Aza a Ibrahim 9

Wila̱ u kuku adama a kucikpa Ka̱shile

1Punu a uzuwakpani† u iyain u nan lo u na Ka̱shile ka yaꞋin n aza a Israila, u dana ta̱ uma uteku u na a kuyaꞋan kucikpa derere, ɗa kpamu u danai le uteku u na a kuyaꞋan Ma̱va̱li ma̱ Ka̱shile, a̱ ubuta̱ u na a kucikpa yi. 2A yaꞋin Ma̱va̱li ma na e pecuki nlolo e re. Punu asuvu o mololo ma iyain a zuwai kashamkpatsu ka̱ ma̱kuni koɓolo n kirikpa m burodi vu na e nekei u Ka̱shile. E ɗeke ta̱ mololo ma nam pa ma Mololo ma Ciɗa. 3Kakashi ka na a palakai utsutsu wa ki ta̱ lo ka na ke pecei nlolo n re ma. E ɗeke ta̱ kunu ku ire ka Mololo ma na ma LaꞋi n Ciɗa. 4Punu asuvu o mololo ma nan lo ma ta punu katalikalyuka† ki ka na a paɗai n azanariya, a̱ ubuta̱ u na o tsu songu ili i ma̱gula̱ni.† Punu o mololo ma Akpati vu Uzuwakpani† vu maɗanga vi ta̱ punu, vu na a paɗai n azanariya a akambu ra̱ka̱. Punu asuvu a Akpati vu Uzuwakpani va ili i tatsu yi ta̱ punu: Ili i iyain i na yi punu i ɗaɗa ma̱diki ma azanariya ma na a shatangi m mana.† Ili i ire punu i ɗaɗa kalangu ka Haruna† ka na ko topoi. Ili i tatsu i na yi punu i ɗaɗa nshemberu ma atali n Wila̱ Kupa wa a uɗani gaɗi vi le. 5Gaɗi va Akpati va, ta ɗe a yimai ili i wuma i re ye evelyu i na i yotsongi a na Ka̱shile ki lo.#9:5 A yima ta̱ ili ye evelyu i re i nam pa n azanariya. N Tsugana e ci ɗeke le ta̱ “kerobobi”. E petikpei evelyu e le gaɗi vu kapalatsu ka Akpati ka, a̱ ubuta̱ u na Ka̱shile ka cinukpakai n unushi. Amma tsa kufuɗa tsa dansa ili dem adama a ukuna u nam pa gogo na ba.

6Ayin a na baci o kotsoi kufoɓuso ili dem tsu nam pa tsa, anan ganu a tsu uwa ta̱ punu o mololo ma iyain a kanna dem adama a na a yaꞋan ulinga u le. 7Amma mogono ma anan ganu endeꞋen ma ɗa ma tsu uwa asuvu o mololo me ire ma, u ci yaꞋan ta̱ ta na feu nannai va kute a̱ ka̱ya̱ dem. U tsu uwa o Mololo ma na ma LaꞋi n Ciɗa va babu u ɗika mpasa a kuꞋuwa ba. U tsu lyuka ta̱ mpasa ma u Ka̱shile adama a unushi u ka̱ci ka̱ ni, n adama a unushi u na uma a yaꞋin babu e yeve ayin a na a yaꞋin u ɗa. 8Ayinviki a̱ Ka̱shile a yaꞋin ulinga n ili i nam pa adama a na i yotsongu a na Wila̱ koɓolo m Ma̱va̱li a buwa baci lo a kuyaꞋan ulinga u le, uye a kuꞋuwa o Mololo ma na ma LaꞋi n Ciɗa a̱ kuɓa̱yuwa̱ u ɗa ba.

9Na va agisana a ɗa adama a ayin o gogo na. U yotsongu ta̱ a na kuneꞋe n alyuka† a na a lyukai a̱ kukpa̱ɗa̱ kuzuwa ka̱ɗu ka vuza na u yaꞋin kucikpa ko okpo ciɗa tsu na u yotsoi. 10Wila̱ u nam pa adama a ukuna u kulyaꞋa n kusoꞋo n iza̱Ꞌa̱shi i ɗa koci. Wila̱ wi ikyamba u ɗa, ɗa Ka̱shile ka zuwai uma o tono u ɗa ali sai a ayin a na a yaꞋin uye u savu.

Mpasa n Kirisiti Kishi

11Amma Kirisiti Kishi ɗa gogo na wo okpoi mogono ma anan ganu a̱ ubuta̱ wi ili i singai ra̱ka̱ i na i ta̱wa̱i ɗe. U uwa ta̱ ɗe a̱ ubuta̱ u gbayin u kucikpa na ɗe gaɗi u na u laꞋi n ugaꞋin. Ekiye a uma a ɗa a yaꞋin u ɗa ba, u ɗa wi punu a aduniyan a nam pa feu ba. 12Kute adama a ayin dem, u ɗikai alyuka a mpasa u ukai punu asuvu o Mololo ma na ma LaꞋi n Ciɗa ma nan lo, amma mpasa mu nlala nu ndendem n ɗa ba. U ɗikai mpasa n ni, ana u yaꞋin nannai kpamu, ɗa u ciya̱ka̱i tsu wishi u na u kukpa̱ɗa̱ kukotso.

13N ayin a cau, ana uma a nusai, ikyamba i le yo okpo ta̱ ciɗa ana anan ganu a zazakai le mpasa mu nlala m mo obomburon, ɗa a̱ bula̱ngi kpamu kokomo ka na e kenuki a̱ ubuta̱ u kusongu mashan ma kanaka. 14Amma Kishi u yaꞋan unushi ba, ko kenu, amma ɗa u nekei ka̱ci ka̱ ni tsa alyuka u Ka̱shile a̱ ubuta̱ wa Ayinviki a na i n wuma ko wanai. Ɗaɗa i zuwai mpasa n ni n laꞋi n utsura ka̱u ɗa n zuwai a̱ɗu a̱ tsu o okpoi ciɗa a̱ ubuta̱ wi ili i na i tsu tuka̱ n ukpa̱. Gogo na ci ta̱ a kufuɗa tsa yaꞋanka Ka̱shile ka wuma tsugbashi!

15Na va ɗaɗa ili i na i zuwai ɗa Kishi wo okpoi vuza na u foɓusoi uzuwakpani u savu, ka̱ta̱ aza a na Ka̱shile ke ɗekei a̱ ciya̱ a isa una̱singai u na u kukpa̱ɗa̱ kukotso, u na Ka̱shile ka yaꞋin uzuwakpani. I ta̱ a kufuɗa kuyaꞋan ili i nam pa adama a na Kishi u kuwa̱ ta̱ ɗa u nekei uma uba̱ruwi† adama a unushi u na a yaꞋin ele biꞋi o kutono uzuwakpani u iyain wa.

16Uzuwakpani tsu nam pa wi ta̱ tsu vuma vu na u ɗanai e kepepa uteku u na u cigai e pecuku udukuyan u ni ayin a na baci u kuwa̱i. Amma i ta̱ a kufuɗa kupecuku ucanuku wa koci a ayin a na baci yaba dem u yevei vuma u kuwa̱ ta̱. 17Kepepa ka ki ta̱ n utsura koci a ayin a na baci vuza na u ɗanai kaꞋa u kuwa̱i. Ko vuza wa kufuɗa wa kisa ili i yoku ba, vuza wi baci n wuma biꞋi. 18I ɗaɗa i zuwai ko uzuwakpani u iyain wa u gita̱ ba, sai nu mpasa koci n na n kuyotsongu ukpa̱.

19A̱ ugiti, Musa u danai uma ra̱ka̱ kadanshi ku utsura dem ka na ki punu a̱ Wila̱. Ɗaɗa u tonoi n kuɗika mpasa mu ndendem nu nlala ɗa u satarai n ɗa m mini. Ɗa u ɗikai cileme tsu mokyon tsu na ci urumbuki ushili m menju ma mashanaka† adama a na u zaza n ɗa a katagarda ka̱ Wila̱ ka n uma ra̱ka̱. 20U danai, “Na va ɗaɗa mpasa n na n yaꞋankai uzuwakpani u na Ka̱shile ke nekei ɗa̱ kadanshi ku utsura i tono.” 21Tsu nan lo tsu ɗa feu, Musa u zazai mpasa a̱ Ma̱va̱li ma̱ Ka̱shile† n ili ra̱ka̱ i na a ci yaꞋanka ulinga a̱ ubuta̱ u kucikpa. 22Wila̱ u dana ta̱ ili ra̱ka̱ sai a zazaka i ɗa nu mpasa ka̱ta̱ i ɗa i ciya̱ yo okpo ciɗa. Ka̱shile feu ki a kucinukpaka n unushi babu mpasa n na n kuyotsongu ukpa̱ ba.

Ukpa̱ u Kishi u tsu takpa ta̱ unushi

23Ili i nan lo ya i ɗa i zuwai le a takpa nshinda̱ m Ma̱va̱li ma̱ Ka̱shile n ili i na yi punu dem nu mpasa mu nnama. Ili i nam pa ya iyoci ɗa koci yi ili i na yi ɗe gaɗi. Amma alyuka a na a takpai nshinda̱ mi ili i mayun i na yi ɗe gaɗi a laꞋa ta̱ alyuka a nnama. 24Kishi u uwa asuvu o Mololo ma na ma LaꞋi n Ciɗa ma na uma a yaꞋin ba, adama a na iyoci i ɗa koci i mololo ma mayun. U uwai punu asuvu a gaɗi a, wi ta̱ ɗe kpamu n Ka̱shile gogo na adama a na u ɓa̱nka̱ tsu. 25U uwa kpamu gaɗi adama a na u doku u lyukasa ka̱ci ka̱ ni kpamu ba, tsu mogono ma anan ganu ma aduniyan ma na ma tsu uwa o Mololo ma na ma LaꞋi n Ciɗa a̱ ka̱ya̱ dem adama a na u lyuka mpasa m manama. 26Ishi baci u lyuka ka̱ci ka̱ ni ka̱ya̱ dem, wi ishi ta̱ a kutakacika a ayin n a̱bunda̱i ali n ayin a na a yaꞋin aduniyan. Amma gogo na ɗevu n uteku, ɗa u kucikpa u ta̱wa̱i kute adama a ayin dem, adama a na u takpa utsura wu unushi ko wanai ana u kuwa̱i tsa alyuka adama a̱ tsu. 27Mayun ɗa yaba dem u kuwa̱ kute, ka nan lo ka yaꞋan baci ka̱ta̱ Ka̱shile ka yaꞋanka le afada. 28Adama a nannai Kishi u kuwa̱i kute koci adama a na u takpa unushi u uma n a̱bunda̱i. Amma u ta̱wa̱ baci kpamu, adama a kutakpa unushi a ɗa kpamu ba. Wi ta̱ a̱ kuta̱wa̱ adama a na wi isa yaba dem vu na wi a kuvana yi.

Currently Selected:

Aza a Ibrahim 9: asgNT

Highlight

Copy

Compare