Kene 15

Alingata nu ndukpa̱ mu ukocishi

1Ɗa me enei urotu u gbayin u yoku na ɗe gaɗi u na u nekei yaba dem ili i mereve. Alingata e cindere a̱ kuɓa̱na̱ ndukpa̱ n cindere mu ukocishi. A ayin a na baci Ka̱shile ko kotsoi kutakacika uma nu ndukpa̱ n cindere ma, wi ta̱ a̱ kuka̱sa̱kpa̱ kuyaꞋan wupa. 2Ɗaɗa me enei ili i na yi an mala a kutasa an mindatsu ma na a urai ferere usatari n akina. Ɗa kpamu me enei aza a na a lyaꞋi utsura u ka̱di, vuza na a ɗanai kula ku ni n lamba, n ka̱ma̱li ka̱ ni. Ele kashani a uɓon u mala ma mindatsu, a̱ kuɓa̱na̱ umolu u na Ka̱shile ke nekei le. 3Ɗa a yaꞋin vishipa vu na Musa kagbashi ka̱ Ka̱shile, u yaꞋin n vishipa vu na Ma̱giri ma yaꞋin, a danai,

“Avu, Ka̱shile Uba̱nga̱ri,

vi yaꞋan ta̱ ulinga u gbagbaꞋin u mereve.

Vi ta̱ o tsugono a iɗika ra̱ka̱.

Ili i na vi yaꞋin dem i mayun i ɗa n yu ugaꞋin kpamu.

4Yaba dem u kuneke wu ta̱ tsugbayin, Vuzavaguɗu!

Uma dem a kudana ta̱, ‘Vi ta̱ n tsugbayin n utsura.

Vuza ciɗa wi lo ba, sai avu.

Uma a aduniyan ra̱ka̱ a̱ kuta̱wa̱ ta̱ ka̱ta̱ a cikpa wu.

Yaba dem we ene ta̱ ili i yu usuɓi i na vi yaꞋin.’ ”

5-6Ɗaɗa me enei ɗe gaɗi, alingata e cindere a na i a̱ kuɓa̱na̱ ndukpa̱ n cindere ma a̱ kuta̱ punu asuvu o Mololo ma Ciɗa† punu a̱ Ma̱va̱li ma̱ Ka̱shile. Yaba dem u ukai ntogu ma̱ a̱ri n na mi a kutasa, koɓolo n kakashi ka kuminya ka azanariya ulapangi a̱ ma̱ka̱nga̱ ma̱ ni. 7Vuza te a̱ ka̱tsuma̱ ki ili i wuma i na̱shi ya i nekei kalingata dem kakpanu ka azanariya ka na ki tukpa n atakaci a gbayin a̱ Ka̱shile, vuza vu wuma ko wanai n ko wanai, a na a̱ kutsungu a aduniyan. 8Ɗa Mololo ma Ciɗa ma, ma shanai n ka̱nga̱ ka na ku uta̱i a̱ ubuta̱ u tsugbayin n utsura u Ka̱shile. Vuza wi lo u fuɗai u uwai a̱ Ma̱va̱li ma̱ Ka̱shile ma ba, sai a ayin a na ndukpa̱ n cindere n na alingata e cindere a̱ tuka̱i va n kotsoi.

Currently Selected:

Kene 15: asgNT

Highlight

Copy

Compare