Kene 4
4
Yahaya we enei ili i na yi ɗe gaɗi
1A ayin a na me enei ili i nam pa ra̱ka̱, me enei kpamu ili i yoku, me enei utsutsu uɓa̱yuwi gaɗi. Ɗa vuza na wi n ka̱la̱ka̱tsu an kavana u yaꞋin kadanshi nu mpa, u danai, “Livanku na ka̱ta̱ n yotsongu wu ili i na i kuta̱wa̱ ya yaꞋan, ka nam pa ko kotso baci.” 2Gogo lo ɗa Ayinviki a̱ Ka̱shile o tonoi nu mpa, ɗa me enei ɗe gaɗi vuza a̱ ida̱shi a kakuba ko tsugono. 3Vuza na wi ɗe ida̱shi ya a kutasa langu-langu an akina a na i ushili koɓolo m mini ma̱ a̱vuku tsa atali a ikebe.† A uka̱ra̱Ꞌi u kakuba wa vukamba vi ta̱ lo vu na vi a kutasa langu-langu. 4Me enei kpamu makpata ma akuba o tsugono kamanga n a̱ na̱shi. Nkoshi m gba̱ra̱-gba̱ra̱ kamanga n aza a̱ na̱shi a̱ da̱sa̱ngi punu a akuba a nam pa a. Kakuba ka gbayin ko tsugono tamkpamu punu e mere me le. A ukai aminya a̱ a̱ri ɗa a alai oroliko a azanariya a aci e le. 5Ili i nam pa ya i gita̱i kuta̱ punu a kakuba ko tsugono ka gbayin ka: kutashi n ulaɗi maru-maru, n kacaꞋa, n akpanga a gbagbaꞋin. A̱va̱sa̱ a akina e cindere, a̱ kukula̱ e kelime ka kakuba ko tsugono ka, ele ɗa ta na ayinviki e cindere a̱ Ka̱shile. 6A̱ ubuta̱ u na e kpetei kpamu e kelime ka kakuba ko tsugono ka wo okpoi an mala a kutasa an mindatsu ma na a urai ferere e kene ugboku u re dem.
Ili i wuma i na̱shi i shamgbai i ka̱ra̱Ꞌi kakuba ko tsugono ka, yaba dem a̱ iga̱Ꞌin i te i kakuba ya. Ili i wuma i nam pa yi ta̱ n a̱shi udariki kucina̱ n asuvu a ikyamba i le dem.
7Vuza iyain wi ta̱ n kaci an kawu. Vuza ire wi ta̱ n kaci an kobomburon. Vuza tatsu wi ta̱ n a̱shi an vuma. Vuza na̱shi wi ta̱ an kajimba ka na ki a kuyaꞋan ciꞋimkpi. 8Ili i wuma i na̱shi i nam pa yi ta̱ n evelyu a̱ ta̱li, n a̱shi kpamu udariki a̱ ubuta̱ dem, ali n ɗaka ve evelyu va. Kanna n kayin dem a̱ tsu ka̱sa̱kpa̱ kuyaꞋan ishipa ba:
“Vuzavaguɗu wi ta̱ ciɗa. Wi ta̱ ciɗa. Wi ta̱ ciɗa.
A̱yi ɗa Ka̱shile Uba̱nga̱ri.
A̱yi ɗa wi n wuma gogo na, vuza na kpamu wi lo n wuma ali n ayin a ɗe, vuza na wi lo a̱ kuta̱wa̱.”
9Ili i wuma i nam pa i lyaꞋi kelime n kucikpa vuza na wi ida̱shi a kakuba ko tsugono ka. E nekei ni kpamu tsugbayin ɗa o doku a cikpai ni. A̱yi ɗa vuza na wi n wuma u babu uteku. 10A ayin a nan lo a ɗa feu nkoshi m gbagbaꞋin ma ele uma kamanga n aza a̱ na̱shi a a̱ kuɗa̱nki vuza na wi ida̱shi a kakuba ko tsugono ka. Ana a cikpai vuza na wi n wuma u babu uteku, ɗa a zuwai oroliko o tsugono e le kelime ka kakuba ko tsugono ka ɗa a danai,
11“Vuzavaguɗu vu tsu n Ka̱shile ka̱ tsu,
u gaꞋan ta̱ vi isa tsugbayin,
n kucikpa, n utsura adama a na avu ɗa vi yawai.
Avu ɗa vi yaꞋin ili ra̱ka̱,
ɗa vu zuwai le n wuma tsu na i,
adama a na ta vi cigai i ɗa nannai.”
Currently Selected:
Kene 4: asgNT
Highlight
Copy
Compare
Share
Want to have your highlights saved across all your devices? Sign up or sign in
© 2012 Wycliffe Bible Translators, Inc. All rights reserved
