Aza a Ibrahim 8

Kishi kaꞋa mogono ma anan ganu ma̱ tsu

1Ili i gbayin i na ci a kudansa i ɗaɗa na: Ci ta̱ m mogono ma anan ganu vuza na wi a̱ ida̱shi e kukiye ku usingai ku kakuba ko tsugono ka̱ Ka̱shile Mogono mi Ili Ra̱ka̱ na ɗe gaɗi. 2Mogono ma anan ganu ma̱ tsu wi ta̱ a tsugbashi o Mololo ma na ma LaꞋi n Ciɗa,† a̱ ubuta̱ u kucikpa u mayun u na Ka̱shile ka yaꞋin, amma a̱ ubuta̱ u na uma a yaꞋin ba.

3Mogono ma anan ganu dem mi ta̱ n ulinga u kunekeshe kuneꞋe n alyuka u Ka̱shile. Tsu nan lo mogono ma anan ganu ma̱ tsu u gaꞋan ta̱ u neke feu Ka̱shile ili. 4Wi ishi baci punu na aduniyan, u kokpo ganu ba, ko kenu, adama a na anan ganu i ta̱ lo punu na, aza a na o tsu tono Wila̱ a̱ ubuta̱ u kuneke Ka̱shile kuneꞋe. 5Ulinga u na a ci yaꞋan tsu anan ganu iyoci i ɗa koci ko kululu ki ili i na yi ɗe gaɗi. Derere ɗa n tsu na ki ishi m Musa. Ana Musa wi o ofoɓuso adama a na u yaꞋan Ma̱va̱li ma̱ Ka̱shile, Ka̱shile ka danai ni, “Ciɓa n ayin a na vi a kusan ka, ɗa n danai nu uteku u na va kuyaꞋan maꞋa derere. Zuka mayin ka̱ta̱ vi yaꞋan Ma̱va̱li ma tsu nan lo tsa derere.”#Kut. 25:40; 26:30. 6Amma ulinga u tsuganu u na Ka̱shile ke nekei Yesu u laꞋa ta̱ ulinga u na e nekei anan ganu a na a buwai. Tsu nan lo tsu ɗa feu, uzuwakpani u savu u na Yesu wu uta̱ka̱i a̱ ubuta̱ u Ka̱shile ɗa u tuka̱i uma a̱ ni u laꞋa ta̱ u kuku wa. Na va ɗaɗa adama a na ayin a na Ka̱shile ka yaꞋin uzuwakpani u savu wa, ili i na u danai u kuyaꞋan i laꞋa ta̱ ili i na u danai u kuyaꞋan a uzuwakpani u kuku.

7Ishi baci uzuwakpani u iyain wa u fuɗa u yaꞋan ili dem i na wi ishi a na wa yaꞋan, ishi kpamu o kudoku a yaꞋan uzuwakpani u ire wa ba. 8Amma Ka̱shile a̱ ka̱ci ka̱ ni we ene ta̱ uma a fuɗa a yaꞋan tsu na u yotsoi a yaꞋan ba, ɗa u danai:

“N dana ɗa̱, ayin i ta̱ lo a̱ kuta̱wa̱,

a na n kuyaꞋan uzuwakpani u savu

n aza a kpaꞋa ki Israila koɓolo n aza a kpaꞋa ku Yahuza.

9Uzuwakpani u nam pa u kuyaꞋan tsu uzuwakpani

u na n yaꞋin n ikaya i le ba,

ana n ka̱na̱i le n ekiye ɗa mu uta̱ka̱i le a iɗika i Masar.†

Amma ɗa a iwain kutono u ɗa,

ɗa ta na n shirikpa̱ka̱i le kucina̱.

10Amma uzuwakpani u savu u na n kuyaꞋan

n uma a Israila a ayin a na a̱ kuta̱wa̱ a ɗa na:

Mi ta̱ a kuzuwa kuyotsongusu ku va̱ e kusheshe ku le,

ka̱ta̱ n ɗana ku ɗa punu a̱ a̱ɗu e le.

Mi ta̱ o kokpo Ka̱shile ke le,

ka̱ta̱ ele o okpo uma a̱ va̱.

11Uma o kudoku kpamu o kuyotsongusu aza e le ba,

a dana, ‘Yevei Vuzavaguɗu,’

adama a na uma ra̱ka̱ i ta̱ e kuyeve mu,

a̱ kugita̱ a vuza na u laꞋi n kenu a kubana a vuza na u laꞋi m gbayin.

12Mi ta̱ a kucinukpaka le adama a kawuya ka na a yaꞋin,

mi kpamu o kudoku ma ciɓa n unushi u le kpamu ba.”#Ir. 31:31-34.

13Ana Ka̱shile ki a kadanshi ku uzuwakpani u savu, na va u yotsongu ta̱ a na u zuwai ɗe u iyain wa wo okpoi gbani. Ili i na kpamu i kutsai ɗa yo oꞋoi yi ta̱ a̱ kupuwa̱nka̱ babu megeshe.

Currently Selected:

Aza a Ibrahim 8: asgNT

Highlight

Copy

Compare