Aza a Ibrahim 12

Ka̱shile Esheku a̱ tsu a ɗa

1Ci ta̱ n uma n a̱bunda̱i uka̱ra̱Ꞌi n a̱tsu aza a na i agisana a ili i na uneki u ka̱ɗu wi. Tsu nan lo yaꞋan ci yaꞋan ilaɗi i malamanai ma na mi kelime ka̱ tsu ka̱ta̱ tsu ka̱sa̱kpa̱ ba. Tsu takpa a̱ ubuta̱ u wuma u tsu ili dem i na i kukpada tsu kuyaꞋan ili i na i gaꞋin ci yaꞋan; ɗaɗa unushi u na u kubonoko tsu ka̱ca̱pa̱ gogoꞋo. 2Mayun ɗa tsu zuwa a̱shi a̱ tsu u Yesu, vuza na wi ka̱giti ku uneki u ka̱ɗu u tsu n vuza na kpamu u kuzuwa u ɗa wo okpo uteku u na u gaꞋin. U takacika ta̱ ɗa u kuwa̱i a maɗanga ma atakaci. Amma ɗa wu ushuki n wono wa adanshi ili i ɗa ba, adama a̱ ma̱za̱nga̱ ma na u kuciya̱ a kubana megeshe. Gogo na kpamu wi ta̱ ɗe a̱ ida̱shi e kukiye ku usingai ku kakuba ko tsugono tsu Ka̱shile.† 3Ciɓai biꞋi n Yesu tsa agisana. U lulukpa̱i ana uma a gbani-gbani i a kuyaꞋanka yi ili i gbani-gbani. Adama a nannai ka̱ta̱ yo oꞋo ali i ka̱sa̱kpa̱ kudakaka ba.

4Yi ta̱ a kataci n unushi, amma ka̱ta̱ kataci ka̱ ɗa̱ ka zuwa le a una ɗa̱ ba. 5Amma i cinukpa ta̱ a na Katagarda ka Ciɗa ka danai muku n Ka̱shile adama a na u dokusu le utsura u ka̱ɗu:

“Maku ma̱ va̱, Vuzavaguɗu u lapulaka wu baci, vu zuka mayin,

u ɓarangu wu baci kpamu ka̱ta̱ vu namba katsura ka̱ ka̱ɗu ba,

6Adama a na Vuzavaguɗu u tsu lapulaka ta̱ yaba dem vu na u cigai,

ka̱ta̱ kpamu u ɓarangu yaba dem vu na Vuzavaguɗu wu ushuki n a̱yi, tsu maku ma̱ ni.”#An. 3:11-12.

7Lulukpa̱i n ili i na yi a kutakacika, adama a na yi ta̱ tsu na atakaci a̱ tsu uta̱ u kesheku. Babu maku ma na ma saꞋwai kunamba atakaci a̱ ubuta̱ we esheku a̱ ni. Ka̱shile ki ta̱ a kuyaꞋan n a̱ɗa̱ tsu muku n ni. 8Ka̱shile ka tsu lapulaka ta̱ muku n ni ra̱ka̱, u kpa̱ɗa̱ baci kulapulaka ɗa̱, ashe a̱ɗa̱ uma a pulai ɗa, yi kpamu uma a̱ ni mayun ba. 9Ra̱ka̱ vu tsu ci yongo ta̱ n isheku i tsu punu a aduniyan aza a na a lapulakai tsu, ɗa ta na ci cikpai le. To u kulaꞋa tsu panaka esheku a̱ tsu a na i gaɗi ka̱ta̱ ciya̱ ci yongo n wuma ba? 10Isheku i tsu a aduniyan a lapulaka tsu ta̱ a uye u na e enei u ɗa u laꞋi n kugaꞋan a ayin kenu a yakpa. Amma Ka̱shile ka tsu lapulaka tsu ta̱ adama a na u ɓa̱nka̱ tsu, ka̱ta̱ ci ciya̱ tso okpo ciɗa uteku u na a̱yi wi ciɗa. 11Kulapulu ili i ɗa i na i ci yokpo uma a ayin a na a lapulakai le ba, ki ta̱ nu mɓa̱la̱! A ayin a na baci Ka̱shile ka takacikai le, ɗaɗa adama a na u yotsongu le ili i na a yaꞋin derere ba, ka̱ta̱ a piꞋisa ili punu a̱ ubuta̱ u nam pa wa ka̱ta̱ a yaꞋan ili yu usuɓi, ka̱ta̱ o yongo m ma̱ta̱na̱ kpamu.

12Yo okpo ta̱ babu katsura, amma doki i yaꞋan katsura kpamu. 13Lapulai uye u bono mejege, ka̱ta̱ aza a na i o kutono u ɗa, ko i babu katsura ko i nkutsuma̱, a̱ kpa̱ɗa̱ kuta̱ɗa̱tsa̱ ali a̱ yikpa̱ amma a̱ ciya̱ katsura.

Panakai Ka̱shile

14Gbagbalai adama a na i yongo m ma̱ta̱na̱ n uma ra̱ka̱, ka̱ta̱ kpamu i gbagbala i yongo a uye u ciɗa. Vuza na dem wuma u ni wi ciɗa ba, we kene Vuzavaguɗu ba. 15Zukai mayin adama a na ka̱ta̱ vuza te vu ɗa̱ u kpa̱ɗa̱ kuciya̱ kasingai ka̱ Ka̱shile ba. Zukai ka̱ta̱ ili i kusheshe yo okono i gbonguro adama a na i takacika ɗa̱ a̱ kula̱nga̱sa̱ uma n a̱bunda̱i ba. 16Ka̱ta̱ i zuka mayin ta lo vuza wa yaꞋan tsugbani, ko u iwan kutono Ka̱shile uteku u na Isuwa u yaꞋin. Isuwa a̱yi ɗa magaji mi Ishaku, wi ishi ta̱ kpamu a̱ kuciya̱ ili i ra̱ka̱ i na esheku i n i ɗa, amma ɗa u dengei ili i nan lo ra̱ka̱ adama a kapara ka tsuwaꞋa ke te koci. 17I ciɓa ta̱ ana Isuwa u yaꞋin ili i nam pa ya, ɗa u cigai esheku a̱ ni a zuwaka yi una̱singai, amma ɗa esheku a̱ ni a iwain. Amma babu ili i na u kuyaꞋan adama a na u sabaꞋa ukuna wa, ko a na u folonoi esheku n u shika̱i.

18A̱ɗa̱ yi tsa aza a Israila ba, aza a na a yawai a Kusan ku Sinai,† a̱ ubuta̱ u na a kufuɗa e kene ka̱ta̱ kpamu a saꞋwa. Ku ɗa ki ta̱ n akina, ka̱yimbi n ka̱nga̱ ka̱ lima̱ kpamu ka palai ku ɗa, koɓolo n kabatalikpau. 19A panai izumgbi i kavana n ka̱la̱ka̱tsu. Ana uma a panai ka̱la̱ka̱tsu ka, ɗa o folonoi Ka̱shile ka̱ ka̱sa̱kpa̱ kuyaꞋan kadanshi, 20adama a na u laꞋa ta̱ utsura u na a fuɗa o tono ana u danai, “Ko manama ma saꞋwa baci kusan ka, mayun ɗa a una maꞋa n atali.”#Kut. 19:13. 21Musa a̱ ka̱ci ka̱ ni u pana ta̱ wovon ka̱u n ili i na we enei ali ɗa u danai, “M pana ta̱ wovon ka̱u ali ɗa mi e kujeꞋeke ikyamba.”#K.Wil. 9:19.

22Amma a̱ɗa̱ gogo na i ta̱wa̱ ta̱ a Kusan ku Sihiyona n Urishelima vu na vi gaɗi. Na va ɗaɗa ubirini u Ka̱shile ka wuma, a̱ ubuta̱ u na alingata a̱kpa̱n a̱kpa̱n n a̱bunda̱i o ɓolongi a̱ ubuta̱ u te adama a na a yaꞋan ma̱za̱nga̱. 23I ta̱wa̱ ta̱ a̱ ubuta̱ u koɓolo ka̱ muku n Ka̱shile adanshi ra̱ka̱ vi le ngaji n Ka̱shile n ɗa. A ɗana ta̱ ɗe ula e le ra̱ka̱ gaɗi. I ta̱wa̱ ta̱ u Ka̱shile a̱ ka̱ci ka̱ ni, vuza na wi keyevikafada ka uma ra̱ka̱. I ta̱wa̱ ta̱ kpamu wa̱ a̱kpisa̱ a̱ usuɓi, Ka̱shile ka zuwa le ta̱ o okpo uteku u na u cigai o okpo. 24I ta̱wa̱ ta̱ u Yesu, vuza na u tuka̱i n uzuwakpani† u savu a̱ Ka̱shile a kubana u uma a̱ ni. Ɗaɗa mpasa n Yesu n na a zazai tsa alyuka n na mi n akaka a na a laꞋi mpasa n Habila.#12:24 A ayin a na Kayinu wu unai Habila, ɗa Ka̱shile ka danai ni, “Mpasa n ambu n na mi utsuwin a iɗika mi ta̱ e kuɗeke mu.” Mpasa n Yesu n tuka̱ ta̱ n kucinukpa ku unushi n a̱bunda̱i, Amma mpasa n Habila n tuka̱ ta̱ n atakaci adama a̱ ma̱ga̱la̱ka̱ ma̱ ni. Ugi. 4:10.

25Adama a nannai ka̱ta̱ i iwan vuza na wi a kuyaꞋanka ɗa̱ kadanshi ba. Uma a Israila a iwain Musa ana u ɓarangi le a ayin a na i a aduniyan, a laꞋaka ta na ba. Adama a nannai wi ta̱ a kulaꞋa n kuna̱mgba̱ wa̱ tsu ci iwan baci vuza na wi gaɗi ayin a na baci u ɓarangi tsu. 26N ayin a cau ana u yaꞋin kadanshi, ka̱la̱ka̱tsu ka̱ ni ka̱ gba̱ɗa̱sa̱i iɗika, amma gogo na u yaꞋan ta̱ ɗe uzuwakpani, “Mi ta̱ o kudoku kugba̱ɗa̱sa̱ aduniyan kute amma u nam pa ali n gaɗi feu.” 27Ana u danai ili i nam pa, wi ta̱ a kadanshi ka na u kuniꞋwa̱nta̱ngu ili i na u yaꞋin dem. Ili i na a̱ kukpa̱ɗa̱ kufuɗa kugba̱ɗa̱sa̱ koci i ɗa i kokpo.

28I ɗaɗa i zuwai ɗa tsa kuyaꞋan ogodiya a na ci ciya̱i tsugono tsu na ili ya kufuɗa ya̱ gba̱ɗa̱sa̱ ba. Ci cikpa Ka̱shile tsu na u kuyokpo yi, ka̱ta̱ ci neke yi tsugbayin n kupana wovon u ni kpamu, 29adama a na Ka̱shile ka̱ tsu ki ta̱ tsa akina a usuɗukpi a na o tsu songu ili.

Currently Selected:

Aza a Ibrahim 12: asgNT

Highlight

Copy

Compare