Kene 20

A̱ya̱ ka̱kpa̱n ke te

1A ayin a na vuza na wi ukumbi o kodoku ka̱ a̱ri ka u lyaꞋi utsura u ka̱di wa, n keneki ka aꞋuwa ka, n osoji e le, ɗa me enei kalingata a̱ kuta̱ gaɗi, wi ta̱ a̱ kuɓa̱na̱ vukani va̱ a̱miki e kukiye ku ni, n ka̱ɓa̱yuwa̱tsu ke kpenle ku zururu. 2-3Kalingata ka̱ ka̱na̱i vungu vu gbayin va, koko ka mani-mani ka nan lo ka na feu e ci ɗeke Kalijani ko MalyaꞋi. U ɗikai vukani va ɗa u shiyai Kalijani ka kpan-kpaꞋan. Ɗaɗa u taɗuki ni e kpenle ku zururu. U gbagurai utsutsu u kpenle wa n ka̱ɓa̱yuwa̱tsu ka na wi a̱ kuɓa̱na̱ va, ɗa u zuwai urotu u cirupa̱ a̱ utsutsu wa ta lo vuza wa̱ ɓa̱yuwa̱ u ɗa. Mayun ɗa Kalijani ko yongo ɗe ali a̱ya̱ ka̱kpa̱n ke te (1,000), adama a na u fuɗa u ya̱nsa̱ uma a aduniyan ba. A ayin a na baci a̱ya̱ ka̱kpa̱n ke te a shanai, kalingata ka ki ta̱ a kushikpa yi u yaꞋan ayin ukeci kpamu.

4Ɗa me enei akuba o tsugono, aza a na kpamu i ida̱shi ɗe ele ɗa aza a na Ka̱shile ke nekei utsura a lyaꞋa tsugono. Ele ɗa a̱kpisa̱ a na irala i le a gbatyai aci adama a na a dansa ta̱ akaka e Yesu n kadanshi ka̱ Ka̱shile. Uma a nam pa a cikpa ka̱di ko ka̱ma̱li ka̱ ni ba, a isa kpamu urotu u ni a̱ a̱ca̱n e le ko e ekiye e le ba. O doku o bonoi n wuma ɗa a̱ da̱sa̱ngi a akuba o tsugono, ɗa a lyaꞋi tsugono koɓolo n Yesu ali a̱ya̱ ka̱kpa̱n ke te. 5Na va ɗaɗa ugiti u na Ka̱shile ka̱ ɗengusa̱i a̱kpisa̱. (A̱kpisa̱ a na a buwai a̱ ɗenga̱ ba, sai a ayin a na a̱ya̱ ka̱kpa̱n ke te ka o kotsoi.) 6Aza a na Ka̱shile ka̱ ɗengusa̱i ukpisa̱ a ayin a nam pa i ta̱ a̱ ma̱za̱nga̱ mayun; ele uma a̱ ni a ɗa. I a kuna le a mala ma akina a na a̱ tsu kula̱ n ka̱nga̱ ka̱ farinwuta ba, ɗaɗa ukpa̱ u ire. Amma i ta̱ a kuyaꞋanka Ka̱shile tsugbashi n Kishi ku Uzagbi ka̱ ni an anan ganu, ka̱ta̱ a lyaꞋa tsugono n a̱yi ali a̱ya̱ ka̱kpa̱n ke te (1,000).

Ka̱shile ka lyaꞋi utsura u MalyaꞋi

7-8A̱ya̱ ka̱kpa̱n ke te a o kotso baci, kalingata ka ki ta̱ a̱ kuka̱sa̱kpa̱ MalyaꞋi mu uta̱ a̱ ubuta̱ u na wi ushiyi, ka̱ta̱ wu uta̱ u ya̱nsa̱ uma a na i uvishuwi a aduniyan kpa̱kuru. Iɗika i nam pa i ɗa e ci ɗeke Gogu m Mogogu. MalyaꞋi mi ta̱ o kuɓolongu le ra̱ka̱ a̱ ubuta̱ u na a kuyaꞋan kuvon. I ta̱ a kuyimkpa n a̱bunda̱i ali vuza wa kufuɗa we kece le ba. 9E pecuki vishuwi a aduniyan ɗa a kambuki ubuta̱ u uma a̱ Ka̱shile, ɗaɗa likuci i na u cigai. Amma ɗa akina uta̱i gaɗi ɗa a unai le. 10Ɗa a vakangi ɗe ka̱di n keneki ka aꞋuwa ka a mala ma akina a na a̱ tsu kula̱ n ka̱nga̱ ka̱ farinwuta, ɗa a vakangi kpamu Kalijani,† vuza na u ya̱nsa̱i uma a nam pa ra̱ka̱. Akina a i ta̱ a kuzuwa dem vi le a takacika kanna n kayin ko wanai.

Afada a ukocishi

11Ɗaɗa me enei kakuba ko tsugono ka̱ a̱ri ka na ki wanshi, ɗa me enei vuza na u da̱sa̱ngi a kaꞋa. Ana wu uta̱i, ɗa iɗika n gaɗi a lazai, babu vuza na u doku we enei le. 12Ɗa feu me enei a̱kpisa̱ ra̱ka̱ a kashani e kelime ka kakuba ka nan lo, azagbagbaꞋin n aza e kenkeꞋen. Ɗa a̱ ɓa̱yuwa̱i atagarda a̱ ubuta̱ u na a ɗanai ili ra̱ka̱ i na yaba dem u yaꞋin. Ɗa kpamu a̱ ɓa̱yuwa̱i katagarda ka aza wuma. A yaꞋankai a̱kpisa̱ ra̱ka̱ afada derere n ulinga u na a yaꞋin, uteku u na a ɗanai a atagarda a. 13Ɗa aza a na a̱ kuwa̱i a mala a banai ɗa a shamgbai e kelime ka kakuba ka adama a na Ka̱shile ka yaꞋanka le afada. Ukpa̱ n Ubuta̱ wu Ukpisa̱ a̱ uta̱ka̱i n a̱kpisa̱ a na i punu we ele, ɗa Ka̱shile ka yaꞋankai le afada derere n ulinga u na a yaꞋin. 14Ɗaɗa a vakangi Ukpa̱ n Ubuta̱ wu Ukpisa̱ a mala ma akina. (Mala ma akina ma ɗaɗa ukpa̱ u ire.) 15Vuza na baci de dem ka̱ta̱ a ɗanai kula ku ni a Katagarda ka Aza Wuma ba, a vakangi ni a mala ma akina.

Currently Selected:

Kene 20: asgNT

Highlight

Copy

Compare