Kene 14

Ma̱giri n uma a̱ ni

1Ɗaɗa me enei Ma̱giri ma kashani a Kusan ku Sihiyona.† Uma a a̱kpa̱n amangatawun n a̱kpa̱n amangere n a̱kpa̱n a̱ na̱shi (144,000) a shamgbai koɓolo n a̱yi. Uma a nam pa a ele ɗa aza a na a ɗanai punu a̱ a̱ca̱n n e le ula a Ma̱giri a n Esheku a̱ ni. 2M panai vuza a kadanshi a̱ Ka̱shile. Ka̱la̱ka̱tsu ka̱ ni ki ta̱ tsu na mini me ci yene n a̱bunda̱i ko kakpanga ka gbayin. KacaꞋa ka uma n a̱bunda̱i kaꞋa a kuwaꞋa umolu kpamu.

3Ɗa uma a̱kpa̱n amangatawun n a̱kpa̱n amangere n a̱kpa̱n a̱ na̱shi (144,000) a shamgbai ɗevu n kakuba ko tsugono ka, koɓolo n ili i wuma i na̱shi, nu nkoshi m gba̱ra̱-gba̱ra̱ ma. I a kuyaꞋan vishipa vu savu, babu vuza na u kuyeve vu ɗa, sai ele koci. A̱ ka̱tsuma̱ ka uma a aduniyan ra̱ka̱, ele ɗa aza a na a̱ ciya̱i wishi. 4Ele ɗa ali a na a̱ ka̱na̱i ka̱ci ka̱ le a̱ kpa̱ɗa̱i kuyaꞋan tsugbani, adama a nannai i ta̱ ciɗa. O yongoi o kutono Ma̱giri ma a̱ ubuta̱ u na baci u banai dem. Ele aza a̱ Ka̱shile a ɗa kpamu n aza a̱ Ma̱giri; i ta̱ ci ili ya avaꞋinka i na e ci neke Ka̱shile. 5A ci yaꞋan aꞋuwa ba, i kpamu n unushi ba.

Alingata a tatsu

6Ɗaɗa me enei kalingata ko yoku kau a kuyaꞋan ciꞋimkpi gaɗi ka̱u. A̱yi a kubana kudana Arabali a Singai† a na i babu uteku wa aza a na i punu o kuyongo a aduniyan, koɓolo n uma a iɗika dem, n umaci, n elentsu, n ka̱tsura̱ feu. 7Ɗa u dansai n ka̱la̱ka̱tsu ka̱u u danai, “U gaꞋan ta̱ i neke Ka̱shile tsugbayin, ka̱ta̱ i dansa tsu na tsugbayin ci ni ci. Adama a na ayin a yawa yi ta̱ a na wa yaꞋanka uma a aduniyan afada. Nekei ni tsugbayin, adama a na a̱yi ɗa vuza na u yaꞋin gaɗi n iɗika, mala n ubuta̱ u na a̱shi a̱ mini i a̱ kuwa̱.”

8Ɗaɗa kalingata ke ire ka imkpai gaɗi ka̱u tsu ka iyain ka a kudana, “Likuci i gbayin i Babila† i yikpa̱ ta̱! Na ɗa likuci i na tsugbani ci le tsu zuwai iɗika ra̱ka̱ yo okpoi ni nshinda̱. I ta̱ adanshi u neke le ta̱ ujari u tsugbani u ni, na wi ta̱ ta na a kuzuwa Ka̱shile ke neke le atakaci.”

9-10Ɗa kalingata ka tatsu ko tonoi le, a kusala, “Uma a na i ra̱ka̱ o kutono ka̱di n ka̱ma̱li ka̱ ni, i ta̱ a̱ kuciya̱ urotu u ka̱di wa a̱ a̱ca̱n e le ko e ekiye e le. Ka̱shile ki ta̱ a kuzuwa le ra̱ka̱ o soꞋo ma̱kya̱n ma wupa ma̱ ni. Ma̱kya̱n ma nam pa a satara maꞋa m mini ba, ɗa Ka̱shile a̱ ka̱ci ka̱ ni u tsuwa̱in maꞋa a mataꞋan ma atakaci ma̱ ni. Uma a nam pa i ta̱ o kusoꞋo atakaci a̱ kukula̱ an farinwuta ɗevu n alingata a ciɗa a̱ Ma̱giri. 11Akina a na e kuneke le atakaci a kusaꞋwa kukima̱ ba. Ele na i a kucikpa ka̱di n ka̱ma̱li ka̱ ni ɗa kpamu i n urotu u kula ku ni, atakaci o kukotso we le ba, ko kenu.” 12Ili i na ili i nam pa yi a kudana i ɗaɗa uma a̱ Ka̱shile e reme a̱ɗu. Na ele ɗa uma a na o tonoi wila̱ u Ka̱shile ɗa o tonoi Yesu mayun.

13Ɗa m panai ka̱la̱ka̱tsu ka zuva a kudana, “Ɗana ili i nam pa: Aza a̱ ma̱za̱nga̱ a ɗa, aza a na a̱ kuwa̱i punu a̱ ubuta̱ u kutono Vuzagbayin gogo na ali a kubana a uteku.”

Ayinviki a̱ Ka̱shile a̱ ushuki, “E, i ta̱ a kuvuka adama a ulinga wa atakaci u le, ka̱ta̱ arabali a ulinga u singai u le u tono le.”

KukyaꞋa ki ili i vikyaꞋa a iɗika

14Ɗa mi indanai, ɗa me enei keleshu ka̱ a̱ri. Ili an vuma a̱ ida̱shi e keleshu ka. Wi ta̱ n oroliko o tsugono a azanariya wa alai a kaci ɗa u ka̱na̱i makaun ma alyu e kukiye ku ni. 15Ɗa kalingata ko yoku kpamu kau ku uta̱i a̱ A̱Ꞌisa̱ a Gbayin ɗa u salai n ka̱la̱ka̱tsu ka̱u u vuza na wi ida̱shi e keleshu ka, “Gita̱ kukana m makaun ma̱ nu. Ili i na va kukana a iɗika gogo na i geꞋwe ta̱, gogo na ayin o kuɓolongu le a yawa ta̱.” 16Ɗaɗa vuza na wi ida̱shi e keleshu u ukai makaun ma̱ ni ɗa u kanai ili i vikyaꞋa a iɗika ya.

17Ɗaɗa me enei kalingata ke ire ka ku uta̱i a̱ A̱Ꞌisa̱ a Gbayin na ɗe gaɗi, wi ta̱ feu m makaun ma alyu. 18Ɗa kpamu kalingata ka tatsu, ka na ki n utsura wa akina, wu uta̱i a̱ ubuta̱ u katalikalyuka. Kalingata ka nam pa ke ɗekei kalingata ke ire, ɗa u danai, “Ɗika makaun ma alyu ma̱ nu ka̱ta̱ vu kana umaci wu nɗanga wa punu a ashina a iɗika a, adama a na umaci u ni u geꞋwe ta̱.”

19Ɗa kalingata ka ka ukai makaun ma̱ ni punu a iɗika. U ɓolongi umaci wu nɗanga wa, ɗa u tsungi u ɗa a̱ ubuta̱ u gbayin u na a kupisha le. Na ɗa tsu na wupa u Ka̱shile wi a ayin a na baci u takacikai aza a unushi. 20Umaci wa a tsu pisha ta̱ u ɗa pulai vi likuci, ɗa mpasa n tsuwa̱in a̱ ubuta̱ u kupisha wa n a̱bunda̱i an kuyene ku na ku yawai ugaɗi meli amangatawenre (200) n uga̱vi u na u yawai ɗevu n udashi u tawun.

Currently Selected:

Kene 14: asgNT

Highlight

Copy

Compare