Kolinitō 1 3
3
Kaungā Ngāue ma‘á e ‘Otuá
1PEHĒ foki, kāinga, na‘e ‘ikai te u lava ke lea kiate kimoutolu, ‘o hangē ki ha kau fakalaumālie; kae hangē pē ki ha kakai na‘e kakano ‘atā; ‘io, ‘o hangē ha kau valevale ‘ia Kalaisi Sīsū. 2Ko e hu‘akau ia na‘a ku fafanga ‘aki kimoutolu, na‘e ‘ikai ko e me‘akai mālohi: he kuo te‘eki ke mou makalohi. ‘Io, na‘a mo ‘eni kuo te‘eki ke mou maka lohi: he ‘oku mou kei fakakakano.#Hep 5.12-13 3Seuke, he kapau leva ‘oku ‘iate kimoutolu ‘a e meheka mo e fetu‘usi, ‘ikai ‘oku mou fakakakano, pea laka fakaetangata pē? 4He ka lau ‘e hamou taha, ‘Oku ‘o Paula au; kae pehē ‘e ha taha kehe, ‘Oku ‘o ‘Āpolosi au; ‘ikai ko ho‘omou fakaetangata pē?#1 Kol 1.12
5Pea ko e hā ai ‘a ‘Āpolosi? Pea ko e hā ai ‘a Paula? Ko e ongo sevāniti pē, ‘a ia na‘e fou ai ho‘omou lotu; pea na‘a mo ia, ko ‘ena ‘ange pē kiate kimoutolu takitaha, ‘o fakatatau ki he me‘a kuo ‘omi ‘e he ‘Eiki. 6Na‘e ‘a‘aku ‘a e tō, na‘e ‘a ‘Āpolosi ‘a e fakaviviku; kae ‘a e ‘Otua ai pē ‘a e fakatupu.#Ngā 18.4-11,24-28 7Ko ia, tala‘ehai ko ha me‘a ia ‘a ia ‘oku fai ‘a e tō, pe ko ia ‘oku fai ‘a e fakaviviku; ka ko ia pē ‘oku fakatupu, ‘a ia ko e ‘Otua. 8Pea ko eni, ko e tō mo e fakaviviku ‘oku na fa‘ahinga, ka ‘e ma‘u takitaha ‘ene totongi ‘a‘ana, ‘o fakatatau ki he‘ene kikivi ‘a‘ana. 9He ko e ongo kaungā ngaue kimaua mo e ‘Otua: ko kimoutolu ko e ngoue‘anga ‘a e ‘Otua, ko e fale ‘o e ‘Otua ‘oku langa.
10Ko au, ‘i he‘eku fai‘aki ‘a e kelesi ‘a e ‘Otua na‘a ne ‘omi, ne u ‘ai ‘a e makatu‘unga, ‘o taau mo ha tufunga poto, ka ko e langa hake ‘oku fai ‘e ha taha kehe. Ka ke takitaha tokanga ki he anga ‘o ‘ene langa. 11He ko e me‘a ki he maka tu‘unga, tala‘ehai ‘e lava ‘e ha taha ke ‘ai mo ha tu‘unga kehe, ka ko ia pē ne toka ‘ai, ‘a ia ko Sīsū Kalaisi. 12Pea ka fai ‘e ha taha ‘ene langa ‘i he tu‘unga ko ia, ‘o ne langa koula, siliva, maka mahu‘inga, ‘akau, musie, pe veve; 13‘e faifai pea e‘a ‘a e ngāue ‘a e tangata takitaha: he ‘e sivi ia ‘e he ‘Aho Lahi, koe‘uhi ko ‘ene hoko mai mo e afi; pea ‘e sivi ‘e he afi ko ia ‘a e ngāue ‘a e tangata takitaha, pe kuo fēfē. 14Kapau ‘e tu‘u ‘a e ngafa ‘a ha taha ‘i he langa fale, te ne ma‘u totongi. 15Kapau ‘e vela ‘o ‘auha ‘ene ngafa me‘a, ‘e mole ‘ene totongi, ka te ne hao ‘e ia; kae hangē ha hao mei he loto afi.
16‘Oku ‘ikai te mou ‘ilo koā ko e temipale ‘o e ‘Otua ‘a kimoutolu, pea ‘oku fale ‘iate kimoutolu ‘e he Laumālie ‘o e ‘Otua?#1 Kol 6.19; 2 Kol 6.16 17Ka maumau ‘e ha taha ‘a e temipale ‘o e ‘Otua, ‘e maumau ‘e he ‘Otua ‘a e toko taha ko ia; he ko e temipale ‘o e ‘Otua ‘oku toputapu; pehē foki mo kimoutolu.
18Ke ‘oua na‘a kākaa‘i ha taha ‘e ia. Ka ai ha taha ‘oku ne ‘afungi ko e poto ia ‘iate kimoutolu faka-e-maama ko eni, ke ne hoko mu‘a ko e vale, ka ne toki poto. 19He ko e poto ‘o e maama ko eni, ko e koto vale ia ‘i he vakai ‘a e ‘Otua. He kuo tohi, ‘Oku ne pō ‘a e kau poto ‘i he fai olopoto ‘anautolu.#Siope 5.13 20Pea ko e potu tohi ‘e taha ‘oku pehē, Ko e me‘a ‘a e ‘Eiki ki he ngaahi fifili ‘a e kau poto, Ko e koto launoa ia.#Saame 94.11 21Ko ia, ke ‘oua na‘a vīkiviki ‘e ha taha ‘i ha tangata, he ko ho‘omou me‘a ‘a e me‘a kotoa pē– 22‘a Paula, ‘a ‘Āpolosi, ‘a Kīfasi; ‘a e māmani, ‘a e mo‘ui, ‘a e mate; ‘a e ngaahi me‘a ‘oku lolotonga ni, ‘a e ngaahi me‘a ka hoko mai; ‘io, ko e me‘a kotoa pē ‘oku ‘amoutolu: 23ka ko kimoutolu ko e me‘a ‘a Kalaisi, pea ko Kalaisi ko e me‘a ‘a e ‘OTUA.
Currently Selected:
Kolinitō 1 3: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
