Aza a Ibrahim 11

Uneki u ka̱ɗu

1Aza a na e nekei a̱ɗu n Ka̱shile a̱ ushuku ta̱ mayun a na u kuneke le ili i na e keɗekei a̱pa̱Ꞌa̱. A̱ ushuku ta̱ mayun ɗa n ili i na ka̱ta̱ a saꞋwai kene ba. 2Ka̱shile ku ushuku ta̱ n uma a mani-mani adama a uneki wa̱ a̱ɗu u le.

3Ci ta̱ n uneki u ka̱ɗu, i ɗaɗa i zuwai ɗa ci yevei a na Ka̱shile ka yaꞋin kadanshi, n uye u nam pa u ɗa u yaꞋin aduniyan n ili i na yi punu dem. Ana u yaꞋin nannai, u yaꞋan ta̱ ulinga n ili i na vuma u kene ba, adama a na u yaꞋan ili i na ce kene.

4Habila† wi ta̱ n uneki u ka̱ɗu, i ɗaɗa i zuwai ɗa u yaꞋin alyuka u Ka̱shile a uye u na u laꞋi alyuka a na Kayinu† u yaꞋin n kugaꞋan. Ka̱shile ka danai ka pana ta̱ uyoꞋo n kuneꞋe ku na u lyukai, ɗa u ɗekei ni vuma vu usuɓi. Ko a na wo okpoi ɗe magasa mani-mani, ukuna u ni u buwa ta̱ a kuyaꞋan kadanshi n a̱tsu adama a uneki u ka̱ɗu u ni.

5Anuhu wi ta̱ n uneki u ka̱ɗu, i ɗaɗa i zuwai ɗa Ka̱shile ka ɗikai ni a kubana gaɗi u ciya̱ u kuwa̱ ba. E ene ikyamba i ni ba, adama a na Ka̱shile ka ɗika yi ta̱ ɗe. Katagarda ka Ciɗa ka danai kafu Ka̱shile ka ɗika yi a kubana gaɗi, u zuwa ta̱ ɗe Ka̱shile ka panai uyoꞋo n a̱yi. 6Uneki u ka̱ɗu wi baci lo ba, vuza wa kufuɗa wa zuwa Ka̱shile ka pana uyoꞋo u ni ba. Vuza na baci de dem u ta̱wa̱i u Ka̱shile, mayun ɗa wu ushuku a na Ka̱shile ki n wuma, a̱yi ɗa kpamu u tsu tsupa aza a na i a̱ kula̱nsa̱ yi mayun.

7Nuhu† wi ta̱ n uneki u ka̱ɗu, i ɗaɗa i zuwai ɗa u panai ana Ka̱shile ka danai ni ukuna wi ili i na ka̱ta̱ u saꞋwai kene ba. U panakai Ka̱shile ɗa u sheꞋwei kpantsu ku gbayin adama a na wi isa kpaꞋa ku ni. A̱ ubuta̱ wu uneki u ka̱ɗu u ni u ɗa, u yotsongi a na aduniyan a nusai, ɗa wo okpoi vuza te a̱ ka̱tsuma̱ ka aza a na o bonokoi n usuɓi n Ka̱shile a̱ ubuta̱ wu uneki u ka̱ɗu u ni.

8Ibrahim wi ta̱ n uneki u ka̱ɗu, i ɗaɗa i zuwai ɗa u panakai Ka̱shile ana u ɗekei ni u bana a̱ ubuta̱ u yoku u na u yaꞋin uzuwakpani u kuneke yi. U ka̱sa̱kpa̱i iɗika i ni, u yeve ta na ubuta̱ u na u gaꞋin u bana ba. 9Adama a na Ibrahim wi n uneki u ka̱ɗu, u yongoi tsu komoci a iɗika yu uzuwakpani. U yongoi ɗe a̱ ka̱pa̱m, ta feu ntsukaya n ni, Ishaku n Yakubu a yaꞋin nannai. Ɗa Ka̱shile ke nekei le feu uzuwakpani u te. 10Ibrahim u yaꞋan ta̱ ili i nam pa, adama a na wi ta̱ a kuvana a na wa uwa a̱ ubirini u na Ka̱shile ka̱ ira̱i ɗa ka maꞋi, u na i kuyongo ko wanai.

11Saratu† koɓolo n Ibrahim i ta̱ n uneki u ka̱ɗu, i ɗaɗa i zuwai ɗa a fuɗai a matsai maku, ko a na a kutsai ka̱u ɗa Saratu kpamu wi madari. Ibrahim u neke ta̱ ka̱ɗu a na Ka̱shile ki a kuyaꞋan ili i na u yaꞋin uzuwakpani. 12Vuma vu nam pa u kutsa ta̱ ka̱u ali ɗevu n ukpa̱, amma ko n nannai wo okpoi akaya a uma n a̱bunda̱i. Mayun, uma a nam pa i ta̱ lo n a̱bunda̱i a laꞋi kukece, tsu na azangata a gaɗi i, ko kayala a̱ ka̱kina̱ ka mala.

13Uma a nam pa ta a̱ kuwa̱i nannai ra̱ka̱ n uneki wa̱ a̱ɗu u le babu na a̱ ciya̱ ili i na Ka̱shile ka yaꞋankai le uzuwakpani. A yaꞋan ta̱ ma̱za̱nga̱ a na e enei ili i nam pa a̱ kuta̱wa̱, ko a na i ɗa yi daꞋin. A danai ele omoci a ɗa n a̱ta̱wa̱shi a aduniyan a nam pa. 14Uma a dansa baci ili tsu nam pa, o yotsongu ta̱ a na i a̱ kula̱nsa̱ iɗika i na i kokpo i le. 15Ishi baci i lo a kuciɓasa n iɗika i na a̱ ka̱sa̱kpa̱i, babu ili i na i kusa̱nka̱ le kubono a̱ ubuta̱ u na ishi. 16Amma i ta̱ a̱ kula̱nsa̱ ubuta̱ u na u laꞋi n ugaꞋin. Ta ɗe wi gaɗi. I ɗaɗa i zuwai ɗa Ka̱shile ka̱ kukpa̱ɗa̱ kupana wono, e ɗeke yi baci Ka̱shile ke le, adama a na u foɓuso ta̱ ɗe ubirini adama e ele.

17Ibrahim wi ta̱ n uneki u ka̱ɗu, i ɗaɗa i zuwai ɗa u nekei Ishaku tsa alyuka ana Ka̱shile ko kondoi ni. Ibrahim ɗa vuza na Ka̱shile ka yaꞋankai uzuwakpani wa, amma u foɓusoi adama a na u neke maku me te ma̱ ni koci tsa alyuka. 18N ayin a cau, Ka̱shile ka dana yi ta̱ ɗe, “Ntsukaya n na n yaꞋankai nu uzuwakpani i ta̱ a̱ kuta̱ wi Ishaku.”#Ugi. 21:12. 19Ibrahim u sheshe ta̱ Ishaku u kuwa̱ baci, Ka̱shile ki ta̱ a kufuɗa ka̱ ɗengusa̱ yi kpamu. Wi ta̱ adanshi Ibrahim wi isa ta̱ kpamu maku ma̱ ni a̱ ubuta̱ wu ukpa̱.

20Ishaku† wi ta̱ n uneki u ka̱ɗu, i ɗaɗa i zuwai ɗa u zuwakai muku n re n ni una̱singai, Yakubu† n Isuwa.† U yeve ta̱ a na Ka̱shile ka kuyaꞋanka le ili i singai na kelime.

21Yakubu wi ta̱ n uneki u ka̱ɗu, i ɗaɗa i zuwai ko a na wi a̱ kukuwa̱, u telekpe ka̱ci ka̱ ni a kalangu ka̱ ni ɗaɗa u cikpai Ka̱shile. Ɗa u zuwakai yaba dem vu muku n Isuhu† una̱singai.

22Isuhu wi ta̱ n uneki u ka̱ɗu, i ɗaɗa i zuwai ɗa ana wi a̱ kukuwa̱, ɗa u yaꞋin kadanshi adama a ayin a na aza a Israila a̱ kuka̱sa̱kpa̱ iɗika i Masar. Ɗa u danai le a̱ pura̱ etele a̱ ni koɓolo n ele i baci a kulaza.

23Esheku a Musa n a̱na̱ku a̱ ni i ta̱ n uneki u ka̱ɗu, i ɗaɗa i zuwai ɗa o sokongi ni ali wotoi u tatsu. E ene ta̱ Musa mereɓu mo tsuloboi maꞋa, a pana kpamu wovon a iwan kutono wila̱ u mogono ba.

24Musa wi ta̱ n uneki u ka̱ɗu, i ɗaɗa i zuwai ana u gbonguroi, ɗa u iwain kushuku e ɗeke yi maku me mekere mo mogono ma Masar. 25U cikalai kusoꞋo atakaci koɓolo n uma a̱ Ka̱shile, a na wa pana uyoꞋo wu unushi u ayin kenu. 26We ene ta̱ u laꞋa ta̱ n kugaꞋan u takacika adama a̱ Kirisiti Kishi, a na wa̱ ciya̱ uciyi u Masar ra̱ka̱, adama a na wi ta̱ a kindana katsupu ka̱ Ka̱shile ka na ki lo a̱ kuta̱wa̱. 27Adama a uneki u ka̱ɗu u ni, Musa u ka̱sa̱kpa̱i Masar, ɗa u kpa̱ɗa̱i kupana wovon u wupa u mogono. Musa u lyaꞋi kelime nannai adanshi wi ta̱ e kene Ka̱shile ka na vuza wa kufuɗa we kene ba. 28Adama a uneki u ka̱ɗu u ni, u foɓusoi Ka̱ɗiva̱ ka Kupasamgbanai† ɗa u zazai mpasa a̱ utsutsu gaɗi n akambu dem adama a na vuza na u kutuka̱ n ukpa̱ u kpa̱ɗa̱ kuna ngaji mi Israila.

29Uma i ta̱ n uneki u ka̱ɗu, i ɗaɗa i zuwai ɗa a pasai Mala ma Shili† adanshi iɗika i ɗekpu i ɗa. Amma ana aza a Masar o tonoi, ɗa a̱ kuwa̱i punu a mala ma ra̱ka̱.

30Uma a̱ Ka̱shile i ta̱ n uneki u ka̱ɗu. Ana a walai ɗa a̱ ka̱ra̱Ꞌi likuci i Jeriko ali ayin e cindere, ɗa mashilya ma̱ ni ma̱ yikpa̱i.

31Rahapu† kashakanlai kaꞋa, wi ta̱ n uneki u ka̱ɗu, i ɗaɗa i zuwai ɗa u rabasai aza a kasaka a Yahuda. Ɗaɗa i zuwai ɗa a̱ kpa̱ɗa̱i kuna yi, ana a unai aza a na a iwain kupanaka Ka̱shile.

32N doku n neke agisana o yoku? Mi n ayin a na n kudana ɗa̱ ukuna u Gidiyon,† m Baraka, n Sonson,† n Jefata, n Dawuda, n SamaꞋila,† n eneki ba. 33Uneki u ka̱ɗu u le u ɓa̱nka̱ le ta̱ a lyaꞋi utsura wi iɗika kakau. A yaꞋan ta̱ ili i na yi derere, ɗa a̱ ciya̱i ili i na Ka̱shile ka yaꞋin uzuwakpani. A̱ ɓa̱ya̱ngi una̱ wi ikawu.#Dan. 6:1-28. 34A̱ kima̱sa̱i akina a usuɗukpi ka̱u. A laꞋakai a̱ ubuta̱ wa aza a na a cigai kuna le n otokobi. Ko a na a nambai katsura, ɗa o doku a̱ ciya̱i katsura. A̱ ciya̱ ta̱ utsura ka̱u a̱ ubuta̱ u kuvon, ɗa a lyaꞋi utsura wo osoji a na i omoci. 35A̱ma̱ci o yoku o doku a isai aza e le, aza a na ishi a̱ kuwa̱i ɗe ɗa o bonoi n wuma. Uma o yoku a ɗa a takacikai le n a̱bunda̱i adama a uneki wa̱ a̱ɗu u le, ɗa uma a nan lo a danai, “Ci a̱ kushuku tso okpo ba̱ri ba.” A yaꞋin nannai adama a na Ka̱shile ka̱ ɗengusa̱ le a̱ ubuta̱ wu ukpa̱ a kubana a wuma u singai.

36A yaꞋankai aza a na a̱ ushuki n Ka̱shile ulami, ɗa kpamu a fabai le. Ɗa a shiyai aza o yoku kau n ikani ɗa a zuwai a ugbashi. 37Aza o yoku a kuwa̱i adama a na a vara le ta̱ n atali. Aza o yoku a gbatyai le agimi e re e re. A unai aza o yoku n otokobi. Aza o yoku a buwa n ili ba, sai ukpan wu nlala adama a na a uka. O okpoi aza a unambi, ɗa a takacikai le ka̱u. 38Uma a nam pa uma a singai a ɗa ali ɗa aduniyan a̱ kpa̱ɗa̱i kuntsa n ele. A tambalukpai a kakamba nu nsasan, ɗa o sokongi a aɓatsu n enle a iɗika.

39Uma a nam pa ra̱ka̱ Ka̱shile ka pana ta̱ uyoꞋo u le adama a uneki u ka̱ɗu u le! Amma ko n nannai, ɗa a̱ kuwa̱i babu na a̱ ciya̱i ili i na u yaꞋankai le uzuwakpani. 40Ka̱shile ke sheshe ta̱ kuyaꞋan ili i na i kulaꞋa biꞋi n kugaꞋan adama a̱ tsu, ka̱ta̱ a̱ ciya̱ o okpo ciɗa uteku u na u yotsoi o yongo koɓolo n a̱tsu.

Currently Selected:

Aza a Ibrahim 11: asgNT

Highlight

Copy

Compare