Luka 6:27-49

Yesu u lyaꞋi kelime, “A̱ɗa̱ vu na yi a kupanaka mu, mi ta̱ a kudana ɗa̱: Cigai irala i ɗa̱, yaꞋankai aza a na a iwain ɗa̱ kasingai. Aza a na a yaꞋankai ɗa̱ una̱, yaꞋankai le una̱singai. YaꞋankai aza a na i a kushika ɗa̱ kavasa. Vuza u ɓasa wu baci a maguji me te, sabaꞋaka yi maguji ma na ma buwai. Vuza na baci u fa̱ba̱na̱i nu kalaba, ka̱ta̱ vu sa̱nka̱ yi ba, neke yi ali m motogu ma̱ nu. Vuza na baci we ecei nu ili dem, neke yi i ɗa. Vuza u fa̱ba̱na̱ wu baci ili, ka̱ta̱ vu bana vi isa i ɗa ba. YaꞋankai uma ili i na yi a kuciga uma a yaꞋanka ɗa̱. “A̱ɗa̱ yi baci a kuciga aza a na i a kuciga ɗa̱ koci, yi ɗa̱i katsupu ka̱ ɗa̱? Ko aza a̱ unushi ta a ci yaꞋan nannai. Yi baci a kuyaꞋan kasingai wa aza a na i a kuyaꞋanka ɗa̱ kasingai koci, te ɗai ili i mereve yi? Ko aza a̱ unushi a ci yaꞋan ta̱ nannai. I neke baci okopu a̱ ubuta̱ wa aza a na a kutsupa ɗa̱ koci, te kasingai ka na yi a kuyaꞋanka uma? Aza a̱ unushi feu ta a ci yaꞋankpanai nannai, adama a na i ta̱ e kukeɗe a̱pa̱Ꞌa̱ we le. Cigai irala i ɗa̱. YaꞋankai le kasingai. Nekei le okopu, ka̱ta̱ i la̱nsa̱ ili i yoku we le ba. Katsupu ka̱ ɗa̱ kpamu ki ta̱ a kuyimkpa, yi ta̱ o kokpo muku m MalaꞋimili, adama a na a̱yi vuza na u ci yaꞋanka uma kasingai ɗa, aza a asuvu a wuya n aza a na a̱ tsu kpa̱ɗa̱ kucikpa ili. Panai asuvayali uteku u na Esheku a̱ ɗa̱ feu u tsu pana asuvayali a uma.” Yesu u lyaꞋi kelime, “Ka̱ta̱ i yaꞋanka vuza afada ba, ciya̱ vuza kpamu u kuyaꞋanka ɗa̱ afada ba. Ka̱ta̱ yi ilukpa̱ vuza ba, ciya̱ vuza kpamu wi ilukpa̱ ɗa̱ ba. Cinukpakai n unushi wi itoku i ɗa̱, ka̱ta̱ feu a cinukpaka n u ɗa̱. Nekei, ka̱ta̱ feu e neke ɗa̱: ali mudu ushani mayin, ka̱ta̱ a̱ za̱ka̱tsa̱ o doku a dyanuku u yaꞋan tororo ali u ɓarakpa, ka̱ta̱ a̱ tsunku ɗa̱ a aburuma. Mudu vu na i kunzuki vu ɗaɗa feu a̱ kukunzuku ɗa̱.” Ɗa Yesu u doku u yaꞋankai le agisana a kadanshi o yoku, u danai, “Ka̱yimba̱ ki ta̱ a kufuɗa ko rono ka̱yimba̱? Ele aza e re e le dem i ta̱ a kuyikpa̱ a̱ ka̱wa̱wa̱. KapiꞋishi ka tsu laꞋa malum ma̱ ni ba. U piꞋisa baci mayin, wi ta̱ o kokpo uteku tsu malum ma̱ ni. “Adama a̱ iya̱n a ɗai ɗa vi a kinda ili i picici i na yi a̱ ka̱shi ka vuza nu? Amma kogboli kaꞋa punu a̱ ka̱shi ka̱ nu, vi keɓece n kaꞋa ba. Nini ɗai va kufuɗa va dana vuza nu, ‘Vuza va̱, yaꞋan n takpaka wu ili i na yi punu a̱ ka̱shi ka̱ nu.’ Amma avu ve ene kogboli ka na ki a̱ ka̱shi ka̱ nu, ka̱ta̱ vu takpa kaꞋa ba. Avu vuza vu kapalaka̱shi, takpa biꞋi ka̱ nu. Adama a na ve ene i na yi a̱ ka̱shi ka vuza nu mayin, ka̱ta̱ vu takpa i ɗa.” Yesu u lyaꞋi kelime, “Maɗanga ma singai ma tsu matsa umaci u gbani-gbani ba. Maɗanga ma gbani-gbani kpamu ma tsu matsa umaci u singai ba. Adama a na maɗanga dem e ci yeve yi ta̱ a̱ ubuta̱ wu umaci u ni. Va kutaꞋa ma̱biri a maɗanga ma awana ba, ko ma̱ɗimbi† ma kumatsa o kokovu ba. Vuma vu singai kpamu u ci yaꞋan ta̱ ili i singai uteku u na ka̱ɗu ka̱ ni ki. Vuza vu gbani-gbani kpamu u ci yaꞋan ta̱ ili uteku u na wi. Ili i na yi a̱ ka̱ɗu ka vuza i ɗaɗa u tsu dansa.” Yesu u lyaꞋi kelime, “Yi ɗa̱i i zuwai ɗa yi e kuɗekeshe mu ‘Vuzagbayin, Vuzagbayin,’ amma yi a kuyaꞋan ili i na n danai ɗa̱ i yaꞋan ba? Mi ta̱ o kuyotsongu ɗa̱ uteku u na wi: Vuza na baci wi a̱ kuta̱wa̱ wa̱ va̱, wi kpamu a kupana kadanshi ka̱ va̱, n u yaꞋin kaꞋa, wi ta̱ an vuza na wi a kuyaꞋan kumaꞋa ku kpaꞋa, ɗa u ga̱va̱i ɗa u varai kumaꞋa ka a gaɗi vu kakpanlai. Ana kuɗolu ku lyaꞋi, ɗa mini ma, ma cigai kuvaruku kunu ka, amma ku ɗa ku yikpa̱ ba, adama a na a maꞋa ta̱ ku ɗa mayin. Amma, vuza na baci u panai kadanshi ka̱ va̱, ɗa u kpa̱ɗa̱i kutono kaꞋa, wi ta̱ an vuza na u maꞋi kpaꞋa ku ni a gaɗi vu kayala, u ga̱va̱ a na wa cina ubuta̱ u kakpanlai ba. Mini ma yawa baci lo gaji, ma saꞋwai sai kuyikpa̱, ka̱ta̱ ku ɓoso wuya-wuya.”