Aza a Ibrahim 10
10
Alyuka i lo kpamu ba
1Wila̱ u Musa wi ta̱ ci iyoci yi ili i singai i na i kuta̱wa̱. Iyoci i nam pa ya i ɗaɗa ili i mayun ya ba, adama a na i ɗa ya kufuɗa kuzuwa uma a yaꞋansa tsu na wu untsai ba, ko ishi a yaꞋan alyuka ka̱ya̱ dem. 2Wila̱ wa u fuɗa baci u zuwa le o okpo ciɗa uteku u na u yotsoi a yaꞋan, ishi ta̱ a̱ kuka̱sa̱kpa̱ kuyaꞋan alyuka a. Ka̱shile ki ishi ta̱ a̱ kuza̱Ꞌa̱ unushi wa aza a na i a kuyaꞋan kucikpa kute adama a ayin dem, ka̱ta̱ ta na a̱ɗu e le o okpo babu wono. 3Amma ta nannai ba! Alyuka a nam pa a tsu zuwa le ta̱ a ciɓa n unushi u le ka̱ya̱ dem. 4Ili i na i zuwai i ɗaɗa mpasa mo obomburon nu nlala mi a kufuɗa ma takpa unushi ba.
5I ɗaɗa i zuwai ana Kirisiti Kishi u ta̱wa̱i a aduniyan, u danai Ka̱shile,
“Vi a kuciga alyuka a nnama n e kuneꞋe ki ica̱Ꞌa̱shi ba.
Amma vi neke mu ta̱ ikyamba adama a na m panaka wu.
6Nnama n na o songi a katalikalyuka
n alyuka adama a unushi o yokpo wu ba.
7Ɗa n danai Ka̱shile, ‘Mpa ɗa na,
n ta̱wa̱ ta̱ adama a na n yaꞋan ili i na vi cigai,
uteku u na a ɗanai adama a̱ va̱ a Katagarda ka Ciɗa.’ ”#Ishp. 40:6.
8Punu a Katagarda ka Ciɗa ka nam pa u dana ta̱ a̱ ugiti biꞋi, “Vi a kuciga alyuka n kuneꞋe ba. Vi a kuciga alyuka o kusongu n kuneꞋe ku na ka kutakpa unushi ba. Ili i nan lo i yokpo wu ba.” (Ko a na ili i nam pa i ɗaɗa alyuka a na Wila̱ u danai u gaꞋin a yaꞋan.) 9Ɗa u danai, “Mpa ɗa na, Ka̱shile, n ta̱wa̱ ta̱ adama a na n yaꞋan ili i na vi cigai.” Ɗa Ka̱shile ko gboroi alyuka a̱ kuku a ra̱ka̱, ɗa u zuwai alyuka a̱ Kishi a̱ una̱ u wa a ɗa. 10Adama a na Yesu Kirisiti Kishi u yaꞋin ili i na Ka̱shile ka cigai ni u yaꞋan, ɗaɗa ci ciya̱i tso okpoi ciɗa ra̱ka̱ a̱ ubuta̱ wu unushi, adama a na u yaꞋan ta̱ alyuka a n ikyamba i ni kute n adama a ayin dem.
11N ayin a cau, anan ganu a yaꞋansa ta̱ ulinga u le a kanna dem, ɗa a lyaꞋi kelime n kulyuka alyuka a na a kufuɗa kutakpa unushi ba. 12Amma Kishi ke neke ta̱ ka̱ci ka̱ ni tsa alyuka a na a untsakai ko wanai. Gogo na wi ta̱ ɗe a̱ ida̱shi e kukiye ku usingai ku Ka̱shile. 13Wi ta̱ kpamu o kuyongo ɗe ali Ka̱shile ka zuwa irala i ni ɗaka vu utsura u ni. 14N alyuka e te a nan lo, u bonokoi uma ciɗa uteku u na u gaꞋin o yongo ko wanai, aza a na Ka̱shile ka zuwai o okpo aza a̱ ni.
15Ayinviki a̱ Ka̱shile kpamu a dana tsu ta̱ ukuna u nam pa. A̱ ugiti biꞋi u danai:
16“Vuzavaguɗu u danai,
‘Uzuwakpani u na n kuyaꞋan u ɗa na n ele a ayin a nan lo.
Mi ta̱ a kuzuwa kuyotsongusu ku va̱ a̱ a̱ɗu e le,
ka̱ta̱ n ɗana ku ɗa punu e kusheshe ku le.’ ”
17Ɗa u danai kpamu:
“Mi o kudoku ma ciɓa kpamu n unushi u le
n ili i gbani-gbani i na a yaꞋin ba.”#Ir. 31:33-34.
18Ana Ka̱shile ka cinukpakai tsu unushi, ukuna u bura tsu kpamu n kudoku kuyaꞋan alyuka ba.
LyaꞋi kelime n kushuku n Ka̱shile
19Adama a nannai uma a̱ va̱, ci ta̱ a kufuɗa tsa uwa o Mololo ma na ma LaꞋi n Ciɗa† babu wovon adama a mpasa n Yesu.#10:19 Kalaba ka na ke pecei Mololo ma Ciɗa a̱ ma̱va̱li n A̱Ꞌisa̱ a Gbayin. Ka kara ta̱ ayin a na Yesu u kuwa̱i adama a na u yotsongu uma i ta̱ a kufuɗa a̱ ta̱wa̱ u Yesu magaba. 20U nekei ikyamba i ni adama a na u ɓa̱yuwa̱ka̱ tsu uye u savu u na u tonoi a kubana a̱ ubuta̱ u wuma! Uye u nam pa ta na u ɗika tsu ta̱ a kuꞋuwa a̱ ubuta̱ u kakashi ka na a palakai utsutsu. 21Ci ta̱ m mogono ma anan ganu vuza na wi a kulyaꞋa tsugono a kpaꞋa ku Ka̱shile na ɗe gaɗi.
22Adama a nannai, ci ta̱ a kufuɗa ci yawa ɗevu n Ka̱shile. Ka̱sa̱kpa̱ ci yaꞋan nannai n a̱ɗu a singai a na i babu munla̱i. Mpasa n Kishi n tsu za̱Ꞌa̱ ta̱ a̱ɗu a̱ tsu, a̱ɗu a nan lo a na a ci ciɓasa n ili i gbani-gbani i na ci yaꞋin, ɗa tso okpoi adanshi a̱ za̱Ꞌa̱ tsu ta̱ ciɗa m mini ma ciɗa. 23Mayun ɗa tsu ka̱na̱ kpan-kpaꞋan a̱pa̱Ꞌa̱ a na tsu danai a̱ tsu a ɗa, adama a na tsu ushuku ta̱ n Ka̱shile ki ta̱ a kufuɗa kuyaꞋan ili i na u yaꞋin uzuwakpani. 24YaꞋan ili i bura tsu n itoku i tsu, ka̱ta̱ kpamu tsu ɓa̱nka̱na̱i n tsu na tso kuyotsongu ucigi, ka̱ta̱ ci yaꞋan ili i singai. 25Uma o yoku a tsu gasa adama a na a yaꞋan kucikpa ayin tutu ba, amma ka̱ta̱ ci yaꞋan ci le ba. Ci lyaꞋa kelime n kuyaꞋankpanai kadanshi ko kudokusu utsura u ka̱ɗu, ali tsu na i yevei kanna ko kubono ka Vuzagbayin ka yawa ta̱ ɗevu.
26Alyuka i lo o kudoku kuyaꞋan adama a unushi u tsu ba, ci lyaꞋa baci kelime n kuyaꞋan unushi wana ɗai ci yeve ili i mayun. 27Amma, ili i na yo okpoi i ɗaɗa tsu vana n wovon afada a na i lo a̱ kuta̱wa̱ koɓolo n akina a usuɗukpi ka̱u a na o kusongu aza a na i irala i Ka̱shile! 28Ngan n re ko n tatsu n tuka̱ baci nu nsata n vuza yoku adama a na u iwain kutono Wila̱ u Musa, i ta̱ a kutakacika vuma vu nan lo ali a kubana ukpa̱ babu asuvayali.
29Vuza yoku u iwan baci kuneke Maku ma̱ Ka̱shile tsugbayin, u laꞋa ta̱ uteku u na vuza u kuꞋiwan Wila̱ u Musa m gbani-gbani. Vuza yoku kpamu, u tuka̱ baci n wono a̱ ubuta̱ wu mpasa mu uzuwakpani n na n tsu bonoko tsu ciɗa,† u laꞋa ta̱ uteku u na vuza u kuꞋiwan Wila̱ u Musa m gbani-gbani. Nannai kpamu, vuza yoku u shika baci Ayinviki a̱ Ka̱shile, vuza na u tsu yotsongu tsu kasingai ka̱ ni, kagbani-gbani ka nan lo ke te kaꞋa n ka na ka buwai dem. 30Ci yeve ta̱ a na Ka̱shile ka danai, “N kutakacika ta̱ aza na a ci yaꞋan kawuya. Mi ta̱ a kutsupa le.” Ɗa feu u danai, “Vuzavaguɗu wi ta̱ a kuyaꞋanka uma a̱ ni afada.”#K.Wil. 32:35-36. 31Ili i wovon i ɗa ka̱u vuma u yikpa̱ e ekiye a̱ Ka̱shile ka wuma.
32Ciɓai n ayin a cau a ɗe, ana i piꞋisai ili i mayun yu ukuna u Ka̱shile a̱ ugiti. I yaꞋan ta̱ kataci ka̱u n atakaci n a̱bunda̱i, amma ɗa i lyaꞋi kelime n utsura. 33Ayin o yoku a uka ɗa̱ ta̱ muna, ɗa a shikai ɗa̱ a̱ a̱shi a̱ ka̱bunda̱i ka uma. Ayin o yoku i ɓa̱nka̱ ta̱ aza a na i kusoꞋo atakaci a ili i te n a̱ɗa̱. 34I yaꞋan ta̱ kasingai a kubana wa aza a na a zuwai a̱ kunu ku ugbashi. Ana a̱ fa̱ba̱na̱i ili i na yi n i ɗa ra̱ka̱, i lulukpa̱ ta̱ m ma̱za̱nga̱, adama a na i yeve ta̱ yi ta̱ n ili i na i laꞋi n kugaꞋan a kuvana ɗa̱, i na kpamu i kuyongo ko wanai.
35Adama a nannai, ka̱ta̱ i ka̱sa̱kpa̱ kuneke a̱ɗu sakaɗi u Vuzagbayin ba, ko yi ɗa̱i i cinai ɗa̱, adama a na i lyaꞋa baci kelime n kutsurakpa ka̱ɗu, yi ta̱ a̱ kuciya̱ katsupu ka gbayin. 36PiꞋisai uteku u na i kuyongo n ka̱lulu gogo na, adama a na i fuɗa i yaꞋan ili i na Ka̱shile ka cigai, ka̱ta̱ i ciya̱ kpamu ili i na u yaꞋin uzuwakpani. 37Uteku u na Katagarda ka Ciɗa ka danai,
“Babu megeshe vuza na wi lo a̱ kuta̱wa̱ u kuta̱wa̱ ta̱.
U kudokongusu ba.
38Aza a na Ka̱shile ku ushuki n ele o kuyongo ta̱ n wuma
adama a uneki u ka̱ɗu u le.
Amma wi a kupana uyoꞋo n vuza na dem
u bonoi n ka̱ca̱pa̱ ba.”#Hab. 2:3-4.
39Amma ci a̱ ka̱tsuma̱ ka aza a na o kubono n ka̱ca̱pa̱ ka̱ta̱ a̱ na̱mgba̱ ba. Tsu ushuku ta̱ n Ka̱shile, adama a nan lo ta na, ɗa wi isai tsu.
Currently Selected:
Aza a Ibrahim 10: asgNT
Highlight
Copy
Compare
Share
Want to have your highlights saved across all your devices? Sign up or sign in
© 2012 Wycliffe Bible Translators, Inc. All rights reserved
