Aza a Ibrahim 13
13
Uteku u na Ka̱shile ka kupana uyoꞋo
1LyaꞋi kelime m maciganai n ucigi u Kirisiti Kishi. 2Ka̱ta̱ i rabasa omoci a iꞋuwa i ɗa̱. Uma o yoku a yaꞋan ta̱ nannai, ɗa ta na a rabasai alingata a̱ Ka̱shile babu na e yevei. 3Ka̱ta̱ i cinukpa n aza a na i a ugbashi ba. SoꞋi atakaci n ele adanshi yi ta̱ ɗe n ka̱ci ka̱ ɗa̱. Ciɓai n aza a na i a kuyaꞋanka kawuya adanshi yi ta̱ ɗe feu a kutakacika n ele.
4Ka̱ta̱ i cikpa yolo. Ali n a̱ma̱ci o yongo n ukuna u mayun a kuka̱na̱ ka̱ci ke le ayin tutu, adama a na Ka̱shile ki ta̱ a kutakacika vuza na de dem u yaꞋin tsugbani ko u kpa̱ɗa̱i kuyongo n ukuna u mayun a̱ ubuta̱ u yolo. 5Sa̱nka̱i ka̱ci ka̱ ɗa̱ n ukuna u kuciga ki ikebe. I cuwa̱ n ili i na yi n i ɗa. Ka̱shile ka danai,
“Mi a̱ kuka̱sa̱kpa̱ wu ba, ko kenu.
Mi kpamu a̱ kushirikpa̱ka̱ wu kucina̱ ba.”#K.Wil. 31:6, 8.
6Adama a nannai, ci ta̱ a kufuɗa kudana sakaɗi,
“Mi a kupana wovon ba,
adama a na Vuzavaguɗu ɗa ka̱ɓa̱nki ka̱ va̱.
Uma a kufuɗa a yaꞋanka mu ili ba.”#Ishp. 118:6.
7Ciɓai n aza e kelime a̱ ɗa̱ a na o yotsongushi ɗa̱ kadanshi ka̱ Ka̱shile a̱ ugiti. Ciɓai n ili i singai i na o yongoi a kuyaꞋansa a wuma u le ra̱ka̱, ka̱ta̱ yu ushuku n Ka̱shile ci le. 8Yesu Kishi u tsu sabaꞋa ba, ko kenu! A̱yi ɗa vi te na̱yin, n anana, n ko wanai.
9Ka̱ta̱ i ka̱sa̱kpa̱ a̱ ya̱nsa̱ ɗa̱ ali i ka̱sa̱kpa̱ kuyotsongusu kakau ku zuwa ɗa̱ i katsukpa uye u singai ba. Kasingai ka̱ Ka̱shile kaꞋa ke kuneke a̱ɗu a̱ ɗa̱ katsura, amma kutono ku wila̱ adama a ilikulyaꞋa ba, ili i nam pa ya i tsu ɓa̱nka̱ aza a na i o kutono u ɗa ba. 10Ci ta̱ n katalikalyuka, anan ganu† a na i aza a Yahuda i n utsura u na a lyaꞋa alyuka a na a lyukai a katalikalyuka ka ba.
11Mogono ma anan ganu ma ci ɗika ta̱ mpasa mu nnama u uka asuvu o Mololo ma na ma LaꞋi n Ciɗa, ta ɗe u tsu lyuka mpasa n nam pa adama a unushi. Amma o tsu songu ta̱ ikyamba yi nnama ya pulai va̱ a̱pa̱m. 12I ɗaɗa i zuwai ɗa Yesu u soꞋi atakaci pulai vu ubirini, adama a na u ciya̱ u bonoko uma a̱ ni ciɗa nu mpasa n ni. 13Adama a nannai yaꞋan tsu bana ɗe wa̱ ni pulai va̱ a̱pa̱m va, ka̱ta̱ tsu pana icuꞋu i wono i na a̱yi u panai. 14Ci n ubirini u na u kuyongo ko wanai punu a iɗika na ba, amma ci ta̱ a kuvana ubirini tsu nan lo.
15Ka̱sa̱kpa̱ ci lyaꞋa kelime n kuyaꞋan alyuka a kucikpa Ka̱shile a̱ ka̱tsuma̱ ka kula ku Yesu, ɗaɗa kucikpa ka aza a na e kuɗeke kula ku ni. 16Ka̱ta̱ i cinukpa kuyaꞋan kasingai ba, ka̱ta̱ kpamu i ɓa̱nka̱na̱i, adama a na ɗaɗa alyuka a na o yokpoi Ka̱shile. 17Panakai aza e kelime a̱ ɗa̱, ka̱ta̱ i yaꞋan ili i na a danai ɗa̱ i yaꞋan. I ta̱ a̱ kula̱na̱ wuma u ɗa̱ babu kuvuka, adama a na e yeve ta̱ mayun i ta̱ a kudana Ka̱shile uteku u na ele a̱ ɓa̱nka̱i ɗa̱. I panaka le baci, i ta̱ a kuyaꞋan ulinga u le m ma̱za̱nga̱. I panaka le baci ba, i ta̱ a kuyaꞋan u ɗa n una̱mgbuka̱tsuma̱, na lo va ta na u kuɓa̱nka̱ ɗa̱ ba.
18Ka̱ta̱ i ka̱sa̱kpa̱ kuyaꞋan kavasa adama a̱ tsu ba. Ci yeve ta̱ a na a̱ɗu a̱ tsu i ciɗa, ci ciga ta̱ feu kuyaꞋan ili i na yi derere ayin tutu. 19N folono ɗa̱ ta̱ n utsura u na mi n u ɗa ra̱ka̱ adama a na i yaꞋan kavasa, ka̱ta̱ Ka̱shile ka̱ suku mu m bono wa̱ ɗa̱ babu megeshe.
Avasa a ukocishi
20-21N yaꞋan ta̱ kavasa adama a na Ka̱shile ka̱ ma̱ta̱na̱ ke neke ɗa̱ ili i singai dem i na i nambai, adama a na i yaꞋan ili i na u cigai. U ɗengusa̱i Vuzagbayin vu tsu Yesu Kishi a̱ ukpa̱. Gogo na Yesu wi ta̱ tsu Maguɓi ma Gbayin, vuza na mpasa n ni n ɗa a yaꞋankai uzuwakpani u Ka̱shile nu nkyon n ni. Uzuwakpani u nam pa wi a̱ kukotso ba. N vasa ta̱ adama a na Ka̱shile ka yaꞋan punu wa̱ tsu ili i na i yokpoi ni, a̱ ubuta̱ u Yesu Kirisiti Kishi. A̱yi ɗa e kuneke tsugbayin ko wanai n ko wanai. Ta nannai.
22Uma a̱ va̱, n folono ɗa̱ ta̱ i zuka mayin n akaka o kudokusu katsura a nam pa. Akaka a kenu a ɗa koci.
23N ciga ta̱ i yeve a na a shikpai ɗe vuza tsu Timoti a̱ ubuta̱ wu ugbashi. U yawa baci gogoꞋo, dem vu tsu ci ta̱ a̱ kuta̱wa̱ ce kene ɗa̱.
24Kya̱sa̱i aza e kelime a̱ ɗa̱ ra̱ka̱ n uma a̱ Ka̱shile ra̱ka̱.
Aza o Kutoni a na i Italiya i a nwalu nu mpa, i ta̱ feu ikya̱shi i ɗa̱.
25Ka̱sa̱kpa̱ kasingai ka̱ Ka̱shile ko yongo n a̱ɗa̱ ra̱ka̱.
Currently Selected:
Aza a Ibrahim 13: asgNT
Highlight
Copy
Compare
Share
Want to have your highlights saved across all your devices? Sign up or sign in
© 2012 Wycliffe Bible Translators, Inc. All rights reserved
