Kene 13

Ka̱di ka na ku uta̱i a mala

1A̱ ubuta̱ u kene u va̱, ɗa me enei ka̱di a̱ kuta̱ a mala. Wi ta̱ n aci e cindere n avana kupa. Kavana dem ki ta̱ n oroliko e kenu gaɗi vi ni. Kaci dem a ɗana ta̱ ɗe kula ki ishikushi i Ka̱shile 2Ka̱di ka nam pa ko yotso ta̱ kanama, amma ene a̱ ni an manama ma kakamba ma na e ci ɗeke biya.#13:2 Ene a biya i ta̱ ugaɗi n cileme, wi ta̱ n a̱kutsulu a ugaɗi kpamu. Wi ta̱ feu n una̱ an u kawu. Vungu va vi nekei ka̱di ka utsura derere n u ni, n kakuba ko tsugono n tsugono kpamu.

3Kaci ke te ka̱ ka̱di ka an kalana ku usa̱n ka na ka yawai ku una yi, amma usa̱n wa u ta̱na̱ ta̱ ɗe. Yaba dem a aduniyan u yaꞋin mereve ma̱ ka̱di ma. 4Ra̱ka̱ vi le a cikpai vungu va, vuza na u nekei ka̱di ka utsura u ni. Ɗa feu a cikpai ka̱di ka ɗa a danai, “Vuza wi lo tsu ka̱di ka nam pa ba! Vuza wi lo a̱ kushilika̱ n a̱yi ka̱ta̱ u lyaꞋa yi utsura ba.”

5Ka̱shile ka̱ ka̱sa̱kpa̱i ka̱di ka ka yaꞋan a̱ra̱ɗi n utsura u ni ka̱ta̱ tsu nam pa u shika yi kpamu. Ka̱shile ka̱ ka̱sa̱kpa̱ yi ta̱ u ciya̱ utsura u tsugono ali wotoi amangere n u re. 6Ɗa u gita̱i kushika Ka̱shile. U shikai feu kula ku Ka̱shile, n ubuta̱ u na wi o kuyongo, n aza a na i gaɗi ra̱ka̱. 7Ka̱shile kpamu ka̱ ka̱sa̱kpa̱i ni u shilika̱ n uma a̱ ni ka̱ta̱ u lyaꞋa le utsura. E nekei ni feu utsura u na u laꞋi uma a iɗika dem, n umaci, n elentsu, n ka̱tsura̱ feu. 8Yaba dem a aduniyan wi ta̱ kucikpa yi, saidei aza a na a ɗanai ula e le a Katagarda ka Aza a Wuma kafu a yaꞋan aduniyan. Katagarda ka nan lo ka̱ Ma̱giri kaꞋa ka na a unai.

9Vuza na wi n atsuvu dem u pana.

10Vuza na dem Ka̱shile ke sheshei a̱ ka̱na̱, i ta̱ a̱ kuka̱na̱ yi.

Vuza na dem Ka̱shile ke sheshei a una n kotokobi,

i ta̱ a kuna yi.

Ili i nam pa ya uma a̱ Ka̱shile a̱ lulukpa̱,

ka̱ta̱ kpamu a yaꞋan n uneki u ka̱ɗu.

Ka̱di ke ire

11Ɗaɗa me enei ka̱di ko yoku ku uta̱i a iɗika. Wi ta̱ n avana e re an a̱ ma̱giri, ɗa u yaꞋin kadanshi n ka̱la̱ka̱tsu ka̱ vungu. 12Ka̱di ka nam pa ka ka shamgbai a̱ ubuta̱ u ka̱di ka iyain ka, ɗa u yaꞋin ulinga n icuꞋu yu utsura u na ka̱di ka iyain ka ki n u ɗa. N utsura u nam pa u ɗa u tsu zuwa yaba dem vu na wi a aduniyan u cikpa ka̱di ka iyain ka, vuza na wi n usa̱n wu ukpa̱ u na u ta̱na̱i ɗe. 13Ka̱di ke ire ka ka yaꞋin ili i mereve i gbagbaꞋin. Ali u zuwai akina a̱ uta̱ gaɗi ka̱ta̱ a̱ ta̱wa̱ a aduniyan, uma e kene. 14Ka̱shile ka̱ ka̱sa̱kpa̱i ka̱di ke ire ka yaꞋan ili i mereve a̱ a̱shi a̱ ka̱di ka iyain. Adama a ili i mereve i nam pa ɗa u fuɗai u zuwai uma a aduniyan ra̱ka̱ a̱ puwa̱nka̱. U zuwai le a yaꞋan ka̱ma̱li ka̱ ka̱di ka iyain ka, vuza na a unai n kotokobi amma ko n nannai ɗa u bonoi n wuma. 15Ka̱shile ka̱ ka̱sa̱kpa̱i ka̱di ke ire ka zuwa ka̱ma̱li ka̱ ka̱di ka iyain ka ko okpo n wuma, adama a na ka yaꞋan kadanshi ka̱ta̱ ka zuwa le a una yaba dem vu na u iwain kutono yi. 16A gutsai uma ra̱ka̱ a zuwa urotu e ekiye a usingai e le ko a̱ a̱ca̱n, vuzagbayin ko vuza vi kenu, vuza vu uciyi ko vuza vu unambi, kagbashi ko vuza vi ida̱shi i ka̱ci ka̱ ni. 17Aza a na i n urotu u nam pa koci ele ɗa a kutsula ko e denge. Urotu u nam pa u ɗa kula ku ka̱di ka ko lamba vu kula va.

18Sai vi n kuyeve ka̱ta̱ vi yeve lamba vu ka̱di va! Amma vi baci n kuyeve gogo vi ta̱ e kuyeve ili i nam pa. Lamba vi ni vu ɗaɗa amangatawa̱nta̱li n amangatatsu n ta̱li (666), lamba va kpamu vuza ɗa.

Currently Selected:

Kene 13: asgNT

Highlight

Copy

Compare