Aza a Ibrahim 5

1Ka̱shile ka tsu zagba ta̱ mogono ma anan ganu dem a̱ ubuta̱ wa aza a̱ ni, ka̱ta̱ u neke le ulinga u kutono n uma e le a̱ ubuta̱ u Ka̱shile adama a na a yaꞋan alyuka n kuneꞋe adama a̱ unushi. 2Mogono ma anan ganu ma feu ma tsu namba ta̱ utsura tsu uma a na a buwai. I ɗaɗa i zuwai ɗa u fuɗai u tonoi sawu n aza a na a yaꞋansai unushi adama a na i n uyevi wi ili i singai ba. 3Adama a na wi ta̱ n unambi wu utsura, mayun ɗa u yaꞋan alyuka adama a̱ unushi u ni koɓolo n unushi u uma.

4Babu vuza na u kufuɗa kuzagbaka ka̱ci ka̱ ni tsugbayin tsu na wo okpo mogono ma anan ganu. Vuma u tsu fuɗa ta̱ wo okpo mogono ma anan ganu koci adama a na Ka̱shile kaꞋa ke ɗekei ni, tsu na u ɗekei Haruna.† 5Ta feu ki nannai u Kishi. Wo okpoi mogono ma anan ganu, amma u zagba ka̱ci ka̱ ni adama a na u ciya̱ tsugbayin ba. Ka̱shile kaꞋa ka danai ni,

“Avu ɗa Maku ma̱ va̱.

Anana mo okpo ta̱ Eshevu.”#Ishp. 2:7.

6A̱ ubuta̱ u yoku, Ka̱shile ka danai,

“Avu ganu ɗa ko wanai,

tsu na Malikisada† wi ishi ganu.”#Ishp. 110:4; Ugi. 14:17-24.

7A ayin a na Yesu wi ishi a aduniyan, u folono ta̱ Ka̱shile, vuza na wi n utsura wi isa yi a̱ ubuta̱ wu ukpa̱, u yaꞋan ta̱ nannai n kacaꞋa koɓolo n kujilya. Mayun ɗa u cikpai Ka̱shile, Ka̱shile kpamu ka panakai ni mayin ili i na u danai. 8Ko a na Yesu wi Maku ma̱ Ka̱shile, u piꞋisai uteku u na u kupanaka Ka̱shile adama a ili i na u takacikai. 9Ana u kotsoi kuyaꞋan ili i na i gaꞋin u yaꞋan, ɗa wo okpoi vuza na u kuzuwa uma a̱ ciya̱ wishi u babu uteku, aza a na a ci yaꞋansa ili i na u tsu dana le a yaꞋan. 10Ta nannai Ka̱shile ka zuwai Yesu wo okpo mogono ma anan ganu, tsu Malikisada.

Ka̱ta̱ i ka̱sa̱kpa̱ kutono Ka̱shile ba

11Ci ta̱ n ili n a̱bunda̱i i kudansa adama a ukuna u nam pa, amma i cana kudansa e keteshe ba, adama a na i ci ɗika ukuna gogo ba. 12Yi isa ta̱ ɗe Yesu m megeshe ma ɗe, u gaꞋan ta̱ i ka̱na̱ kuyotsongusu uma o yoku. Kucikpa i cigai i ciya̱ vuza yoku u yotsongusu ɗa̱ kpamu kupiꞋisa ku iyain ka akaka a̱ Ka̱shile. Yi ta̱ tsu nreɓu n na m buwai a kapa mani ana u gaꞋin i gita̱ ɗe kulyaꞋa tsuwaꞋa. 13Vuza na baci ka̱ta̱ a kasai mani ba, u kuyeve ili i derere ko i gbani-gbani ba. 14Amma uma a̱ gba̱ra̱-gba̱ra̱ a ci lyaꞋa ta̱ tsuwaꞋa tsu na nreɓu mi a kufuɗa kulyaꞋa ba, a piꞋisa ta̱ ɗe tutu kpamu tsu na ili i singai yi kau n ili i gbani-gbani.

Currently Selected:

Aza a Ibrahim 5: asgNT

Highlight

Copy

Compare