sauni ‘o e ngaahi fili ‘o e tu‘i. Ka ko e puleaki ‘a Saula ke tō ‘a Tēvita ‘i he tā ‘a e kau Filisitia. 26Pea ‘i he fakahā kia Tēvita ‘e he kau tamaio‘eiki ‘a ‘ene ‘Afio ‘a e lea ko ia, pea na‘e lelei ‘a e me‘a kia Tēvita ke ne hoko ko e foha ‘o e tu‘i. 27Pea ‘i he te‘eki kakato ‘a e taimi, na‘e tu‘u ‘a Tēvita ‘o ‘alu, ‘e ia mo ‘ene kau tangata, pea ne taa‘i ha tu‘unga tangata Filisitia ‘e toko uangeau; pea ‘omi ‘e Tēvita honau kili‘i ‘ao, ‘o fakakakato ki he tu‘i, ke ne hoko ko hono foha mali. Pea ‘ange ‘e Saula kiate ia hano ‘ōfefine ko Maikale ke na nonofo.
28Pea vakai ‘e Saula ‘o ‘ilo ‘oku kau ‘a e ‘Eiki mo Tēvita; mo e ‘ofa kiate ia ‘a Maikale ko hono ‘ōfefine: 29pea na‘e fakautuutu ai ‘a e manavahē ‘a Saula kia Tēvita; pea ko e fili ia ‘o Tēvita ma‘u ai pē.
30Pea hū kitu‘a ‘a e ngaahi ‘ulu ‘o e kau Filisitia: pea ka ‘iloange na‘a nau hū ki tu‘a, pea lava me‘a ‘a Tēvita ‘o lahi ange ‘i he kau tamaio‘eiki kotoa pē ‘a Saula; ko ia na‘e ma‘ongo‘onga hono hingoa.
Currently Selected:
KO 1 SĀMIUELA 18: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
