Aza a Ibrahim 6

1-3A̱ ugiti i piꞋisai kuyotsongusu kakau ku iyain, ku na ki ku nreɓu. Kuyotsongusu ku nam pa ku ɗaɗa ci shika̱ unushi u tsu u na u tsu tuka̱ n ukpa̱, ka̱ta̱ kpamu ci yaꞋan n uneki u ka̱ɗu n Ka̱shile. Kuyotsongusu ku ɗa kpamu ku kusumbu ka akucina n kuzuwaka ke ekiye. Kuyotsongusu ku ukuna u kuɗenga̱ a̱ ubuta̱ wu ukpa̱ koɓolo n ukuna wa afada a babu uteku. Ukuna u nam pa ra̱ka̱ wi ta̱ punu a̱ ubuta̱ u kuyotsongusu ku iyain ku nam pa. Amma i yeve ta̱ ɗe ukuna u nam pa. Adama a nannai tsa kudansa ukuna u le gogo na ba, amma Ka̱shile ku ushuku baci, tsa kulyaꞋa ta̱ kelime n kudansa ukuna u kuyotsongusu ka aza a̱ gba̱ra̱gba̱ra̱.

4Uma o yoku a̱ ka̱sa̱kpa̱ baci kuneke a̱ɗu n Kirisiti Kishi, babu vuza na u kuzuwa le kushika̱ unushi kpamu. N ayin a cau a ɗe, uma a nam pa a isa ta̱ kutashi ku Ka̱shile ɗa e peɗei kuneꞋe ku ni. Ele i ta̱ koɓolo n aza a na a isai Ayinviki a̱ Ka̱shile. 5E yeve ta̱ uteku u na akaka a̱ Ka̱shile i n ugaꞋin, ɗa kpamu e peɗei utsura u ayin a na a̱ kuta̱wa̱ ana Ka̱shile ka kulyaꞋa tsugono ka̱u. 6Ana a isai ili i nan lo ra̱ka̱, ɗaɗa a̱ shirikpa̱ka̱i Kirisiti Kishi kucina̱. Wi a kuyaꞋan o bonoko uma tsu nan lo a̱ shika̱ unushi kpamu ba, adama a na i ta̱ o kudoku kubapa Maku ma̱ Ka̱shile† a maɗanga ma atakaci† ana a iwain ni. I ta̱ e kuneke yi wono e kelime ka uma dem.

7Uma o yoku i ta̱ ci iɗika i na i ciya̱i mini ka̱u. Ka̱ta̱ i matsa mayin e ekiye a aza a na a yaꞋin ɗe vicimba. Ka̱shile ka tsu zuwaka ta̱ iɗika i nan lo una̱singai. 8Uma o yoku i ta̱ ci iɗika i na i tsu matsa awana m mita̱ ma kavama, babu kumatsa ili i yoku. Ka̱shile ka ci yaꞋanka ta̱ iɗika i nan lo ya una̱, ka̱ta̱ akina o songu i ɗa gbende.

9Uma a̱ va̱ a na n cigai, ko ci yaꞋan baci kadanshi nannai, ci a̱ kumuɗa̱ ka̱ɗu n a̱ɗa̱ ba. Ci yeve ta̱ yi ta̱ a uye u singai, uye wu wishi. 10Ka̱shile ka ci yaꞋan ta̱ afada a̱ ni ayin tutu n uye derere u na u gaꞋin. Wi ta̱ a kuciɓa n ulinga u na i yaꞋin, ka̱ta̱ kpamu u ciɓa n ucigi u na i yotsongi a kubana wa̱ ni a ayin a na i ɓa̱nka̱i uma a̱ ni. Wi ta̱ kpamu a kuciɓa a na i buwai a̱ kuɓa̱nka̱ le ali n gogo na. 11Ili i na tsu laꞋi n kuciga i ɗaɗa i lyaꞋa kelime n kuyaꞋan nannai ali a kubana a uteku, adama a na i yeve ili i na i zuwakai a̱pa̱Ꞌa̱ yi ta̱ a kuyaꞋan mayun. 12Ci ciga ɗa̱ yo okpo orogo ba. Kucikpa i tono agisana a aza a na i a kisa ili i na Ka̱shile ka yaꞋankai le uzuwakpani adama a uneki u ka̱ɗu n uremi u ka̱ɗu u le.

Ka̱shile ka ci yaꞋan ta̱ ili i na u yaꞋin uzuwakpani

13Ana Ka̱shile ka yaꞋankai Ibrahim† uzuwakpani, u kucina ta̱ kuyaꞋan ili i na u yaꞋankai uzuwakpani wa. U kucinai nannai n kula ku ni, adama a na babu vuza na kpamu u laꞋi Ka̱shile. 14U danai, “Mpa, Vuzavaguɗu, mi ta̱ a kuzuwaka wu una̱singai, ka̱ta̱ n neke wu ntsukaya n a̱bunda̱i!”#Ugi. 22:17. 15Ibrahim u remei ka̱ɗu ɗa u vanai ili i nam pa i ta̱wa̱, ɗa ta na u ciya̱i ili i na Ka̱shile ka yaꞋankai ni uzuwakpani wa.

16Uma i baci a kuyaꞋan akucina, a tsu kucina ta̱ n kula ku vuza na u laꞋi le m gbayin. Akucina o yotsongu ta̱ ili i na a danai va mayun ɗa, ka̱ta̱ kanananai ko kotso ta na ra̱ka̱. 17Ka̱shile feu ka yaꞋin akucina, adama a aza a na a̱ kuciya̱ uzuwakpani wa e yeve a na mayun ɗa u ɗa wi, wi ta na a kusabaꞋa u ɗa ba. 18Ili i re i nan lo ya kusabaꞋa ba: Ka̱shile ka yaꞋan baci uzuwakpani, wa kuyaꞋan aꞋuwa ba, u kucina baci kpamu, wa kuyaꞋan aꞋuwa ba. Ili i nam pa ya i tsu dokusu ta̱ utsura u ka̱ɗu, a̱tsu na tsu sumai tsu ta̱wa̱i u Ka̱shile adama a na wi isa tsu. E ci neke tsu ta̱ utsura adama a na tsu ɓa̱na̱ a̱pa̱Ꞌa̱ a na u nekei tsu. 19-20A̱pa̱Ꞌa̱ a nan lo a gbama ta̱ punu a̱ a̱ɗu a̱ tsu uteku u na kashamkpatsu ki iyum ka ci shamkpa m kpantsu a̱ ubuta̱ u te. Vuza na tsu zuwai a̱pa̱Ꞌa̱ wa̱ ni a̱yi ɗa Yesu, vuza na u uwai n ubuta̱ u kakashi ka na a palakai utsutsu wa sai a̱ ubuta̱ u Mololo ma na ma LaꞋi n Ciɗa† gaɗi a̱ Ka̱shile. U yaꞋankai tsu nannai. Wo okpoi mogono ma anan ganu vu tsu ko wanai, tsu Malikisada.

Currently Selected:

Aza a Ibrahim 6: asgNT

Highlight

Copy

Compare