KO 1 TU‘I 5
5
Ko e Teu Langa ‘e Solomone ‘a e Temipalé
(2 Kal 2.1-18)
1PEA fekau atu ‘e Hailame ko e Tu‘i Taia ha‘ane kau tamaio‘eiki kia Solomone; he na‘a ne fanongo kuo nau fakanofo ia ke tu‘i ko e fetongi ‘o ‘ene tamai: he na‘e ‘ofa ai pē ‘a Hailame kia Tēvita. 2Pea ‘alu ‘a e fekau ‘a Solomone kia Hailame ke fakahā, 3‘Oku ke mea‘i ‘a Tēvita ko ‘eku tamai, na‘e ‘ikai te ne lava ke langa ha fale ki he huafa ‘o Sihova ko hono ‘Otua, koe‘uhi ko e ngaahi tau na‘a ne ‘ākilotoa ai, kae‘oua ke tuku kinautolu ‘e Sihova ki hono lalo va‘e. 4Ka ko eni kuo fakanonga au ‘e Sihova ko hoku ‘Otua mei he potu kotoa pē; ‘oku ‘ikai ha fili, pea ‘oku ‘ikai ha kovi ‘oku tō mai. 5Pea vakai ‘oku ou pehē ke langa ha fale ki he huafa ‘o Sihova ko hoku ‘Otua, ‘o hangē ko e folofola ‘a Sihova kia Tēvita ko ‘eku tamai, he‘ene pehē, Ko ho foha ‘a ia te u tuku ke fetongi koe ‘i ho taloni, te ne langa ‘e ia ‘a e fale ki hoku hingoa.#2 Sām 7.12-13; 1 Kal 17.11-12 6Pea ko eni ke ke fekau ke nau tā sita mai mei Lepanoni: pea ko ‘eku kau tamaio‘eiki te nau kau mo ho‘o kau tamaio‘eiki, pea te u ‘atu kiate koe ma‘a ho‘o kau tamaio‘eiki, ha me‘a pē te ke tu‘utu‘uni mai: he kuo ke mea‘i ‘oku ‘ikai hamau toko taha ‘oku poto ‘i he fai ta‘anga hangē ko e kau Saitoni.
7Pea ‘i he fanongo leva ‘e Hailame ki he ngaahi lea ‘a Solomone, na‘a ne fiefia ‘aupito, ‘o ne pehē, Mālō mo Sihova he ‘aho ni ‘ene tuku kia Tēvita ha foha poto ke pule ki he fu‘u kakai ni. 8Pea ‘alu ‘a e fekau ‘a Hailame kia Solomone ke fakahā, ‘o pehē, Kuo u ma‘u ‘a e fekau na‘a ke fai mai: ko au eni te u fakaai ho‘o holi kotoa ki he sita mo e paini.#5.8 paini; pe saipālesi, ‘o pehē ai pē ka tu‘u ‘a e kupu‘i lea ko e paini. 9‘E ‘ohifo ia ‘e he‘eku kau tamaio‘eiki mei Lepanoni ki tahi, pea ko au te u fa‘u vakavaka‘āmei, ‘o ‘ave ‘i tahi ki he potu te ke tu‘utu‘uni mai, pea te u fekau ke veteki ai, kae ‘a‘au hono fetuku: pea ko koe te ke fakaai ‘eku holi ‘a‘aku, ke ‘omi me‘akai ki hoku fale.
10Ko ia na‘e foaki ‘e Hailame#5.10 Hailame; pe Hailome. kia Solomone ‘a e ngaahi sita mo e ngaahi paini ke ‘osi hono loto. 11Pea foaki ‘e Solomone kia Hailame ‘a e efa uite ‘e ua kilu mo‘o me‘akai ‘a hono fale, mo e pate lolo tuki ‘e uangeau:#5.11 uangeau; Ko hono faka-Hepeluú ia (ko e lita ia ‘e 4,000), ka ‘oku pehē he ngaahi hiki fuoloa ‘e ni‘ihi: ua mano (ko e lita ia ‘e 400,000 (pea vakai kia 2 Kal 2.10). na‘e pehē ‘a e ‘atu ‘e Solomone ‘i he ta‘u kotoa pē.
12Pea foaki ‘e Sihova kia Solomone ‘a e poto, ‘o hangē ko ‘ene tala‘ofa ki ai: pea na‘e lelei ‘a e vaha‘a ‘o Hailame mo Solomone, pea na‘a na fai ‘ena talite.
13Pea fai ‘e Kingi Solomone ha tu‘utu‘uni ngāue ki ‘Isileli kātoa; pea ko e tokolahi ‘o e kau ngāue ko e toko tolu mano. 14Pea ne fekau kinautolu ki Lepanoni ke fai fakalakanga, ‘o toko taha mano ki he māhina: na‘a nau māhina ‘e taha ‘i Lepanoni, pea māhina ‘e ua ‘i ‘api; pea ko ‘Ātonilami na‘a ne pule ki he fatongia ko ia.#1 Tu‘i 12.18 15Pea na‘e ma‘u ‘e Solomone ha toko fitu mano na‘e fua kavenga, mo e toko valu mano na‘e fai ta‘anga ‘i he mo‘unga; 16tukukehe ‘a e hou‘eiki ‘a Solomone na‘e pule ki he ngāue, ko e toko tolu afe mā toko tolungeau, ‘a ia na‘a nau angi ki he kakai na‘a nau fai ‘a e ngāue. 17Pea fai tu‘utu‘uni ‘e he tu‘i, pea nau tā maka lalahi ko e maka mahu‘inga ke tu‘unga ‘aki ‘a e fale, ‘a e ngaahi maka tapafā. 18Pea ko e kau tufunga ‘a Solomone mo e kau tufunga ‘a Hailame, ‘io, ‘a e kau Kīpeli, na‘a nau tā ia, pea nau teu ‘a e ngaahi ‘akau mo e ngaahi maka ki he langa fale.
Currently Selected:
KO 1 TU‘I 5: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
