Kene 21

Gaɗi vu savu n iɗika i savu

1Ana kene ku Ka̱shile ku ukuna wa afada ku lazai, ɗa me enei gaɗi vu savu n iɗika i savu. Gaɗi vu cau n iɗika i cau a̱ puwa̱nka̱ ta̱, mala kpamu ma buwa lo ba. 2Ɗa me enei Likuci i Ciɗa i na Ka̱shile ka̱ suki i ɗaɗa Urishelima† vu savu, i ɗa a̱ kuta̱ gaɗi vu Ka̱shile a̱ kucipa̱ a iɗika. Likuci i savu ya yi ta̱ an vuka vu savu vu na a̱ ka̱ɓa̱nki amila e kujeꞋeke, u foɓuso ta̱ adama a na u cina vali vi ni vu na u kolo. 3Ɗa m panai vuza yoku e meɗevile ɗe gaɗi vu kakuba ko tsugono, a kudana, “Gogo na kpaꞋa ku Ka̱shile ku shana ta̱ n uma! Wi ta̱ a̱ kuda̱sa̱ngu n uma a̱ ni, ele kpamu i ta̱ o kokpo uma a̱ ni. Ka̱shile n ka̱ci ka̱ ni wi ta̱ o kuyongo n ele. Ka̱ta̱ kpamu wo okpo Ka̱shile ke le. 4Wi ta̱ kpamu a kura le kujilya ku na ki a̱ a̱shi e le dem. Vuza wi lo kpamu o kudoku wa̱ kuwa̱ ba. Vuza wi lo o kudoku wa yaꞋan una̱mgbuka̱tsuma̱ ba, ko ma̱shi a kupana mɓa̱la̱ n yoku ba. Ili i kuku dem i laza ta̱.”

5Vuza vi ida̱shi a gaɗi vu kakuba va u danai, “Inda! Mi ta̱ o kubonoko ili dem i savu!” Ɗa u danai mu, “Ɗana ili i nam pa ya, adama a na ili i nam pa ya mayun ɗa i ɗa i kuzuwaka utsura.”

6Ɗa u doku u danai, “N yaꞋan ta̱ ɗe ili i nam pa dem! Mpa ɗa Alfa n Omega.† Ɗaɗa feu, mpa ɗa Ugiti n Ukocishi. Mi ta̱ e kuneke yaba dem vu na wi n kakuli mini mo kusoꞋo ɗe a̱ ubuta̱ u na ka̱shi ka̱ mini ma wuma mi a̱ kuta̱. Ele a kutsupa ili ba. 7Aza a na a lyaꞋi i ta̱ a kisa ili i nam pa wa̱ va̱: Mi ta̱ o kokpo Ka̱shile ke le, ele tamkpamu o okpo muku n va̱. 8Amma uma a nam pa dem i ta̱ a kuꞋuwa a mala ma akina ma na ma̱ tsu kula̱ n ka̱nga̱ ka̱ farinwuta dem: Owovoni, n aza a na a̱ ka̱sa̱kpa̱i kutono mu, n aza a na o bonokoi ka̱ci ke le ili yu unata adama a̱ unushi u na a ci yaꞋansa, n aza a̱ ma̱ga̱la̱ka̱, n aza a tsugbani, n aza a̱ nkunu, n aza o kutono a̱ma̱li, n aza a aꞋuwa ra̱ka̱. Na va ɗaɗa ukpa̱ u ire.”

Urishelima vu savu

9Ɗa kalingata ka banai wa̱ va̱ ɗa ka danai mu, “Tono mu, mi ta̱ o kuyotsongu wu vuka vu savu vu Ma̱giri va.” (Kalingata ka nam pa a̱yi ɗa vuza te a̱ ka̱tsuma̱ ka aza e cindere a na a̱ ɓa̱na̱i akpanu e cindere a na i nu ndukpa̱ n cindere o ukocishi.) 10Ɗa Ayinviki a̱ Ka̱shile o tonoi nu mpa ɗa kalingata ka ɗikai mu a kubana a kusan ku na ku laꞋi n ugaɗi tile-tile. Ɗa u yotsongi mu Likuci i Ciɗa i na Ka̱shile ka̱ suki, i ɗaɗa Urishelima, a̱ kuta̱ gaɗi. 11Ɗa likuci ya i shanai n tsugbayin tsu Ka̱shile ɗa ya akanai n kutashi ku ulaɗi ki ili yu ushili m mini ma̱ a̱vuku tsa atali a ikebe,† an mindatsu ma na a urai ferere e kene ugboku u re dem. 12Mashilya mu utsura n ugaɗi ka̱u a kanzakai i ɗa. Mi ta̱ n utsutsu kupa n u re, utsutsu dem wi ta̱ n kalingata† a kinda u ɗa. A utsutsu wa ɗa a ɗanai ɗe ula u umaci kupa n u re wa aza a Israila, kula ku te dem a utsutsu wa. 13Kakambu dem ki ta̱ n utsutsu u tatsu: U tatsu a kasana, u tatsu gaɗi, u tatsu ɗaka, u tatsu kpamu a̱ ka̱livi. 14A maꞋa ta̱ mashilya a̱ ubirini a gaɗi va atali a gbagbaꞋin kupa n e re. A katali dem a ɗana ta̱ kula ku vuza te a̱ ka̱tsuma̱ ka azusuki kupa n aza e re a̱ Ma̱giri a.

15Kalingata ka na ki a kadanshi nu mpa, ɗa u ka̱na̱i kalangu ka na a yaꞋin n azanariya, adama a na u gisanku likuci ya n kaꞋa, n utsutsu m mashilya ma̱ ni dem. 16Ana u gisanki, ɗa u cinai adanshi akpati ɗa. Ugaɗi wa akambu, n kashani, n wanshi u ni dem u te u ɗa: Ugisanki wa ra̱ka̱ meli ka̱kpa̱n ke te n amangatawantawun (1,500).#21:16 Vuza u gita̱ baci a Agbara ɗa u banai Jos ɗa u yaꞋin nwalu mu ugaɗi nannai ali kutatsu, ta ugaɗi u mashilya me te ma̱ likuci ma mi nannai. 17Ɗa kalingata ka ka gisanki mashilya ma, tsu na vuma u kugisanku wanshi, ɗaɗa udashi amangatawenre n kupa n u ta̱li (216). 18A maꞋa ta̱ mashilya ma n atali a na i a kutasa langu-langu adanshi akina a shili a ɗa koɓolo m mini ma̱ a̱vuku. Ili dem a̱ likuci ya a yaꞋan ta̱ i ɗa n azanariya mayin a na i ciɗa ali kutashi ku uta̱i adanshi akina a ɗa a kakana a mindatsu ma. 19-20A maꞋakai n atali icuꞋu kakau kupa n e re,#21:19-20 Atali kupa n e re kakau a nam pa dem vi le, i ta̱ n ula icuꞋu kakau, n Tsugana e ci ɗeke le ta̱ nahannai: ka iyain yasfa, ke ire saffir, ka tatsu agat, ka̱ na̱shi zumurrudu, ka tawun onis, ka̱ ta̱li yakutu, ke cindere kirisolat, ka̱ kunla̱i beril, ka̱ kuci tofaz, ka kupa kirisofaras, ka kupa n ke te yakinta, katali ka kupa n e re ametis. dem vi le atali a ikebe a ɗa. O yoku a shili, o yoku kpamu an mini mo tsuloꞋo, o yoku an mini ma̱ a̱vuku, o yoku kpamu bulu an kokocilili.

21A̱ɓa̱ya̱ntsu a̱ utsutsu kupa n e re a i ta̱ ana nwaru mi ikebe. Utsutsu dem a yaꞋan ta̱ u ɗa m mawaru me te koci. Baya vu na vi punu a asuvu a̱ likuci a a yaꞋan ta̱ vu ɗa n azanariya a na i n tsuloboi ali a kakana n kutashi langu-langu tsu na mindatsu mi.

22Mpa n saꞋwa kene A̱Ꞌisa̱ a Gbayin a̱ likuci ba, adama a na Vuzavaguɗu Ka̱shile Uba̱nga̱ri m Ma̱giri ma o okpoi tsu A̱Ꞌisa̱ a Gbayin a nan lo. 23Likuci i nan lo ya kuciga kanna ko wotoi adama a na ya akana ba, adama a na tsugbayin tsu Ka̱shile tsu akana ta̱ ɗe, ɗa kpamu Ma̱giri ma akanai tsu na ma̱kuni ma tsu akana. 24Uma ra̱ka̱ a aduniyan i ta̱ o kuyongo n kutashi ku na ka kakana a̱ likuci ya. Ngono mi ta̱ a kubanka ɗe uciyi le. 25A̱ɓa̱ya̱ntsu a̱ likuci a o ci yongo ta̱ uɓa̱yuwi ayin tutu. A̱ tsu ɓa̱ya̱ngu a ɗa ba, adama a na kayin ki ɗe a̱ ubuta̱ wa ba. 26I ta̱ a̱ kutuka̱ n uciyi wa aduniyan koɓolo n ili i singai i uma a̱ likuci ya. 27A̱ tsu ka̱sa̱kpa̱ ili i gbani-gbani i uwa punu, ko aza a na a ci yaꞋan ili i wono, ko aza a na a ci yaꞋan aꞋuwa a uwa ɗe ba. Amma aza a na ula e le i uɗani a Katagarda ka Aza a Wuma ka̱ Ma̱giri, ele ɗa a tsu uwa punu.

Currently Selected:

Kene 21: asgNT

Highlight

Copy

Compare