KO 1 TU‘I 6
6
Ko Hono Langa ‘e Solomone ‘a e Temipalé
1PEA ‘i he hoko hono fāngeau mā valungofulu ta‘u hili ‘a e hū kitu‘a ‘a ha‘a ‘Isileli mei ‘Isipite, na‘e hanga ‘a Solomone ‘o langa ‘a e fale ‘o Sihova, ‘i hono fā ta‘u ‘o ‘ene pule ‘a‘ana ki ‘Isileli, ‘i he māhina ko Sivi, ‘a ia ko hono ua ‘o e māhina. 2Pea ko e fale na‘e langa ‘e Kingi Solomone mo‘o Sihova ko hono lōloa ko e kiupite ‘e onongofulu, pea uofulu hono māukupu, pea tolungofulu kiupite hono mā‘olunga. 3Pea ko e fale-hū‘anga ‘i he mata fale tapu na‘e uofulu kiupite hono lōloa, ‘a ia ko e māukupu ‘o e fale; na‘e ‘ai ke hongofulu hono māukupu, ‘o a‘u ki he mata fale. 4Pea ne ngaohi ‘i he fale ha ngaahi tupa vangavanga ta‘eto‘o.#6.4 vangavanga ta‘eto‘o; ‘Oku fihi, he ko e lea fakatufunga ‘o ono‘aho. ‘Oku hiki ‘e he ni‘ihi: fāsi‘i ki tu‘a, fālahi ki loto. 5Pea ne langa ke falala ki he holisi ‘o e fale ha ngaahi fata takatakai ki he holisi ‘o e fale, ki he Fale Tapu pea ki he Folofola‘anga, ‘io, na‘a ne ngaohi ‘a e ngaahi fata takatakai. 6Ko e fata lalo na‘e nima ‘a e fua kiupite ‘o hono māukupu, pea ko e fata loto na‘e ono ‘a e fua kiupite ‘o hono māukupu, pea fitu hono tolu ‘o e fata: pea ne ‘ai ke fakaholoholo ‘a e matolu ‘o e holisi ‘o e fale ke tala ‘a tu‘a takatakai, ke ‘oua na‘a hū ‘a e ngaahi toka ki he holisi ‘o e fale.
7Pea ko e fale ‘i hono langa na‘e ngaohi ‘aki ‘a e ngaahi maka na‘e ‘osi hono teu ‘i he ta‘anga maka, pea na‘e ‘ikai patō ha hāmala, pe ha toki, pe ha momo‘i nāunau ukamea, ‘i he fale ‘i hono langa.
8Ko e matapā ki he fata lotoloto#6.8 fata lotoloto; Ko hono faka-Hepeluú ia, ka ‘oku pehē he ngaahi hiki fuoloa ‘e ni‘ihi: fata lalo. na‘e ‘i he tafa‘aki fale to‘omata‘u, pea na‘a nau ‘alu hake ‘i ha tu‘unga takai ki he fata lotoloto, pea mei he fata lotoloto ki hono tolu ‘o e fata. 9Ko ia, na‘a ne langa ‘a e fale, ‘o faka‘osi ia; ‘o ne ‘ato ia ‘aki ‘a e ngaahi kahoki sita mo e laupapa. 10Na‘a ne langa foki ‘a e ngaahi fata ke faaki ki he fale kotoa; na‘e taki nima kiupite hono mā‘olunga,#6.10 fata… mā‘olungá; ‘Oku ngali tonu hono hiki ‘o: fata fungavaka tolu… na‘e taki kiupite ‘e nima ‘a e mā‘olunga ‘o e fungavaka, ka ‘oku pehē he faka-Hepeluú: ko e fata fungavaka tolu takitaha na‘e kiupite ‘e nima hono mā‘olungá. ‘o puke ki he fale ‘aki ‘a e ngaahi toka sita.
11Pea hoko ‘a e folofola ‘a Sihova kia Solomone, ‘o pehē, 12Ko e me‘a ki he fale ko eni ‘oku ke langa, kapau te ke fou ‘i he‘eku ngaahi tu‘utu‘uni, ‘o fai ‘eku konisitūtone, mo tauhi ‘eku ngaahi fekau kotoa pea ke fou ai; pea te u toki fakaai mo koe ‘a e lea na‘a ku fai ki ho‘o tamai ko Tēvita. 13Pea te u nofo ki he lotolotonga ‘a ha‘a ‘Isileli, pea ‘e ‘ikai te u li‘aki hoku kakai ‘Isileli.
14Pea langa ‘e Solomone ‘a e fale, ‘o faka‘osi.
Ko e Fakanāunau‘i ‘o e Loto Temipalé
(2 Kal 3.8-14)
15Pea ne ngaohi ‘a e holisi mei loto ‘aki ‘a e ngaahi laupapa sita, mei he faliki ‘o e fale ‘o a‘u ki he kahoki ‘o e ‘ato; na‘a ne ‘aofi ‘akau, pea ne faliki ‘a e fale ‘aki ‘a e papa paini. 16Pea ko e uofulu kiupite mei he tā ‘o e fale na‘a ne ngaohi ‘aki ‘a e papa sita mei he faliki ki he kahoki:#6.16 kahoki; Ko hono faka-Hepeluú ia (ko e holisí ia), ka ‘oku pehē ‘i he hiki fuoloa ‘e taha: ‘ato. #‘Eki 26.33-34 pea ne vahe‘i ia mei he fale mo folofola‘anga, mo‘o e Potu Toputapu. 17Pea na‘e fāngofulu ‘a e fua kiupite ‘o e fale, ‘a ia ko e temipale ki ‘ao. 18Pea ko e sita ko ē ‘i he ‘aofi ‘o e fale na‘e tongi fangu ai: mo e ngaahi fisi‘i ‘akau kuo matala: na‘e sita kotoa, na‘e ‘ikai ha maka ‘e hā.
19Pea ne teu ‘a e folofola‘anga ‘i loto fale, ‘i loto ‘aupito, ke tuku ki ai ‘a e ‘A‘ake ‘o e Kovinānite ‘o Sihova. 20Pea ko hono fua mei loto ‘o e folofola‘anga na‘e kiupite ‘e uofulu hono lōloa, pea kiupite ‘e uofulu hono māukupu, pea kiupite ‘e uofulu hono mā‘olunga; pea ne ‘ufi‘ufi ia ‘aki ‘a e koula ma‘opo‘opo; pea ne ‘ufi‘ufi ‘a e ‘ōlita ‘aki ‘a e sita. 21‘Io, na‘e ‘ufi‘ufi ‘e Solomone ‘a e ‘aofi ‘o e fale kātoa ‘aki ‘a e koula ma‘opo‘opo; pea ne tau ha ngaahi seini koula ‘i he mata folofola‘anga: pea ne ‘ufi‘ufi ia#6.21 ia: ‘Oku ‘ikai mahino pe ko e hā ‘a e ia ko iá. ‘aki ‘a e koula. 22‘Io, ko e fale kotoa na‘a ne ‘ufi‘ufi koula, kae‘oua ke ‘osi‘osingamālie ‘a e fale: ko e kotoa ‘o e ‘ōlita foki na‘e kau ki he folofola‘anga na‘a ne ‘ufi‘ufi koula.#‘Eki 30.1-3
23Pea ne ngaohi ‘i he folofola‘anga ha ongo selupimi mei he ‘ōlive, ko e kiupite ‘e hongofulu hona mā‘olunga.#‘Eki 25.18-20 24Pea ko e kiupite ‘e nima ‘a e kapakau ‘e taha ‘o e selupimi, pea kiupite ‘e nima ‘a e kapakau ‘e taha: ko e kiupite ‘e hongofulu mei he mu‘a kapakau ‘e taha ki he kapakau ‘e taha. 25Pea na‘e hongofulu kiupite ‘a e selupimi ‘e taha: na‘e fua taha mo sīpinga taha ‘a e ongo selupimi fakatou‘osi. 26Ko e mā‘olunga ‘o e selupimi ‘e taha ko e hongofulu‘i kiupite, pea pehē mo e selupimi ‘e taha. 27Pea ne tuku ‘a e ongo selupimi ki he loto fale ‘i loto: pea na‘e mafola ‘a e ongo kapakau ‘o e ongo selupimi, pea na‘e lave ‘a e kapakau ‘o e taha ki he ‘aofi ko ē, pea lave ‘a e kapakau ‘o e selupimi ko ē ki he ‘aofi ko ē; pea felāve‘i ‘a e ongo kapakau ‘i loto fale. 28Pea ne ‘ufi‘ufi ‘a e ongo selupimi ‘aki ‘a e koula.
29Pea ‘i he ‘aofi kotoa ‘o e fale takatakai na‘a ne tā fakatātā ai, ko e ngaahi selupimi mo e ngaahi paame mo e ngaahi fisi‘i ‘akau kuo matala, ‘i he fale loto mo e fale tu‘a. 30Pea ko e faliki kotoa ‘o e fale na‘a ne ‘ufi‘ufi koula, ‘a e fale loto mo e fale tu‘a.
31Pea ki he hū‘anga ‘o e folofola‘anga na‘a ne ngaohi matapā mei he ‘ōlive; ko e funga mo e kau matapā ko e vahe-nima ‘o e ‘ā-vahevahe. 32Pea ko e ongo lau matapā na‘e ‘ōlive; pea ne tā ai ‘a e ngaahi fakatātā ‘o e selupimi mo e paame mo e fisi‘i ‘akau, ‘o ne ‘ufi‘ufi koula, ‘o ne folahi ‘a e koula ‘i he ngaahi selupimi mo e paame. 33Pea pehē ‘ene fai ki he hū‘anga ‘o e temipale, na‘a ne ngaohi kau matapā ‘aki ‘a e ‘ōlive fe‘unga mo e vahe-fā ‘o e mata fale. 34Mo e ongo lau matapā paini; ‘a ia na‘a na taki ua foki ‘a e lau matapā na‘e ngaue ‘iate ia. 35Pea ne tā ai ‘ani selupimi moni paame moni matala‘i ‘akau: ‘o ne ‘ufi‘ufi ‘aki ‘a e koula, ‘o fakatotofu ‘a e me‘a na‘e tongi.
36Pea ne langa ‘a e loto‘ā loto; ko e ‘otu maka tātā ‘e tolu, pea mo e ‘otu sita ‘e taha na‘e hele.
37‘I hono fā ‘o e ta‘u na‘e fai ‘a e tanu pou ‘o e fale ‘o Sihova, ‘i he māhina ko Sivi. 38Pea ‘i hono ta‘u hongofulu mā taha, ‘i he māhina ko Puli, ‘a ia ko hono valu ‘o e māhina, na‘e ‘osi ‘a e fale, ‘a hono ngaahi me‘a kātoa pē, mo hono tō‘onga totonu. Ko ia na‘a ne fitu ta‘u ‘i hono langa.
Currently Selected:
KO 1 TU‘I 6: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
