Kolinitō 1 9
9
Ko e Ngaahi Totonu mo e Ngaahi Fatongia ‘o ha ‘Apōsitolo
1‘IKAI ‘oku ou tau‘atāina? ‘Ikai ko e ‘aposetolo au? ‘Ikai kuo u mamata kia Sīsū Kalaisi, ko hotau ‘Eiki? ‘Ikai ko ‘eku ngāue ‘a kimoutolu ‘i he ‘Eiki, ‘ō? 2Ka ne ‘i ai ha ni‘ihi ‘oku ‘ikai te u ‘aposetolo ki ai, kaekehe ko e ‘aposetolo au kiate kimoutolu: seuke, ko e sila kimoutolu ‘o hoku lakanga ‘aposetolo ‘i he ‘Eiki.
3Ko eni ia ‘eku tali kiate kinautolu ‘oku ‘eke au. 4‘Oku pehē koā? ‘Oku ‘ikai ‘amaua tokua ke ‘eke ha me‘akai, pe ha me‘a inu? 5‘Oku ‘ikai ‘amaua koā ke ō holo mo ha fefine lotu kuo ma mali, ‘o hangē foki ko hono toe ‘o e kau ‘Aposetolo, mo e ngaahi tokoua ‘o e ‘Eiki, kae‘uma‘ā ‘a Kīfasi? 6Tā ko au pē ‘apē, mo Pānepasa, ‘oku tapu ke tuku ‘ema ngāue fakamaama, ‘ō? 7Ko hai ha sōtia ‘oku ‘alu ki he tau mo ne totongi ‘e ia ki hono tauhi? ‘anefē ia? Ko hai ‘oku tō ha ngoue vaine, ‘o ‘ikai te ne tokoni ‘aki hono fua? Ko hai ‘oku tauhi ha fanga manu, ‘o ‘ikai te ne ma‘u tokoni mei he hu‘a huhu ‘o e fanga manu ko ia?
8Ko ‘eku lau pehē koā ko e fakaetangata pē? ‘ikai ‘oku fakahā pehē ‘e he Lao foki? 9He kuo tohi ‘i he Lao ‘a Mōsese, ‘E ‘ikai te ke ha‘iha‘i ‘a e ngutu ‘o ha pulu ‘i he‘ene ‘au‘au ‘a e koane. Ko ‘ene toka‘i koā ‘e he ‘Otua ‘a e fanga pulu?#Teu 25.4; 1 Tīm 5.18 10‘Ikai ko ‘ene folofola ‘ata‘atā koe‘uhiā ko kimoutolu? Seuke, na‘e tohi ia koe‘uhi ko kimautolu: he ‘oku totonu ke fai ‘amanaki ‘e ia ‘oku faka‘uli ‘a e palau, pea ke fai ‘amanaki mo ia ‘oku ‘au‘au, ko e ‘amanaki ‘e ai hano ‘inasi. 11Kapau kuo mau tō ma‘amoutolu ‘a e ngaahi me‘a fakalaumālie, ko e me‘a mahu‘inga koā, ‘o kapau te mau utu ho‘omou ngaahi me‘a fakasino?#Lom 15.27 12Kapau ‘oku ‘i ai ha ni‘ihi kehe ‘oku nau kau ‘i he pule pehē kiate kimoutolu, mu‘a hake kimautolu, ‘ikai ko ia? Ka na‘e ‘ikai te mau ngāue‘aki ‘a e pule ko ia: kaekehe, ‘oku mau ‘ūkuma ‘a e me‘a kotoa pē, koe‘uhi ke ‘oua te mau fakapipī ki he Kōsipeli ‘o Kalaisi.
13‘Oku ‘ikai te mou ‘ilo koā, ko kinautolu ‘oku ngāue ‘i he me‘a ‘o e Temipale ‘oku nau kai mei he Temipale? pea ko kinautolu ‘oku tauhi ki he ‘ōlita ‘oku nau ‘inasi taha mo e ‘ōlita?#Teu 18.1 14Pehē foki, na‘e fekau ‘e he ‘Eiki kiate kinautolu ‘oku malanga‘aki ‘a e Kōsipeli, ke nau ma‘u honau tauhi mei he Kōsipeli.#Māt 10.10; Luk 10.7
15Ka ko au, kuo te‘eki te u ala ki ha taha ‘o e ngaahi me‘a ni: pea tala‘ehai ko ‘eku tohi ‘a e ngaahi me‘a ni koe‘uhi ke fai pehē kiate au. Seuke! ‘e lelei mu‘a kiate au ke u mate ‘i he–‘ā! ‘e ‘ikai ha toko taha te ne fakange‘esi hoku pōlepole‘anga. 16He neongo ‘eku malanga‘aki ‘a e Kōsipeli, tala‘ehai ‘oku ou ma‘u ai ha pōlepole‘anga: he ko ha fatongia ia kuo hilifaki mai; ‘io, hoto ‘oiauē, ‘o kapau ‘e ‘ikai te u malanga‘aki ‘a e Kōsipeli! 17He kapau ‘oku ou fai ia ko ‘eku fa‘iteliha, ‘e ai ha‘aku totongi: ka ‘o kapau ‘oku ‘ikai ko ‘eku fa‘iteliha, tā ko ha lakanga ia kuo hilifaki kiate au. 18Pea ka ko ia, pea ko e hā ‘a e totongi ‘oku ou fai ki ai, he‘eku malanga‘aki ‘a e Kōsipeli, ‘o u tuku ke nau ma‘u ia ta‘etotongi, ‘o ‘oua na‘a ku fai ki hono ngātanga ‘o ‘eku fa‘iteliha ‘i he Ngāue?
19Seuke, neongo ‘oku ou tau‘atāina mei he kakai kotoa pē, ka na‘a ku ‘ai fakapōpula au ki he kakai kotoa pē, koe‘uhiā ke tokolahi taha ‘a e kakai te u ma‘u. 20‘Io, ‘i he‘eku fai ki he kau Siu na‘a ku hangē ko ha Siu, koe‘uhi ke u ma‘u ai ha ni‘ihi Siu: pea ‘i he fai ki he fa‘ahinga ‘oku mo‘ulaloa ki he Lao, na‘a ku hangē ha mo‘ulaloa ki he Lao–tala‘ehai ko ha‘aku ongo‘i kuo u mo‘ulaloa ki he Lao, ka koe‘uhi pē ke u ma‘u ai ‘a kinautolu ‘oku mo‘ulaloa ki he Lao; 21‘i he fai ki he fa‘ahinga ‘i tu‘a Lao, na‘a ku hangē ha toko taha ‘i tu‘a Lao–tala‘ehai ko ha‘aku ongo‘i kuo u ‘i he tu‘a lao ‘a e ‘Otua, kehe na‘a ku ‘i he loto lao ‘a Kalaisi, ka koe‘uhi pē ke u ma‘u ai ‘a e fa‘ahinga ‘i tu‘a Lao. 22Na‘a ku hoko ko e vaivai ki he kau vaivai, hei‘ilo te u ma‘u ai ‘a e kau vaivai: kuo u hoko ko e me‘a kehekehe ki he kakai kehekehe, kehe ke u fakamo‘ui hanau ni‘ihi.
23Pea ‘ilonga ha me‘a ‘oku ou fai, ‘oku ou fai koe‘uhi ko e Kōsipeli, koe‘uhi ke u ‘inasi ai fakataha mo e kakai kehe. 24‘Ikai ‘oku mou ‘ilo, ko e kakai ‘oku lele ‘i he fakapuepue ‘oku nau lele kotoa pē, ka ko e toko taha pē ‘oku ma‘u ‘a e koloa? Ke hangē ko ia ho‘omou lele, koe‘uhi ke mou ma‘uma‘u lelei. 25Ka ‘ilonga ha taha ‘oku kau ‘i he fakapuepue, ‘oku ne fakama‘uma‘u ‘i he me‘a kotoa pē. Pea ko e fai ‘e kinautolu foki ke ma‘u ha pale ‘e mae, ka ko kitaua ha pale ‘e ‘ikai mae. 26‘Ē, ko e anga ‘eni ‘o ‘eku lele ‘a‘aku, ‘oku ‘ikai ke hamumu; ko e anga ‘eni ‘o ‘eku fuhu, ‘oku ‘ikai te u tuki matangi. 27Kaekehe, ‘oku te toke‘ia hoto sino, mo taki pōpula‘i: na‘a ‘iloange, hili ‘eku fai ‘a e angi ki he kakai kehe, pea u hoko au ko e li‘ekina.
Currently Selected:
Kolinitō 1 9: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
