Kolinitō 1 8
8
Ko e Me‘akai kuo Feilaulau‘i ki ha Tamapua ‘Otua
1PEA ko e me‘a ki he ngaahi me‘a ne ‘oatu ki he ‘aitoli, ‘oku mahino tokua ‘oku ‘iate kitautolu kotoa pē ha ‘ilo ki ai- (ko e ‘ilo ko e me‘a fakafuofuolahi ia, ka ko e ‘ofa ko e me‘a langa hake.
2Ka mahalo ‘e ha toko taha kuo ne ‘osi ‘ilo ki ha me‘a, tā ‘oku te‘eki ke a‘u ‘ene ‘ilo ki hono anga totonu: 3ka ‘oka ‘ofa ‘e ha taha ki he ‘Otua, ko e toko taha ia kuo ‘iloa ‘e he ‘Otua).
4Pea ko eni, ko e me‘a ki he‘ete kai ‘a e me‘a ne ‘atu ki he ‘aitoli, ‘oku mahino tokua ‘oku ‘ikai ha ‘aitoli ‘i he ‘univeesi; pea ‘oku ‘ikai mo ha ‘Otua, ka ‘oku taha tofu pē. 5‘Io, pea ka ne ‘i ai mo‘oni, ‘i langi pe ‘i māmani, ha ngaahi me‘a ‘oku lau ko e ngaahi ‘otua–‘a ē ‘oku ‘i ai ha ngaahi ‘otua tokolahi, mo ha ngaahi ‘eiki tokolahi– 6ka kiate kitautolu ‘oku taha pē ‘a e ‘Otua, ko e Tamai, ‘a ia ‘oku mei ai ‘a e me‘a kotoa pē, pea ko kitautolu ma‘ana; pea ‘oku taha pē ‘a e ‘Eiki, ko Sīsū Kalaisi, ‘a ia ‘oku fou mai ‘iate ia ‘a e me‘a kotoa, pea ‘oku fou ‘iate ia ‘a kitautolu.
7Ka ‘oku ‘ikai ‘i he kakai kotoa pē ‘a e ‘ilo pehē: ka ‘oku ‘i ai ‘a e ni‘ihi, ko e me‘a ‘i he kei tolonga mai ‘enau maheni mo e ‘aitoli, ko ia ‘oku nau ongo‘i ‘i he‘enau kai ia, ko e me‘a ne ‘atu ki he ‘aitoli, pea ‘uli ai honau konisēnisi ko si‘ene vaivai. 8Pea tala‘ehai ko e me‘akai te ne fakaongo kitaua ki he ‘Otua: kapau ‘oku ‘ikai te ta kai, ‘oku ‘ikai te ta tōmui ai, pea kapau ‘oku ta kai, ‘oku ‘ikai te ta hulu atu.
9Ka mou tokanga, na‘a ‘iloange ‘e hoko ho‘omou tau‘atāina na, ko e tūkia‘anga kiate kinautolu ‘oku vaivai. 10He ka mamata ‘e ha toko taha kiate koe, ‘a koe ko e ‘ilo, ‘oku ke keinanga ‘i ha fale-‘aitoli, ‘ikai ‘e langa hake ai ‘a si‘ono konisēnisi, ka ko e vaivai, ke kai ‘a e me‘a kuo ‘oatu ki he ‘aitoli? 11‘Oiauē! ‘oku maumau ‘a si‘i vaivai he fai‘aki ho‘o poto na, si‘i tokoua na‘e pekia ki ai ‘a Kalaisi. 12Ka ko ho‘omou fai angahala pehē ki homou ngaahi tokoua lotu, mo ho‘omou ‘ai ke lavea honau ngaahi konisēnisi ‘oku vaivai, ko ho‘omou fai angahala ia kia Kalaisi. 13‘Āua, pea kapau ko e me‘akai pē ia ‘a ia ‘oku fakahingaki si‘oku tokoua, ‘ā, ‘e ‘ikai ‘aupito te u toe kai kakano ‘o lauikuonga, ke ‘oua na‘a ku fakahingaki si‘oku tokoua.
Currently Selected:
Kolinitō 1 8: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
