Aza a Ibrahim 3

Yesu u laꞋa ta̱ Musa

1Uma a̱ va̱, Ka̱shile ka zagba ɗa̱ ta̱ yo okpo uma a ciɗa a̱ ni. Sheshei tsu na Yesu wi vuzavusuki vu Ka̱shile koɓolo m mogono ma anan ganu mu uneki u ka̱ɗu u tsu. 2U yaꞋin ili ra̱ka̱ i na Ka̱shile ka danai ni u yaꞋan. Ka̱shile ka zagba yi ta̱ u yaꞋan ulinga u nam pa, tsu na Musa u yaꞋin i na Ka̱shile ka danai ni u yaꞋan a kpaꞋa ku Ka̱shile ra̱ka̱. 3Tsugbayin tsu na Yesu u ci ciya̱ tsu laꞋa ta̱ tsu Musa, uteku u na kamaꞋi ka̱ ci ciya̱ tsugbayin u laꞋa kumaꞋa ka. 4Mayun ɗa vuza yoku u tsu maꞋa kpaꞋa dem, amma Ka̱shile kaꞋa kamaꞋi ki ili dem. 5Musa kagbashi kaꞋa ka na Ka̱shile ku ushuki n a̱yi m kpaꞋa ku ni dem, ulinga u ni agisana a ɗa a ili i na Ka̱shile ko kuyotsongu uma na kelime. 6Amma Kishi Maku ma̱ Ka̱shile maꞋa, a̱yi ɗa kpamu Ka̱shile ku ushuki n a̱yi wi inda kpaꞋa ku ni. A̱tsu ɗa kpaꞋa ku ni, ci lyaꞋa baci kelime n kuneke a̱ɗu babu kuka̱sa̱kpa̱ adama a ili i na ci keɗei a̱pa̱Ꞌa̱.

U gaꞋan ta̱ ci lyaꞋa kelime n kutono Ka̱shile

7Ta nannai tsu na Ayinviki a̱ Ka̱shile a danai,

“Vu pana baci ka̱la̱ka̱tsu ka̱ Ka̱shile anana,

8ka̱ta̱ vi yaꞋan ugbawansuvu ba,

tsu na ikaya i ɗa̱ i yaꞋin

a ayin a na a̱ ka̱sa̱kpa̱i kutono Ka̱shile,

ana o kondoi Ka̱shile na ɗe a kakamba.”

9Ka̱shile ka danai,

“O kondoi mu ka̱u

adama a na e ene ili i na n kuyaꞋan,

ko a na e enei ɗe ili i na n yaꞋin a̱ ka̱tsuma̱ ka̱ a̱ya̱ amangere.

10Ɗa n yaꞋin wupa n ele, ɗa n danai:

‘A̱ɗu e le ayin tutu a̱ tsu ka̱sa̱kpa̱ mu ta̱.

A iwain kuyaꞋan ili i na n danai le.’

11N yaꞋin wupa ɗa n kucinai,

‘A̱ kuciya̱ kuvuka ku va̱ ba, ko kenu.’ ”#Ishp. 95:7-11.

12Uma a̱ va̱, yaꞋin mayin ka̱ta̱ vuza yoku vu ɗa̱ u yaꞋan n ka̱ɗu ka gbani-gbani ka na u iwan kuneke ka̱ɗu ba. Ka̱ɗu ka na ki nannai ka tsu zuwa ɗa̱ ta̱ i iwan Ka̱shile ka wuma.

13I nekenei kadanshi ku utsura u ka̱ɗu a kanna dem. I lyaꞋa kelime nannai a na ayin a buwai lo biꞋi e kuɗeke “Anana.” I yaꞋan baci nannai ba, unushi wi ta̱ a̱ kuya̱nsa̱ aza o yoku a̱ ɗa̱ ka̱ta̱ u zuwa le a yaꞋan n ugbawansuvu. 14Ci baci n uneki wa̱ a̱ɗu ali a kubana a uteku, a kuzuwaka Ka̱shile utsura tsu na ci gita̱i ɗe, ci ta̱ a̱ kuciya̱ ili ra̱ka̱ i na yi i Kishi. 15Katagarda ka Ciɗa ka danai,

“Vu pana baci ka̱la̱ka̱tsu ka̱ Ka̱shile anana,

ka̱ta̱ vi yaꞋan ugbawansuvu ba,

tsu na ikaya i ɗa̱ i yaꞋin

a ayin a na a̱ ka̱sa̱kpa̱i kutono Ka̱shile.”

16Anan yayi a panai ka̱la̱ka̱tsu ka̱ Ka̱shile ɗa a̱ kpa̱ɗa̱i kutono yi? Aza a na Musa wu uta̱ka̱i a iɗika i Masar ra̱ka̱. 17Anan yayi a zuwai Ka̱shile wupa ali a̱ya̱ amangere? Wi ta̱ a wupa n aza a na a yaꞋin unushi, aza a na a̱ kuwa̱i ɗe a kakamba. 18Anan yayi Ka̱shile ki a kuyaꞋan kadanshi n ele ana u kucinai u danai a̱ kuciya̱ kuvuka ku ni ba, ko kenu? U yaꞋan ta̱ kadanshi n aza a na a̱ kpa̱ɗa̱i kupanaka yi. 19Tsu ta̱wa̱ ta̱ ci yeve a fuɗa a uwa a kuvuka ku ni ba, adama a na a iwan ta̱ kuneke a̱ɗu.

Currently Selected:

Aza a Ibrahim 3: asgNT

Highlight

Copy

Compare