Aza a Ibrahim 4

Ka̱shile ke nekei kuvuka

1Ka̱shile ka yaꞋankai tsu uzuwakpani ci ta̱ a kufuɗa kuꞋuwa a kuvuka ku ni. Adama a nannai, tsu zuka ka̱ta̱ vuza yoku vu tsu u kpa̱ɗa̱ kufuɗa kuꞋuwa ɗe ba. 2Tsu pana ta̱ akaka a, tsu na aza a Israila a panai va. Amma a iwain kuneke a̱ɗu n ili i na a panai va, ɗa akaka a a̱ kpa̱ɗa̱i kuɓa̱nka̱ le. 3A̱tsu ɗa koci aza a na ci nekei a̱ɗu tsa kufuɗa kuꞋuwa a kuvuka ku ni. Uteku u na Ka̱shile ka danai,

“N yaꞋin wupa ɗa n kucinai,

‘A̱ kuciya̱ kuvuka ku va̱ ba, ko kenu.’ ”#Ishp. 95:11.

U dana ta̱ nannai ko a na kuvuka ku ni ku yaꞋin ɗe ulapuli kafu u yaꞋan aduniyan. 4A Katagarda ka Ciɗa u dansa ta̱ ukuna u kanna ke cindere a̱ ka̱tsuma̱ ke kuden ku te: “A kanna ke cindere ɗa Ka̱shile ku uvukai n ulinga u na wi ishi a kuyaꞋan ra̱ka̱.”#Ugi. 2:2. 5Ci kece ta̱ kpamu a ayin o yoku u danai, “Uma a nam pa a kuꞋuwa a kuvuka ku va̱ ba!”#Ishp. 95:11.

6Aza a na a̱ gita̱i kupana Arabali a Singai a a̱ ciya̱ kuvuka ku nan lo ba, adama a na o tono Ka̱shile ba. Amma ali n gogo na mayun ɗa uma o yoku a kuꞋuwa a kuvuka ka. 7Ɗa Ka̱shile ka zuwai kanna ko yoku ka na uma a kuꞋuwa a kuvuka ku ni, kanna ka nan lo ka ɗa u ci ɗeke, “Anana.” A Katagarda ka Ciɗa ka na a yaꞋin kadanshi ukuna u ni, Ka̱shile ka danai u Mogono Dawuda,†

“Vu pana baci ka̱la̱ka̱tsu ka̱ Ka̱shile anana,

ka̱ta̱ vi yaꞋan ugbawansuvu ba.”

8Iɗika i KanaꞋana† a̱ ubuta̱ u na Joshuwa† u bankai le, u ɗaɗa ubuta̱ u savu u kuvuka u nam pa wa ba. Ishi baci ta nannai, Ka̱shile ki ishi a kuyaꞋan kadanshi kpamu adama a kanna ka kuvuka ko yoku ba. 9Na va u dana tsu ta̱ a na ayin a kuvuka a uma a̱ Ka̱shile ka̱ta̱ a yawa ba. Ayin a kuvuka a nam pa i ta̱ an kanna ke cindere ka na Ka̱shile ku uvukai. 10Vuza na baci de dem u uwai a kuvuka ku Ka̱shile, wi ta̱ a kuvuka n ulinga u ni, tsu na Ka̱shile ku uvukai ana u kotsoi kuyaꞋan aduniyan. 11YaꞋan tsu dakaka tsu na tsa kufuɗa adama a na tsu uwa a̱ ubuta̱ u kuvuka u ni, adama a na ka̱ta̱ vuza te vu tsu u kpa̱ɗa̱ ba, tsu na a yaꞋin adama a uteku u na a iwain kutono Ka̱shile.

12Akaka a̱ Ka̱shile i ta̱ ci ili i wuma i na kpamu yi n utsura. A laꞋa ta̱ kotokobi ka na e temgbei una̱ u re dem alyu. Ka tsu ɓatsa ta̱ ka̱u ali u uwa punu asuvu a̱ tsu, u pece ayinviki n kululu ku tsu. U tsu ɓatsa ta̱ kpamu e mere ma atyangi n ungu e etele. U tsu yotsongu ta̱ e keteshe ili i na ci a kuciga kusokongu punu, ɗaɗa, ili i na ci sheshei koɓolo n i na ci cikalai. 13Babu vuza na u kusokongu ili punu a aduniyan i na Ka̱shile ka̱ kukpa̱ɗa̱ kene. U ce ene ta̱ ili ra̱ka̱ tsu na yi. A̱yi ɗa Ka̱shile vuza na tsa kudana hawun ili ra̱ka̱ i na ci yaꞋin.

Mogono ma anan ganu ma̱ tsu

14Ci lyaꞋa kelime n kugbaɓarangu ili i na tsu danai ci neke ta̱ a̱ɗu. Ci yaꞋan nannai adama a na ci ta̱ m mogono ma anan ganu, Yesu Maku ma̱ Ka̱shile, vuza na u bonoi gaɗi a̱ Ka̱shile. 15U fuɗai u yevei a na ci babu utsura. Kalijani ka dakakai uteku u na u kufuɗa adama a na u zuwa yi u yaꞋan unushi, amma a̱yi Kishi u saꞋwa kuyaꞋan unushi ba, ko kenu. 16YaꞋan ci yawa ɗevu n Ka̱shile babu wovon. A̱yi ɗa vuza na wi o kuyotsongu uma kasingai. Ci yawa baci ɗevu nannai, wi ta̱ a kuyaꞋanka tsu kasingai ka̱ta̱ u ɓa̱nka̱ tsu ayin a na baci ci a kuciga.

Currently Selected:

Aza a Ibrahim 4: asgNT

Highlight

Copy

Compare