Kene 19

Uma a na i gaɗi a cikpai Ka̱shile

1A ayin a na kalingata ku utsura ko kotsoi kuyaꞋan kadanshi, ɗa m panai kacaꞋa ka uma n a̱bunda̱i na ɗe gaɗi a̱ ka̱na̱i kusala:

“Cikpai Ka̱shile!

Wishi, n tsugbayin, n utsura u Ka̱shile ka̱ tsu u ɗa!

2Tsu na u ci neke uma a gbani-gbani atakaci mayun ɗa n derere kpamu.

U sheshe ta̱ ɗe tsu na u kuneke kashakanlai ka gbani-gbani atakaci,

vuza na u zuwai uma a aduniyan a yaꞋan unushi a̱ ubuta̱ u kuyaꞋan tsugbani n a̱yi.

Ka̱shile ka tsupa yi ta̱ adama a na wu una yi ta̱ agbashi.”

3Ɗa kpamu a salai:

“Cikpai Ka̱shile!

Ka̱nga̱ ku ulalau u na u songi likuci i gbayin ya

ka̱ ɗenga̱i a kubana gaɗi ali uteku n uteku!”

4Nkoshi m gba̱ra̱-gba̱ra̱ kamanga n aza a̱ na̱shi a nan lo koɓolo n ili i wuma i na̱shi ya a̱ kuɗa̱ngi kucikpa Ka̱shile, vuza na wi a̱ ida̱shi a kakuba ko tsugono. A danai, “Ta nannai! Cikpai Ka̱shile!”

Ka̱ɗiva̱ ko yolo i Ma̱giri

5Ɗa m panai vuma vi yoku e meɗevile a kakuba ko tsugono ka, a kudana:

“A̱ɗa̱ uma ra̱ka̱,

azagbagbaꞋin m muku dem,

a̱ɗa̱ na yi a kucikpa Ka̱shile ra̱ka̱ danai ni,

‘Ci neke wu ta̱ tsugbayin.’ ”

6Ɗa m panai izumgbi i ka̱bunda̱i ka uma ka gbangam na ɗe gaɗi o yoroli n kacaꞋa an mini ma na me ci yene n kurara n kakpanga ka gbayin. M panakai le a danai:

“Cikpai Ka̱shile!

Adama a na Vuzavaguɗu, Ka̱shile ka̱ tsu Uba̱nga̱ri, a̱yi ɗa Mogono!

7Ka̱sa̱kpa̱i ci yaꞋin ma̱za̱nga̱ n a̱bunda̱i.

YaꞋan ci cikpa tsugbayin ci ni!

Adama a na kanna ka yawa ta̱

ka na a kuyaꞋan yolo i Ma̱giri.

Vuka vu savu vi ni vu foɓuso ta̱ ɗe ka̱ci ka̱ ni adama a kaꞋa.

8Ka̱shile ke neke ta̱ ɗe vuka vu nan lo va a̱kumbula̱,

a ɗa i ta̱ ciɗa, a kutasa langu-langu.”

(A̱kumbula̱ a ɗaɗa ili i singai i na uma a̱ Ka̱shile a ci yaꞋan.)

9Ɗaɗa kalingata ka ka danai mu, “Ɗana ili i nam pa: Ka̱shile ki ta̱ e kuneke una̱singai wa aza a na a̱ ciya̱i a banuki le a̱ ubuta̱ u ka̱ɗiva̱ ko yolo i Ma̱giri.” Kalingata ka kpamu ka danai, “Ili i na Ka̱shile ka danai na mayun ɗa.”

10Ɗa n kuɗa̱ngi e kelime ka kalingata ka adama a na n cikpa yi, amma ɗa u danai mu, “A̱Ꞌa̱! Ka̱ta̱ vi cikpa mu ba! Mpa kagbashi kaꞋa tsu nu n tsa aza a na e nekei a̱ɗu e le kpamu, aza a na i o kutono mayun ra̱ka̱ i na Yesu wu uta̱ka̱i e keteshe. Cikpa Ka̱shile!”

Ili i mayun i na Yesu wu uta̱ka̱i e keteshe i ɗaɗa i zuwai uma a fuɗai a danai uma kadanshi ka̱ Ka̱shile.

Vuza na u kumbai kodoku ka̱ a̱ri

11Ɗa me enei gaɗi u ɓa̱yuwa̱i, kodoku ka̱ a̱ri ɗe kashani. Vuza na u kumbai kodoku ka e neꞋi ta̱ kula Ma̱riki m Mayun. U ci yaꞋan ta̱ afada a̱ ni mejege n kuvon kpamu nannai. 12A̱shi a̱ ni a kakana a̱ ubuta̱ tsa akina, a kaci ka̱ ni u ukai oroliko o tsugono n a̱bunda̱i. A ɗana ta̱ ɗe kula a ikyamba i ni, amma a̱yi ɗa koci vuza na u yevei ili i na kula ka ki a kudana. 13U ukai a̱kumbula̱ a na a̱ rumbuki nu mpasa. Kula ku ni ku ɗa “Kadanshi ka̱ Ka̱shile.” 14Osoji a̱ Ka̱shile a kumbai odoku a̱ a̱ri o kutono yi. A ukai a̱kumbula̱ a̱ a̱ri, ciɗa-ciɗa. 15Kotokobi ka alyu ka̱ uta̱i a̱ una̱ u ni, wi ta̱ a kuyaꞋan ulinga n kaꞋa adama a na u lyaꞋa iɗika kakau n kuvon. Wi ta̱ a kulyaꞋa tsugono we le n kalangu ka̱ viyum. Wi ta̱ o kuyotsongu le wupa u gbayin u Ka̱shile Uba̱nga̱ri a̱ ubuta̱ u kupisha umaci wu nɗanga a̱ ubuta̱ u na a ci yaꞋan ma̱kya̱n. 16Punu a kuminya ku na a palai ma̱kuta̱ ma̱ ni a ɗana ta̱:

MOGONO MO NGONO N VUZAVAGUƊU VA AZAGBAGBAꞋIN.

17Ɗa me enei kalingata kashani a kanna. Wo orukpoi n ka̱la̱ka̱tsu ka̱u adama a asakali a na i a ciꞋimkpi gaɗi: “Ta̱wa̱i! Gasai i lyaꞋa ilikulyaꞋa ya̱ a̱bunda̱i i ka̱ɗiva̱ i na Ka̱shile ki a̱ kula̱nsa̱ka̱ ɗa̱! 18Ta̱wa̱i! Takumai even a ikyamba yi ngono, n i na anan jagaba a gbagbaꞋin, koɓolo n osoji, koɓolo kpamu n odoku ali n aza a na a kumbai a ɗa. Ta̱wa̱i! Takumai ikyamba i uma ra̱ka̱: agbashi koɓolo n aza a na i agbashi ba, uma a na i azagbagbaꞋin n aza a na i azagbagbaꞋin ba!”

19Ɗa me enei ka̱di ka koɓolo nu ngono ma aduniyan ra̱ka̱, koɓolo n osoji e le, o ɓolongi adama a na a yaꞋan vishili n vuza na u kumbai kodoku ka n osoji a̱ ni. 20Ɗa a̱ ka̱na̱i ka̱di ka, koɓolo n keneki ka aꞋuwa vuza vu na u yaꞋankai ni ili i mereve. (U yaꞋan ta̱ ili i mereve i nan lo adama a na u ya̱nsa̱ aza a na i n urotu u ka̱di wa, ɗa kpamu a cikpai ka̱ma̱li ka̱ ni.) Ka̱di ka n keneki ka aꞋuwa ka, dem vi le a vakangi le n wuma a mala ma akina a na a̱ tsu kula̱ n farinwuta dem. 21Vuza na u kumbai kodoku ka ɗa wu unai osoji e le ra̱ka̱ n kotokobi ka na ka̱ uta̱i a̱ una̱ u ni. Ɗa asakali a ra̱ka̱ a takumai even a ikyamba ya ali a̱tsuma̱ e le a̱ cuwa̱i ɗa o okpoi ba̱fa̱-ba̱fa̱.

Currently Selected:

Kene 19: asgNT

Highlight

Copy

Compare