Kene 2

Akaka a kubana a Afisu

1Ɗa u danai mu, “Ɗana katagarda ka akaka ka nam pa. Vuza na wi uka̱ni n azangata e cindere e kukiye ku usingai ku ni, ɗa kpamu wi a nwalu e mere ma ashamkpatsu a̱ nkuni e cindere u suꞋuku ta̱ akaka a nam pa a kubana u kalingata ka̱ Ka̱shile† ka̱ a̱Ꞌisa̱ a aza o Kutoni† a̱ likuci i Afisu:

2N yeve ta̱ ulinga u nu ra̱ka̱. Me ene ta̱ ulinga u ma̱riki u nu n ka̱lulu ka̱ nu. N yeve ta̱ a na vi iwain ɗe uma a kavama. Vu kondo ta̱ ɗe aza a na a danai ele azusuki a ɗa, amma ashe mayun ɗa ba, ɗa vi cinai ele aza a aꞋuwa a ɗa. 3Vu lulukpa̱ ta̱ a̱ ubuta̱ wa atakaci adama a̱ va̱, ka̱ɗu ka̱ nu kpamu kokpo ta̱ n utsura tsu na vi o kutono mu.

4Amma mayun ɗa n dansuka wu n ko yoku. Vu buwa n ucigi uteku u na vi ishi vi ci yaꞋan a ayin a na vi gita̱i kuneke ka̱ɗu nu mpa ba. 5Ka̱ta̱ vi cinukpa uteku u na vi yikpa̱i a̱ ubuta̱ wu unushi ba! Mayun ɗa, vu ka̱sa̱kpa̱ kuyaꞋan unushi ka̱ta̱ vi yongo uteku u na vi ishi ana vu gita̱i kuneke ka̱ɗu nu mpa. Vi lyaꞋa baci kelime n kuyaꞋan unushi, mi ta̱ a̱ kuta̱wa̱ wa̱ nu ka̱ta̱ n takacika wu ali n takpa kashamkpatsu ka̱ ma̱kuni ma̱ nu a̱ ubuta̱ u na ma mi. 6Amma ili i singai i na vi a kuyaꞋan i ɗa na. Vi iwan ta̱ ulinga u na otoni a Nikala#2:6 Aza o kutoni a Nikala nlum ma aꞋuwa n ɗa, aza a na i a kuciga uma o tono a̱ma̱li ka̱ta̱ a yaꞋan unushi u tsugbani. i a kuyaꞋan, uteku u na mpa n iwain ili i na i a kuyaꞋan feu.

7Vuza na baci wi n atsuvu a kupana, ka̱sa̱kpa̱ u pana ili i na Ayinviki a̱ Ka̱shile i a kudana a̱Ꞌisa̱ a aza o Kutoni kakau! Mi ta̱ a̱ kuka̱sa̱kpa̱ aza a na a lyaꞋi, a lyaꞋa a̱ ubuta̱ u maɗanga ma na me ci neke wuma ma na mo tsu gbonguro ɗe a kashina ka̱ Ka̱shile na ɗe gaɗi.”

Akaka a kubana a Simina

8Ɗa u danai mu, “Ɗana katagarda ka akaka ka nam pa. Vuza na wi vuza vi Iyain n vuza vu Ukocishi, vuza na u kuwa̱i ɗa kpamu wi n wuma, u suꞋuku ta̱ akaka a nam pa a kubana u kalingata ka̱ Ka̱shile ka̱ a̱Ꞌisa̱ a aza o Kutoni a̱ likuci i Simina:

9N yeve ta̱ ukuna wa atakaci a̱ nu n unambi u nu, amma vi ta̱ n uciyi! N yeve ta̱ ukuna u kavama u na uma o yoku i a kudansa adama a̱ nu. A danai ele uma a̱ Ka̱shile a ɗa, amma ta i nannai mayun ba. Ele ushiga u MalyaꞋi† u ɗa. 10Ka̱ta̱ vu pana wovon ba, vi ciɓa baci n uteku u na va̱ kuta̱wa̱ va takacika. N dana wu, Kalijani ki ta̱ a kuzuwa le a zuwa a̱ɗa̱ vi yoku a ugbashi adama a na o kondo ɗa̱, ka̱ta̱ i soꞋo atakaci ali ayin kupa. LyaꞋa kelime n kutono magaba, ko i a kuna wu, ka̱ta̱ mpa ta na n neke wu wuma u babu uteku wo okpo katsupu ka̱ nu tso oroliko.†

11Vuza na baci wi n atsuvu a kupana, ka̱sa̱kpa̱ u pana ili i na Ayinviki a̱ Ka̱shile i a kudana a̱Ꞌisa̱ a aza o Kutoni! Aza a na a lyaꞋi utsura u kawuya, i a kutakacika a̱ ubuta̱ wu ukpa̱ u ire ba.”

Akaka a kubana a Birigama

12Ɗa u danai mu, “Ɗana katagarda ka akaka ka nam pa. Vuza na wi n kotokobi ka na e temgbei una̱ u re dem alyu, u suꞋuku ta̱ akaka a nam pa a kubana u kalingata ka̱ Ka̱shile ka̱ a̱Ꞌisa̱ a aza o Kutoni a̱ likuci i Birigama.#2:12 A̱ likuci i Birigama a̱Ꞌisa̱ i ta̱ punu a̱ ubuta̱ u na uma a ci cikpa mogono ma Roma adanshi a̱yi Ka̱shile kaꞋa. Ɗevu n a̱yi katalikalyuka ki ta̱ punu a̱ ubuta̱ u na a ci cikpa ka̱ma̱li Zafasa. Birigama ɗa wi ishi likuci i gbayin i tsugono tsu MalyaꞋi a aduniyan.

13N yeve ta̱ a na vi ida̱shi a̱ ubuta̱ u na MalyaꞋi mi a kulyaꞋa tsugono. Avu ɗa vuza vu Kutoni† vu mayun a̱ va̱, vu ka̱sa̱kpa̱ kpamu kuneke ka̱ɗu nu mpa ba. Vi neke ta̱ ka̱ɗu ko a ayin a na a zuwai Antiba u kuwa̱ ɗe a̱ likuci i nu, a̱ ubuta̱ u na MalyaꞋi mi a kulyaꞋa tsugono. Antiba u yotsongu ta̱ uma ayin tutu a̱ ubuta̱ u kadanshi ka̱ ni n ulinga u ni a na a̱yi vuza vu kutono vu va̱ ɗa wi.

14Amma mayun ɗa n dansuka wu n ko yoku. Aza o yoku a̱ ka̱tsuma̱ ka̱ ɗa̱ i ta̱ o kutono kuyotsongusu ku Balam,#Mkc. 25:1.† vuza na u yotsongi Balaku uteku u na u kuzuwa aza a Israila a yaꞋan unushi. U piyai le a takuma inyama yi nnama n na uma a lyukai ana i a kucikpa a̱ma̱li. Ɗa feu u zuwai le a yaꞋan tsugbani. 15Ana uma a̱ ɗa̱ o yoku a̱ ushuki n kuyotsongusu ka aza o kutono Nikala, ɗa a yaꞋin unushi tsu na aza a Israila a yaꞋin. 16Gogo na shika̱ unushi u nu! Vi yaꞋan baci nannai ba, mi ta̱ lo a̱ kuta̱wa̱ wa̱ nu babu megeshe ka̱ta̱ n shilika̱ n uma a nan lo n kotokobi ka na ki a̱ kuta̱ a̱ una̱ u va̱.

17Vuza na baci wi n atsuvu a kupana, ka̱sa̱kpa̱ u pana ili i na Ayinviki a̱ Ka̱shile i a kudana a̱Ꞌisa̱ a aza o Kutoni kakau! Aza a na a lyaꞋi ɗa n kuneke a̱ ka̱tsuma̱ ka mana† vu na o sokongi.#2:17 Ayahuda a̱ ushuku ta̱ keneki Irimiya u sokongu ta̱ mogbodo ma mana ma na ishi a zuwai a Akpati vu Uzuwakpani. A kubana uteku, i ta̱ e kene maꞋa ka̱ta̱ uma a lyaꞋa punu kpamu. Mi ta̱ feu e kuneke yaba dem vi le katali ka̱ a̱ri ka na a ɗanai kula ku savu gaɗi kaꞋa. Vuza na wi isai katali ka nam pa ɗa koci u kuyeve kula ku nam pa.”

Akaka a kubana a Tayatira

18Ɗa u danai mu, “Ɗana katagarda ka akaka ka nam pa a kubana u kalingata ka̱ Ka̱shile ka̱ a̱Ꞌisa̱ a aza o Kutoni a̱ likuci i Tayatira. Maku ma̱ Ka̱shile, vuza na a̱shi a̱ ni a kutasa tsa akina, vuza na kpamu ene a̱ ni i an viyum vi shili vu na o gboroi, u suꞋuku wu ta̱ akaka a nam pa:

19N yeve ta̱ ili i na vi a kuyaꞋan ra̱ka̱. N yeve ta̱ a na vi a kuciga aza a̱ nu aza o Kutoni ɗa kpamu vi kotoni ka̱ va̱ ka mayun. N yeve ta̱ uteku u na vu ɓa̱nka̱i aza o Kutoni o yoku, n yeve ta̱ kpamu a na vu lulukpa̱i. N yeve ta̱ an gogo na ulinga u nu u laꞋa ta̱ tsu na vi ishi cau ana vo okpoi kotoni ka̱ va̱ n ugiti.

20Amma mayun ɗa n dansuka wu n ko yoku. Vi iwan vuka vu nan lo Zazabe ba, vuza na u yaꞋin aꞋuwa ana u danai a̱yi keneki ka̱ Ka̱shile kaꞋa. Wi baci a kuyaꞋan kuyotsongusu u ci ya̱nsa̱ ta̱ agbashi a̱ va̱ adama a na a yaꞋan tsugbani ka̱ta̱ feu a takuma inyama i na a lyukai a̱ma̱li. 21N neke yi ta̱ ayin u shika̱ unushi u ni, amma ɗa u iwain kuka̱sa̱kpa̱ tsugbani. 22Adama a nannai, mi ta̱ a kuzuwa yi u yaꞋan mɓa̱la̱. Mi ta̱ a kuzuwa aza a na a yaꞋin tsugbani koɓolo n a̱yi a takacika ka̱u. Mi ta̱ a kuyaꞋan ili i nam pa gogo na, sai a̱ shika̱ kagbani-gbani ka na a yaꞋin. 23Ali ma kuna otoni a̱ ni, ka̱ta̱ aza a a̱Ꞌisa̱ a aza o Kutoni ra̱ka̱ e ene a na n yevei kusheshe ku yaba dem n ili i na a cigai. Mi ta̱ a kutakacika yaba dem vi le uteku u na a̱miki u unushi a̱ ni i. 24Amma a̱ɗa̱ vi yoku a Tayatira i tono kuyotsongusu ku ni ba. Ka̱ta̱ i yeve ili i na otoni a̱ ni e ci ɗeke ‘Ili yu usokongi i gbayin i MalyaꞋi’ ba. Mi a kudana ɗa̱ i yaꞋan ili i yoku kpamu ba, 25saidei i lyaꞋa kelime n kutono mu mayin ali n ta̱wa̱.

26-28Mi ta̱ a̱ kuka̱sa̱kpa̱ vuza na u lyaꞋi u ciya̱ utsura tsu na Esheku a̱ va̱ e nekei mu ɗe. Mi ta̱ a kuyaꞋan nannai adama a vuza na u lyaꞋi kelime n kuyaꞋan ili i na n danai ni u yaꞋan, ali a ayin uteku wa aduniyan. Mi ta̱ a̱ kuka̱sa̱kpa̱ yi u ciya̱ utsura u na u lyaꞋa tsugono ce elentsu ra̱ka̱.

‘Wi baci a kulyaꞋa tsugono tsu nam pa, wi a kucana ba, ka̱ta̱ a ɓasangu yi miri-miri uteku u na uma o tsu ɓoso mgbodo ma̱ ciꞋin.’#Ishp. 2:9.

Mi ta̱ feu e kuneke yi tsugono tsu kazangata ka na ka tsu tasa n usana#2:26-28 Kazangata ku usana: Adama a na uma n a̱bunda̱i a ayin a nan lo a̱ ushuku ta̱ azangata a tsu zuwa ta̱ ili i yaꞋan a wuma u le, ka̱ta̱ e neke a ɗa utsura gaɗi va azangata a na a buwai ka̱ta̱ a lyaꞋa tsugono n Yesu gaɗi vi ili dem. ka̱lika̱li wo okpo urotu u na u lyaꞋi. 29Vuza na baci wi n atsuvu a kupana, ka̱sa̱kpa̱ u pana ili i na Ayinviki a̱ Ka̱shile i a kudana a̱Ꞌisa̱ a aza o Kutoni kakau.”

Currently Selected:

Kene 2: asgNT

Highlight

Copy

Compare