Kene 3

Akaka a kubana a Sadisu

1Ɗa u danai mu, “Ɗana katagarda ka akaka ka nam pa. Vuza na wi o tsugono tsa ayinviki e cindere a na i a kuyaꞋanka Ka̱shile tsugbashi, vuza na kpamu wi uka̱ni n azangata e cindere, u suꞋuku ta̱ akaka a nam pa a kubana u kalingata ka̱ Ka̱shile ka̱ a̱Ꞌisa̱ a aza o Kutoni a̱ likuci i Sadisu.

N yeve ta̱ ili i na vi a kuyaꞋan. Uma a danai vi ta̱ n wuma, amma mayun vi ta̱ ukpa̱. 2Jimgba! Vu buwa n utsura ka̱u ba, u ɗa kpamu u gita̱ ta̱ kukotso. Adama a nannai, zuwa ili i na i buwai nu i doku i gbama ka̱u. Me ene ta̱ ili i na vi a kuyaꞋan i yawa ili i na Ka̱shile ka̱ va̱ ka cigai vi yaꞋan ba. 3Adama a nannai ka̱ta̱ vu cinukpa n ili i na vi isai n ili i na kpamu vu panai ba. Tono i ɗa, ka̱ta̱ vu shika̱ unushi u nu. Vu jimgba baci ba, mi ta̱ a̱ kuta̱wa̱ a ayin a na vu sheshei ba, uteku u na koboki ka̱ tsu ta̱wa̱. 4A̱ɗa̱ vi yoku punu a Sadisu i kapanika ntogu n ɗa̱ n unushi ba. Uma a nam pa i ta̱ a kuꞋuka ntogu ma̱ a̱ri ka̱ta̱ a wala koɓolo nu mpa, adama a na a yawa ta̱ a yaꞋan nannai. 5Vuza na de dem u lyaꞋi utsura wi ili i kavama wi ta̱ a kuꞋuka motogu ma̱ a̱ri uteku u na uma a nam pa a ukai. Mi o kugboro kula ku vuza nan lo ku na a ɗanai a Katagarda ka Aza a Wuma ba. N shamgba baci e kelime ke Esheku a̱ va̱ n alingata a̱ Ka̱shile a na i a kuyaꞋanka yi tsugbashi, mi ta̱ a kudana gogo va lo a na n yevei vuma vu nam pa.

6Vuza na baci wi n atsuvu a kupana, ka̱sa̱kpa̱ u pana ili i na Ayinviki a̱ Ka̱shile i a kudana a̱Ꞌisa̱ a aza o Kutoni kakau!”

Akaka a kubana a Filadafiya

7Ɗa u danai mu, “Ɗana katagarda ka akaka ka nam pa. Vuza na wi ciɗa m mayun kpamu ɗa wi feu uka̱ni n kagbaguratsu ko tsugono ka Dawuda.#3:7 Kagbaguratsu ka Dawuda ɗaɗa utsura u na u kulyaꞋa tsugono. U ɓa̱yuwa̱ baci utsutsu, vuza wi lo a̱ kuɓa̱ya̱ngu u ɗa ba. U ɓa̱ya̱ngu baci kpamu u ɗa, vuza wi lo a̱ kuɓa̱yuwa̱ u ɗa ba. U suꞋuku ta̱ akaka a nam pa a kubana u kalingata ka̱ Ka̱shile ka̱ a̱Ꞌisa̱ a aza o Kutoni a̱ likuci i Filadafiya.

8N yeve ta̱ ili i na yi a kuyaꞋan. N yeve ta̱ uma a ɗika ɗa̱ azagbagbaꞋin ba. Vu tono ta̱ kuyotsongusu ku va̱, vu saꞋwa ta na feu kudana, ‘N nana ta̱ Yesu,’ ba. M ɓa̱yuwa̱ ta̱ utsutsu e kelime ka̱ nu vuza u kufuɗa wa̱ ɓa̱ya̱ngu ba. 9Gogo na ve kene ta̱ ili i na n kuyaꞋan n uma a na i ushiga u MalyaꞋi. A danai ele uma a̱ Ka̱shile a ɗa, amma aza a aꞋuwa a ɗa i. Mi ta̱ a kuzuwa le a̱ ta̱wa̱ a̱ kuɗa̱nku wu. Ayin a na baci a yaꞋin nannai ka̱ta̱ e yeve a na mi a kuciga wu. 10Vu lulukpa̱ ta̱ uteku u na n danai nu vi yaꞋan. Adama a nannai, mi ta̱ a kukanza wu a ayin a na n kukondo uma a aduniyan ra̱ka̱, ka̱ta̱ n zuwa le a pana atakaci n a̱bunda̱i. 11Mi ta̱ a̱ kuta̱wa̱ gogoꞋo. LyaꞋa kelime n kutsurakpa a̱ ubuta̱ wu uneki u ka̱ɗu u nu, ta lo vuza wa̱ fa̱ba̱na̱ oroliko a na va̱ kuciya̱ adama a na vi lyaꞋi. 12Mi ta̱ a kuzuwa vuza na u lyaꞋi utsura wi ili i kavama, wo okpo ma̱shukpu mo yoku ma na ma̱ ka̱na̱i a̱Ꞌisa̱ a̱ Ka̱shile a̱ va̱. Vuma vu nam pa u kuyongo ta̱ lo ayin tutu. Mi ta̱ a kuɗana ula e re gaɗi vu kuca̱n ku ni: kula ku Ka̱shile ka̱ va̱, n kula ku Urishelima† vu Savu, na va ɗaɗa kula ku ubirini u Ka̱shile ka̱ va̱, ku na ku uta̱i a̱ Ka̱shile gaɗi. Mi ta̱ kpamu a kuɗana gaɗi vi ni kula ku savu ku va̱.

13Vuza na baci wi n atsuvu a kupana, ka̱sa̱kpa̱ u pana ili i na Ayinviki a̱ Ka̱shile i a kudana a̱Ꞌisa̱ a aza o Kutoni kakau.”

Akaka a kubana a Ladukiya

14Ɗaɗa u danai mu, “Ɗana katagarda ka akaka ka nam pa. Na va ɗaɗa kadanshi ka Vuza na Wi Nannai.† A̱yi ɗa feu ngan n na a̱ kushuku n a̱yi n vuza na kpamu u tsu dansa ili i mayun ayin tutu. A̱yi ɗa vuza na Ka̱shile ka yaꞋin ili dem a̱ ubuta̱ u ni. U suꞋuku ta̱ akaka a nam pa a kubana u kalingata ka̱ Ka̱shile ka̱ a̱Ꞌisa̱ a aza o Kutoni a̱ likuci i Ladukiya:

15N yeve ta̱ ili i na vi a kuyaꞋan, avu kpamu vi ta̱ku ko usuɗukpi#3:15 A̱ ubuta̱ u nam pa “usuɗukpi” wi ta̱ a kadanshi ku uneki wa aci adama a ulinga u Kishi, “uta̱ni” ɗaɗa ukpa̱ɗi u kuneke kaci n ulinga. ba. U kulaꞋa ta̱ n kugaꞋan vi yaꞋan ke te. 16Mi ta̱ a kuꞋiwan wu adama a na vi ta̱ e mere mi ili i nan lo ya. 17Vu danai, ‘Mi ta̱ n uciyi, m ɓolonku ta̱ kpamu ka̱ci ka̱ va̱ ili n a̱bunda̱i. Mi a kuciga ili i yoku ba, ko kenu.’ Amma vi yeve uteku u na vi mayun ba: Ili ya asuvayali i ɗa vi; vu namba ta̱ ili dem; ka̱yimba̱ kaꞋa vi; vi ta̱ kpamu koshomboɗi. 18Adama a nam pa, n yaꞋanka wu ta̱ odoki, vu tsula azanariya a na mi e kudenge. Na va ɗaɗa azanariya a na e derekpei ɗe, ɗa o okpoi ciɗa. Tsula a ɗa adama a na vo okpo vuza vu uciyi. Mayun ɗa feu vu tsula ntogu ma̱ a̱ri n na mi e kudenge ka̱ta̱ vu ukaka ka̱ci ka̱ nu, adama a na vi ciya̱ vu kpa̱ɗa̱ kupana wono u na uma i e kene wu koshomboɗi. Mayun ɗa feu vu tsula maniꞋin ma̱ a̱guma̱ ma na mi e kudenge vi ciya̱ vu tsunku a̱shi a̱ nu, adama a na vu fuɗa ve ene.

19N tsu ɓarangu ta̱ aza a na n cigai ka̱ta̱ n takacika le. Dakaka vi yaꞋan uteku u na va kufuɗa kuyaꞋan ra̱ka̱, ka̱ta̱ vu shika̱ unushi u nu. 20Zuwa atsuvu! Mi ta̱ a kashani a̱ utsutsu a kudana, ‘AzakpaꞋa!’ Vuza na de dem u panakai mu, ɗa u danai mu n uwa, n kuꞋuwa ta̱ a kpaꞋa ka ka̱ta̱ n lyaꞋa ilikulyaꞋa n a̱yi.

21Aza a na a lyaꞋi utsura wi ili i kavama, i ta̱ a̱ kuda̱sa̱ngu nu mpa a kakuba ko tsugono ka̱ va̱, uteku u na n lyaꞋi utsura, ɗa n da̱sa̱ngi n e Esheku a̱ va̱ a kakuba ko tsugono ka̱ ni.

22Vuza na baci wi n atsuvu a kupana, ka̱sa̱kpa̱ u pana ili i na Ayinviki a̱ Ka̱shile i a kudana a̱Ꞌisa̱ a aza o Kutoni kakau!”

Currently Selected:

Kene 3: asgNT

Highlight

Copy

Compare