KO 1 SĀMIUELA 17
17
Ko e Pole‘i ‘e Kolaiate ‘a e Kakai ‘Isilelí
1PEA tānaki mai ‘e he kau Filisitia ‘enau ngaahi kongakau ki he tau, ‘o nau fakataha ki Soko, ‘a ia ‘oku kau ki Siuta, ‘o nau ‘apitanga ai ‘i he vaha‘a ‘o Soko mo ‘Āseka, ‘i he potu ko ‘Efesitami. 2Pea ko Saula mo e kau tangata ‘Isileli na‘a nau fakataha, ‘o ‘apitanga ‘i he fu‘u lautoka ko ‘Ela, pea nau fakatē ‘a e tau ke tali ‘a e kau Filisitia. 3Pea na‘e tu‘u ‘a e kau Filisitia ‘i he mo‘unga mei hē, pea tu‘u ‘a e kau ‘Isileli ‘i he mo‘unga mei hē: pea na‘e ai ha tele‘a ‘i hona vaha‘a.
4Pea ‘alu honau kai melie mei he ‘apitanga Filisitia, ko Kolaiate hono hingoa, ko e tangata mei Kati, ko hono mā‘olunga ko e kiupite ‘e ono mo e hanga ‘e taha.#17.4 kiupite ‘e ono mo e hanga ‘e taha; ‘a ia ‘oku fe‘unga ia mo e meimei mita ‘e tolu, ka ko hono fua he tohi ‘e taha ‘i he hiki fuoloa ‘e taha ‘oku ‘i he mita ‘e uá. 5Pea na‘e tatā palasa hono ‘ulu, pea ko hono kofu tau na‘e ‘uno ukamea; pea ko e mamafa ‘o e kofu tau ko e sikeli palasa ‘e nima afe. 6Pea ne talausese palasa, pea tāupe ‘i tu‘a ha tao si‘i palasa. 7Pea ko e ‘esia ‘o hono tao lahi na‘e hangē ko e ‘akau ‘a e tangata lalanga; pea ko hono mata ko e sikeli ‘aione ‘e onongeau; pea na‘e mu‘omu‘a ‘iate ia ‘a e tama na‘e fua hono pā. 8Pea ne tu‘u ‘o ui ki he ngaahi matatau ‘o ‘Isileli, ‘o ne pehē kiate kinautolu, Ko ho‘omou ō mai ‘o fakatē tau koe‘uma‘aki? ‘Ikai ko e Filisitia au, ka ko kimoutolu ko e kau hopoate ‘a Saula? Fili hamou tangata ke ‘alu hifo kiate au. 9Kapau te ne lava ke tau‘i au, ‘o taa‘i, pea te mau tamaio‘eiki kiate kimoutolu: ka ‘o kapau te u lava‘i ia, ‘o taa‘i, pea te mou tamaio‘eiki kiate kimautolu, ‘o tauhi kimautolu. 10Pea toe ‘ai atu ‘e he Filisitia, Ko au eni ‘oku ou luki ki he ngaahi matatau ‘o ‘Isileli he ‘aho ni; tuku mai ha tangata ke ma fetakai. 11Pea ‘i he fanongo ‘e Saula mo e kau ‘Isileli ki he lea ko ia ‘a e Filisitia, na‘e tō honau manava, ‘o nau ilifia lahi.
Ko Tēvita he ‘Apitanga Tau ‘o Saulá
12Pea ko eni, ko Tēvita ko e foha ia ‘o e motu‘a ‘Efalata ko ē mei Pētelihema-Siuta na‘e hingoa ko Sese; pea na‘e toko valu ‘ene fānau tangata, pea ‘i he taimi ‘o Saula na‘e motu‘a ‘a e matāpule, ‘o lau ki he vaivai.#17.12 na‘e motu‘a ‘a e matāpule, ‘o lau ki he vaivai; Ko hono liliu ia ‘i he ngaahi hiki fuoloa ‘e ni‘ihi. ‘Oku ‘ikai ke mahino ‘a hono faka-Hepeluú. 13Ka kuo ‘alu ‘a e toko tolu kimu‘a ‘i he ngaahi foha ‘o Sese, ‘o muimui kia Saula ki he tau; pea ko e hingoa ‘o e fānau ‘e toko tolu na‘e ‘alu ki he tau ko ‘Eliapi ko e ‘uluaki, pea hoko ‘a ‘Apinatape, pea ko hono tolu ‘a Sama. 14Pea ko Tēvita ko e si‘i ia, pea ko e tolu lalahi kuo nau muimui kia Saula. 15Pea ko Tēvita na‘e fe‘alu‘aki meia Saula ke tauhi ‘a e sipi ‘a ‘ene ‘eiki ‘i Pētelihema.
16Pea ‘unu‘unu mai ‘a e Filisitia pongipongi mo efiafi, ‘o ne fakapaupau‘u mai ‘o ‘aho fāngofulu.
17Pea pehē ‘e Sese ki hono foha ko Tēvita, To‘o mu‘a ma‘a ho ngaahi ta‘okete ha efa ‘o e koane tunu ko eni, mo e fo‘i mā ‘e hongofulu ni, ‘o vave ‘aki ki he ‘apitanga kiate kinautolu; 18pea ‘ange ‘a e hongofulu‘i siisi ko eni ki he pule ‘o honau toko afe, pea vakai pe kuo fēfē ho ngaahi ta‘okete, pea ma‘u ha‘anau pōpoaki. 19Pea ko Saula, mo kinautolu, mo e kau ‘Isileli kotoa, ‘oku nau ‘i he lautoka ‘o ‘Ela he fai tau mo e kau Filisitia.
20Pea tu‘u hengihengi hake ‘a Tēvita, ‘o ne tuku ‘a e fanga sipi ki ha tauhi, ‘o ne to‘o ‘a e ngaahi me‘a, ‘o ‘alu, ‘o hangē ko e tu‘utu‘uni ‘a Sese; ‘o ne a‘u ki he ‘ā sāliote, ‘oku hū ki tu‘a ‘a e tau ke fakatē, ‘o fai ‘enau kaila tau. 21Pea fakatē ‘a ‘Isileli mo e kau Filisitia ke fehangahangai ‘a e matatau mo e matatau. 22Pea tuku ‘e Tēvita ‘ene nāunau ki he nima ‘o e tauhi ‘o e nāunau, ‘o ne lele ki he matatau, ‘o ne a‘u ki hono ngaahi tokoua, ‘o fetapa ki ai. 23Pea lolotonga ‘ene talanoa mo kinautolu, ‘iloange na‘e ‘alu hake ‘a e kai melie, ko Kolaiate Filisitia, tokua mei Kati: na‘a ne tu‘u mai mei he matatau Filisitia, ‘o ne lau ‘o hangē tofu pē ko ‘ene ngaahi lau ko ē; pea fanongo ki ai ‘a Tēvita. 24Pea ko e kau ‘Isileli kātoa ‘i he‘enau mamata ki he tangata, na‘a nau hola mei hono ‘ao kuo nau ilifia ‘aupito. 25Pea lea ange ‘e ha tangata ‘Isileli, Ne mou sio koā ki he tangata ko eni ‘oku ‘alu hake? ‘Ē, ko ‘ene ‘alu hake ke luki ki ‘Isileli: pea ka ‘iloange ‘e ‘i ai ha tangata te ne taa‘i ia, pea ‘e fakakoloa ia ‘e he tu‘i ‘aki ha koloa lahi, pea te ne ‘ange ki ai hono ‘ōfefine, pea te ne faka‘atā ‘a e fale ‘o ‘ene tamai mei he fatongia faka-‘Isileli.#17.25 fatongia faka-‘Isileli; pe fatongiá [tukuhau] mo e ngāue fakatamaio‘eiki ki aí.
26Pea lea ‘a Tēvita ki he kau tangata ‘oku nau tutu‘u, ‘o pehē, Ko e hā koā ‘e fai ki he tangata te ne taa‘i ‘a e Filisitia ko ena, ‘o ‘ave ‘a e mā‘anga ‘o ‘Isileli? he ko hai ‘a e Filisitia, ‘a e motu‘a ta‘ekamu na, ke ne luki ki he ngaahi matatau ‘o e ‘Otua Mo‘ui? 27Pea tali ki ai ‘a e kakai ‘o tatau mo e ‘anenai, ‘o nau pehē, Ko e me‘a ia ‘e fai ki he tangata te ne taa‘i ia.
28Pea fanongo ‘e hono ta‘okete ko ‘Eliapi ki he‘ene lea ki he kau tangata, pea na‘a e puke ‘ene ‘ita kia Tēvita, pea ne pehē, Ko e hā kuo ke hifo pehē ai pea ko hai kuo ke tuku ki ai ‘a e me‘i fanga sipi ‘i he toafa? ‘Oku ou ‘ilo pē ho‘o fielahi, mo e kovi ‘o ho loto; tala atu, ko ho‘o fie mamata pē ki he tau kuo ke hifo mei ai.
29Pea tali ‘e Tēvita, Ko e hā tū kuo u fai ‘ikai ko ha‘aku lea pē? 30Pea ne sītu‘a ki ai ‘o ne hanga ki ha taha kehe, ‘o ne lea ‘o hangē ko ‘ene lea ‘anenai: pea na‘e tali ‘e he kakai, ‘o hangē ko ‘enau ‘uluaki tali.
31Pea ‘i he‘enau fanongo ki he ngaahi lea na‘e fai ‘e Tēvita, na‘a nau ‘a‘au ‘i he ‘ao ‘o Saula; pea ne fekau ke ne ha‘u. 32Pea fakatau folofola ‘a Tēvita kia Saula, Ke ‘oua na‘a vaivai ha loto ‘o ha taha koe‘uhi koe siana ko ē; ko ho‘o tamaio‘eiki ko au ‘e ‘alu ‘o tau mo e motu‘a Filisitia.
33Pea me‘a ‘a Saula kia Tēvita, ‘E ‘ikai te ke lava ke ‘alu ki he Filisitia ni ke tau mo ia: he ko e talavou koe, ka ko e tangata tau ia talu ‘ene talavou.
34Pea tali ‘e Tēvita kia Saula, Ko e tauhi ‘a ho‘o tamaio‘eiki ko au ma‘a ‘eku tamai ‘o e fanga sipi; pea ha‘u ha laione, mo ha pea, ‘o ‘ave ha lami mei he tākanga; 35pea u hū kitu‘a, ‘o muimui ki ai, ‘o u tuli ki ai, ‘o u taa‘i ia, ‘o u hamusi mei hono ngutu: pea ne tu‘u kia au, ka u puke hono kava, ‘o taa‘i ia, ‘o tāmate‘i. 36Na‘e taa‘i ‘e ho‘o tamaio‘eiki ko au ‘a e laione mo e pea fakatou‘osi; pea ko e motu‘a Filisitia ta‘ekamu ni, te ne tatau mo ha taha ‘iate kinaua, he kuo ne luki ki he ngaahi matatau ‘o e ‘Otua Mo‘ui. 37Pea fai atu ‘e Tēvita ‘ene fakatau folofola, Ko Sihova na‘a ne hamusi au mei he pesipesi ‘o e laione mo e pesipesi ‘o e pea, ko ia ia te ne hamusi au mei he nima ‘o e Filisitia ko eni. Pea pehē ‘e Saula kia Tēvita, ‘Alu, pea ke ‘iate koe ‘a e ‘Eiki.
38Pea ‘ai ‘e Saula kia Tēvita ‘a hono kofu ‘o‘ona, ‘o ne ‘ai ha tatā palasa ki hono ‘ulu, ‘o ne tui ha kofu tau. 39Pea no‘o ‘e Tēvita ‘ene heletā ki hono tu‘a kofu, pea koloto ke ne lava ke hā‘ele; he kuo te‘eki ke ne maheni ai. Pea fakatau folofola ‘a Tēvita kia Saula, ‘E ‘ikai te u lava ke ‘alu mo ha me‘a pehē; he kuo te‘eki ke u maheni ai. Pea hu‘ihu‘i ai ‘e Tēvita. 40Pea ne to‘o hono tokotoko, ‘o ne fili ha‘ane fo‘i kilikili molemole ‘e nima mei he tele‘a, ‘o ne ‘ai ki he ‘angame‘a ‘a kau tauhi na‘e ‘iate ia, ki he kato loto; pea kuo ne to‘o mai ‘ene makatā: pea ne ‘unu‘unu ki he Filisitia.
Ko Hono Ikuna‘i ‘o Kolaiate ‘e Tēvita
41Pea hā‘ele ‘a e Filisitia, ‘o faka‘au mai ke ofi kia Tēvita; pea mu‘omu‘a ‘a e tangata na‘e fua ‘ene fu‘u pā. 42Pea tokanga mai ‘a e Filisitia, ‘o ne sio kia Tēvita, ‘o ne fakasīkaka‘i ia: he ko e talavou pē, pea pahapaha, kae‘uma‘ā na‘e faka‘ofo‘ofa hono mata. 43Pea pehē ‘a e Filisitia kia Tēvita, He ko e kulī au, ‘oku ke ha‘u ai kiate au mo e ‘ū tokotoko na? ‘o ne kape kia Tēvita, ‘o lau ki hono ‘Otua. 44Pea toki pehē ‘e he Filisitia kia Tēvita, Ha‘u ā kiate au, ka u ‘atu ho kakano ki he manupuna ‘o e ‘atā, mo e manu ‘o e vao.
45Pea lea ‘a Tēvita ki he Filisitia, ‘Oku ke ha‘u koe kiate au mo e heletā, mo e ongo tao: ka ko au ‘oku ou ‘alu kiate koe ‘i he huafa ‘o Sihova Sāpaoti, ko e ‘Otua ‘o e ngaahi matatau ‘o ‘Isileli, ‘a ia kuo ke luki ki ai. 46Ko e ‘aho ni ‘e tuku koe ‘e Sihova ki hoku nima; pea te u taa‘i koe, ‘o tu‘usi ho ‘ulu meiate koe; pea te u tuku ‘a e ‘anga‘anga ‘o e tau Filisitia he ‘aho ni ki he manupuna ‘o e ‘atā, pea ki he manu fekai ‘o e fonua; koe‘uhi ke ‘ilo ‘e māmani kātoa ‘oku ai ha ‘Otua ‘o ‘Isileli: 47pea ke ‘ilo ‘a e fu‘u fakataha ni ‘oku ‘ikai fai ‘e he ‘Eiki ‘ene fakamo‘ui ‘aki ‘a e heletā mo e tao: he ‘oku ‘a Sihova ‘a e tau, pea te ne tuku kimoutolu ki homau nima.
48Pea ‘i he ‘iloange na‘e tu‘u mai ‘a e Filisitia, ‘o laka mai ke ofi, ke fepaki mo Tēvita, pea fakavave ‘e Tēvita, ‘o ne lele ki he matatau ke fakafepaki ki he Filisitia. 49Pea ‘ai ‘e Tēvita hono nima ki he ‘angame‘a, ‘o ne to‘o mei ai ha maka, ‘o ne makataa‘i, ‘o lave ‘i he la‘e ‘o e Filisitia; pea ngalo ‘a e maka ‘i hono la‘e, ‘o ne tō fo‘ohifo ki he kelekele. 50Pea ko eni kuo lava‘i ‘e Tēvita ‘a e Filisitia ‘aki ha makatā mo ha fo‘i maka, pea ne taa‘i ‘a e Filisitia ‘o tāmate‘i foki; ka na‘e ‘ikai ha heletā ‘i he nima ‘o Tēvita.#2 Sām 21.19 51Ko ia na‘e lele ‘a Tēvita, ‘o tu‘u ‘i he Filisitia, ‘o ne ala ki he‘ene heletā ‘a‘ana, ‘o ne unuhi mei hono ‘ai‘anga, ‘o ne tāmate‘i ia ‘o ne tu‘usi ‘aki hono ‘ulu.#1 Sām 21.9 Pea ‘i he vakai ‘e he kau Filisitia kuo mate honau to‘a, pea nau hola.
52Pea tutu‘u ‘a e kau tangata ‘Isileli mo Siuta, ‘o nau hiki tuē, ‘o nau tuli ki he kau Filisitia, ‘o fakapehē ki Kati#17.52 ki Kati: Ko hono liliu ia ‘i he hiki fuoloa ‘e taha, ka ‘oku pehē he faka-Hepeluú: ki he tele‘a. mo e ngaahi matanikolo ‘o ‘Ekiloni. Pea na‘e tō ‘a e kafo ‘o e kau Filisitia ‘i he hala ‘o Sa‘alaimi, ‘o a‘u ki Kati mo ‘Ekiloni. 53Pea foki ‘a ha‘a ‘Isileli kuo nau tele tauta‘a ‘i he tuli ki he kau Filisitia, pea nau vete honau ‘apitanga. 54Pea to‘o ‘e Tēvita ‘a e ‘ulu ‘o e Filisitia, ‘o ne ‘omi ki Selusalema; ka na‘a ne tuku ‘ene mahafu ki hono tēniti.
Ko Hono Fakafe‘iloaki ‘o Tēvita kia Saula
55Pea ‘i he mamata ‘e Saula ki he ‘alu ‘a Tēvita ke fepaki mo e Filisitia, na‘a ne pehē kia ‘Āpina ko e kapiteni ‘o ‘ene tau, Ko e foha ‘o hai ‘a e tama na, ‘Āpina? Pea tali ‘e ‘Āpina, Tangi ‘a e mo‘ui ‘a e ‘Afio, ‘oku ‘ikai te u lave‘i.
56Pea me‘a ‘a e tu‘i, ‘Eke koe pe ko e foha ‘o hai ‘a e tamasi‘i na.
57Pea ‘i he foki ‘a Tēvita mei he taa‘i ‘o e Filisitia, na‘e puke ia ‘e ‘Āpina, ‘o ‘ave ki he ‘ao ‘o Saula ‘oku ne to‘o ‘a e ‘ulu ‘o e Filisitia. 58Pea me‘a kiate ia ‘e Saula, Ko e foha ‘o hai koe, tama? Pea tali ‘e Tēvita, ko e ‘uhiki au ‘o ho‘o tamaio‘eiki ko Sese, ko e motu‘a Pētelihema.
Currently Selected:
KO 1 SĀMIUELA 17: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
