KO 1 TU‘I 9
9
Ko e Toe Hā Mai ‘a e ‘Otuá kia Solomone
(2 Kal 7.11-22)
1PEA ‘i he faka‘osi ‘e Solomone ‘a e langa ‘o e fale ‘o Sihova, mo e fale ‘o e tu‘i, mo e holi fua pē ‘a Solomone na‘e ne tokanga ke fai, 2pea na‘e toki hā ‘a e ‘Eiki kia Solomone ko hono tu‘o ua, ‘o hangē ko ‘ene hā kiate ia ‘i Kipione.#1 Tu‘i 3.5; 2 Kal 1.7 3Pea folofola ‘a Sihova kiate ia, Kuo u ongo‘i ‘a e lotu mo e hū kuo ke fai kiate au: kuo u tapui ‘a e fale na kuo ke langa, ke ‘ai ki ai hoku hingoa ‘o ta‘engata: pea ‘e ‘i ai hoku mata mo hoku loto ma‘u ai pē. 4Pea ko e me‘a kiate koe, kapau te ke taka ‘i hoku ‘ao, ‘o hangē ko e taka ‘a ho‘o tamai ko Tēvita ‘i he loto haohaoa mo e faitotonu, ke fai hono kotoa ‘o e me‘a kuo u tu‘utu‘uni atu, ‘o tauhi ‘eku ngaahi fekau mo konisitūtone; 5te u toki fakapapau ho taloni mo ho‘o pule ki ‘Isileli ‘o ta‘engata, ‘o hangē ko ‘eku tala‘ofa kia Tēvita ko ho‘o tamai, ‘o pehē, ‘E ‘ikai hala hao tangata ke nofo ki he taloni ‘o ‘Isileli.#1 Tu‘i 2.4 6Ka ‘o kapau te mou mātu‘aki tafoki mei he muimui kiate au, ‘a kimoutolu pe ko ho‘omou fānau, ‘o ‘oua ‘e tauhi ‘eku ngaahi fekau, ‘a e ngaahi tu‘utu‘uni kuo u tuku ‘i homou ‘ao; ka mou ‘alu ‘o tauhi ‘otua kehe, ‘o lotu ki ai, 7pea te u toki tu‘usi ‘a ‘Isileli mei he funga ‘o e kelekele kuo u foaki kiate kinautolu; pea ko e fale ni, ‘a ia kuo u tapui ‘i hoku hingoa, te u li‘aki mei hoku ‘ao; pea ‘e hoko ‘a ‘Isileli ko e me‘a ke fakatokotokanaki ‘aki mo luma‘i ‘e he ngaahi kakai kotoa. 8Pea ko e fale ni ‘e mā‘olunga mo‘oni;#9.8 mā‘olunga mo‘oni; Ko hono faka-Hepeluú ia, ka ‘oku pehē he ngaahi hiki fuoloa ‘e ni‘ihi: tuva maka. ‘ilonga ha taha ‘e ‘alu ai te ne ofo, mo faka‘ise‘isa; pea te ne pehē, Ko e hā kuo fai pehē ai ‘a Sihova ki he fonua ni mo e fale ni?#2 Tu‘i 25.9; 2 Kal 36.19 9Pea te nau tali, Koe‘uhi ā na‘a nau li‘aki ‘a Sihova ko honau ‘Otua, ‘a ia na‘a ne ‘omi ‘enau ngaahi kui mei ‘Isipite, pea nau piki ki he ngaahi ‘otua kehe, ‘o lotu ki ai, mo tauhi ia: ko hono ō ia kuo ‘omi ai ‘e Sihova ‘a e ngaahi fu‘u kovi ni kiate kinautolu.
Ko e Aleapau ‘a Solomone mo Hailame
(2 Kal 8.1-2)
10Pea ‘i he ‘osi ‘a e uofulu‘i ta‘u ‘a ia na‘e langa ai ‘e Solomone ‘a e ongo fale, ‘a e fale ‘o Sihova mo e fale ‘o e tu‘i 11(Pea ko Hailame ko e Tu‘i Taia kuo ne tokonaki ma‘a Solomone ‘a e ‘akau sita, mo e paini, mo e koula–ha me‘a pē na‘a ne tangi ki ai), na‘e toki ‘ange ‘e Kingi Solomone kia Hailame ha uofulu‘i kolo ‘i he feitu‘u ko Kāleli. 12Pea hā‘ele atu ‘a Hailame mei Taia ke vakai ‘a e ngaahi kolo kuo ‘ange kiate ia ‘e Solomone; pea na‘e ‘ikai te ne sia‘a‘ia ai. 13Pea ne pehē, Ko e hā, ‘alā, ‘a e ngaahi kolo ko eni kuo ke ‘omi kiate au! Pea ne fakahingoa kinautolu ko e fonua ‘o Kāpuli,#9.13 Kāpuli; ‘Oku vāofi ‘a hono pu‘aki ‘o e hingoá ni mo e faka-Hepelū ‘o e ta‘e‘aonga. pea talu ai pē. 14Pea kuo ‘atu ‘e Hailame ki he tu‘i ha taleniti koula ‘e teau mā uofulu.
Ko ha ngaahi Tou‘anga Kehe ‘a Solomone
(2 Kal 8.3-18)
15Pea ko hono ‘uhinga ‘eni ‘o e tu‘utu‘uni ngāue na‘e fai ‘e Kingi Solomone; koe‘uhiā ke langa ‘a e fale ‘o Sihova, mo hono fale ‘o‘ona, mo Milo, mo e ‘ā ‘o Selusalema, mo Hasoa, mo Mekito, mo Kēseli. 16Kuo ‘alu hake ‘a Felo ko e Tu‘i ‘Isipite, pea kuo ne hamu ‘a Kēseli, mo fakamomofi: pea kuo ne tāmate‘i ‘a e kau Kēnani na‘e nofo ‘i he kolo, pea ne ‘ange ke ‘ave ‘aki hono ‘ōfefine ke nonofo mo Solomone. 17Pea langa ‘e Solomone ‘a Kēseli, mo Pete-holoni-lalo, 18mo Pealati, pea mo Tatimoa ‘i he fonua mamate, ‘i he feitu‘u– 19pea mo e ngaahi kolo feleoko na‘e ma‘u ‘e Solomone, mo e ngaahi kolo sāliote, mo e ngaahi kolo tau hoosi; kae‘uma‘ā ‘a e mamana ‘a Solomone, ‘a ia na‘a ne langa ko ‘ene manako pē ‘i Selusalema, mo Lepanoni, mo e potu kehekehe ‘o hono pule‘anga. 20Ko e me‘a ki he toenga kakai ‘Āmoli, Heti, Pēlisi, Hevi, pea mo e Siepusi; (‘a ia na‘e ‘ikai te nau kau ki ha‘a ‘Isileli); 21ko ‘enau fānau na‘e toe ‘i he fonua, ‘a kinautolu na‘e ‘ikai lava ‘e ha‘a ‘Isileli ke faka‘auha, na‘e fai ‘e Solomone ha tu‘utu‘uni ngāue fakahopoate kiate kinautolu, ‘a ia ‘oku kei fai ni.
22Ka na‘e ‘ikai ngaohi ‘e Solomone ha ni‘ihi ‘o ha‘a ‘Isileli ke hopoate: ka ko kinautolu ko e kau pāte‘i tau, mo ‘ene kau tamaio‘eiki, mo ‘ene hou‘eiki, mo ‘ene ngaahi kapiteni, mo e angi ‘o ‘ene tau sāliote mo e tau hoosi.
23Ko eni ‘a e kau ‘ōfisa lalahi na‘e angi ‘i he ngāue ‘a Solomone, ko e toko nimangeau mā nimangofulu, ‘a ia na‘a nau pule ki he kakai na‘e fai ‘a e ngāue.
24Ka ka hā‘ele hake ‘a e ‘ōfefine ‘o Felo mei Kolo-‘o-Tēvita ki he fale na‘e langa mo‘ona, pea ne toki langa ‘a Milo.
25Pea na‘e tu‘o tolu ‘i he ta‘u ‘a e feia ‘e Solomone ‘a e ngaahi feilaulau-mōifua mo ‘ofa ‘i he ‘ōlita kuo ne ngaohi mo‘o Sihova, ‘io, he‘ene tutu#9.25 Ko hono hiki kakato he faka-Hepeluú: tutu ‘inisēnisi, pea ‘oku toe ‘i ai mo e ongo fo‘i lea ‘e ua kehe he faka-Hepeluú ‘a ia ‘oku ‘ikai ke mahino hono ‘uhingá. ia ‘i he ‘ōlita na‘e ‘i he ‘ao ‘o Sihova. Ko ia ne faka‘osi ‘a e fale.#‘Eki 23.17; 34.23; Teu 16.16 26Pea na‘e fa‘u ‘e Kingi Solomone ha folau ‘i ‘Esioni-kepa, ‘a ia ‘oku ofi ki ‘Eliati, ‘i he matātahi Kulokula, ‘i he fonua ko ‘Ītomi. 27Pea tuku mai ‘e Hailame ‘ene kau tamaio‘eiki ke ‘alu ‘i he folau, ko e kau toutai na‘e poto ‘i tahi, ke ō mo e kau tamaio‘eiki ‘a Solomone. 28Pea nau a‘u ki ‘Ōfela, ‘o nau ‘omi koula mei ai, ko e taleniti ‘e fāngeau mā uofulu, ‘o nau uta mai kia Kingi Solomone.
Currently Selected:
KO 1 TU‘I 9: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
