Kolinitō 1 4
4
Ko e Ngāue ‘a e Kau ‘Apōsitoló
1KO eni ‘a e lau ke fai ‘e he kakai kiate kimautolu, Ko e kau Tokoni pē ‘o Kalaisi, pea ko e kau Sētuata ‘o e ngaahi misiteli ‘o e ‘Otua. 2‘Oku fai ‘i heni foki ‘a e sivi ‘o e kau sētuata; koe‘uhi ke hā ‘a e faitotonu ‘a ha taha. 3Ka ko kita, ‘oku ma‘ama‘a ‘aupito kiate au hoku sivi ‘e kimoutolu, pe ko e fakamaau ‘o eni: ‘io, na‘a mo kita, ‘oku ‘ikai te te sivi kita. 4He neongo ‘oku ‘ikai te te ‘ilo ha me‘a kiate kita; ka ‘oku ‘ikai te te falala ki ai kuo u tonuhia; ka ko ia ‘oku ‘a‘ana hoku sivi ko e ‘Eiki. 5Ko ia, ‘oua te mou fakapapau ha me‘a, ‘i he te‘eki hoko hono kuonga. ‘Oua ke hoko mai ‘a e ‘Eiki, ‘a ia te ne huluhulu ‘a e ngaahi me‘a na‘e fufū ‘i he po‘uli, pea te ne ‘ai ke e‘a ‘a e ngaahi fakakaukau ‘o e ngaahi loto: pea ‘e toki ma‘u takitaha mei he ‘Otua hono fakamālō totonu.
6Pea ko e ngaahi me‘a ko eni, kāinga, kuo u hiki ‘o ‘ai kiate au pea mo ‘Āpolosi, telia kimoutolu; ko e ‘uhi ke me‘a ako ‘aki kimaua kiate kimoutolu, ‘o mou lava‘i ‘a e fo‘i akonaki ko eni, Ke ‘oua na‘a hulu atu ‘i he me‘a kuo tohi; ka mou tuku ho‘omou ‘afungi, mo ho‘omou kauhaki‘i ha taha ke fakasīkaka‘i ha taha kehe. 7Pea ko ho‘o makehe atu na, ko e ngāue ‘a hai? he ‘oku ‘i ai ha‘o me‘a na‘e ‘ikai foaki? Pea kapau leva ko ho‘o ma‘u foaki, ko e hā ‘oku ke pōlepole ai, ‘o hangē ko e toko taha kuo ne ma‘u ‘iate ia pē?
8Tā kuo mou mākona leva! tā kuo mou koloa‘ia leva! tā kuo mou hoko ‘o tu‘i, ‘o laka ‘iate kimaua! Seuke, taumaiā kuo mo‘oni ho‘omou tu‘i na, hei‘ilo te ma kaungā tu‘i foki fakataha mo kimoutolu! 9He ‘oku matamata kiate au kuo fakatakataka ‘aki ‘e he ‘Otua ‘a kimautolu ‘Aposetolo, ke hā ko e kakai taupotu ki lalo–‘o hangē tofu pē ko ha kau fakamāumatea, ko e me‘a ke māta‘i ‘e he ‘univeesi, ‘e he kau ‘āngelo mo e kakai. 10Ko kimautolu ko e vale tokua, koe‘uhi ko Kalaisi, ka ko e pōtopoto‘i faka-Kalaisi ‘a kimoutolu; ko kimautolu ko e vaivai, ka ko kimoutolu ko e kau mālohi; ongoongo kimoutolu, kae ta‘etoka‘i kimautolu. 11Na‘a mo e houa ni, pea ‘oku ‘ikai ko e toki me‘a, ‘oku mau masiva me‘akai, masiva me‘a inu, masiva kofu; ‘oku tautekovia kimautolu, ‘oku mau hēhē tu‘u pē, ‘oku mau ongosia he tauala mo‘omau tauhi; 12ka ngaohia kimautolu ‘oku mau tali ‘aki ha tāpuaki; ka fakatanga‘i, ‘oku mau ‘ūkuma pē; ka lau‘ikovia ‘oku mau tali fakaoleole:#Ngā 18.3 13ko ‘emau nofo ‘o a‘u ki he taimi ni, ‘oku hangē tofu pē ko e tu‘unga ‘oto‘ota ‘o māmani kimautolu, ko e ‘ananga ‘o e ‘uli kotoa.
14‘Oku ‘ikai te u tohi pehē ko ha‘aku fakamaa‘i kimoutolu; ka ko si‘eku na‘ina‘i ki he fānau ‘oku ou ‘ofa ki ai. 15He neongo e toko mano ho‘omou kau faiako ‘i he mo‘ui faka-Kalaisi, ka tala‘ehai ‘oku tokolahi ho‘omou ngaahi tamai: pea ko au ia na‘a ku fakatupu kimoutolu ‘i he mo‘ui faka-Sīsū-Kalaisi ‘aki ‘a e Kōsipeli. 16Ko ia ‘oku ou kole atu, ke mou hoko ko e kau fa‘ifa‘itaki kiate au.#1 Kol 11.1; Filip 3.17 17Ko hono ‘uhinga ia kuo u tuku atu ‘a Tīmote, ‘a ia ko hoku foha ‘oku ou ‘ofa ai, pea ko e tōnunga ‘i he ngāue ‘a e ‘Eiki; pea te ne fakamanatu kiate kimoutolu ‘eku tō‘onga ‘i he mo‘ui faka-Kalaisi, ‘a e ngaahi me‘a ‘oku ou enginaki ‘aki ‘i he ngaahi siasi ‘i he ngaahi potu kehekehe.
18Tokua na‘e ‘i ai homou ni‘ihi na‘e mofuta hake ko e ‘ikai te u ‘alu atu ‘e au. 19Ka te u ‘alu atu pē ‘o vave, ‘o kapau ‘e finangalo ki ai ‘a e ‘Eiki; pea te u toki ‘eke ‘o ‘ilo, ‘o ‘ikai ki he me‘a ‘oku lau ‘e he kau mofuta na, ka ki he ivi ‘oku nau fai‘aki. 20He ko e Pule‘anga ‘o e ‘Otua ‘oku ‘ikai ke tu‘u ‘i he lau ka ‘i he ivi. 21Ko e hā homou loto? ka u ‘alu atu mo e me‘a kinisi? pe te u ‘alu atu mo e ‘ofa, pea laolao foki ‘a e Laumālie.
Currently Selected:
Kolinitō 1 4: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
