Popular Bible Verses from Aza a Ibrahim 11

Share

Aza a na e nekei a̱ɗu n Ka̱shile a̱ ushuku ta̱ mayun a na u kuneke le ili i na e keɗekei a̱pa̱Ꞌa̱. A̱ ushuku ta̱ mayun ɗa n ili i na ka̱ta̱ a saꞋwai kene ba. Ka̱shile ku ushuku ta̱ n uma a mani-mani adama a uneki wa̱ a̱ɗu u le.

Uneki u ka̱ɗu wi baci lo ba, vuza wa kufuɗa wa zuwa Ka̱shile ka pana uyoꞋo u ni ba. Vuza na baci de dem u ta̱wa̱i u Ka̱shile, mayun ɗa wu ushuku a na Ka̱shile ki n wuma, a̱yi ɗa kpamu u tsu tsupa aza a na i a̱ kula̱nsa̱ yi mayun.

Ci ta̱ n uneki u ka̱ɗu, i ɗaɗa i zuwai ɗa ci yevei a na Ka̱shile ka yaꞋin kadanshi, n uye u nam pa u ɗa u yaꞋin aduniyan n ili i na yi punu dem. Ana u yaꞋin nannai, u yaꞋan ta̱ ulinga n ili i na vuma u kene ba, adama a na u yaꞋan ili i na ce kene.

Ibrahim wi ta̱ n uneki u ka̱ɗu, i ɗaɗa i zuwai ɗa u panakai Ka̱shile ana u ɗekei ni u bana a̱ ubuta̱ u yoku u na u yaꞋin uzuwakpani u kuneke yi. U ka̱sa̱kpa̱i iɗika i ni, u yeve ta na ubuta̱ u na u gaꞋin u bana ba. Adama a na Ibrahim wi n uneki u ka̱ɗu, u yongoi tsu komoci a iɗika yu uzuwakpani. U yongoi ɗe a̱ ka̱pa̱m, ta feu ntsukaya n ni, Ishaku n Yakubu a yaꞋin nannai. Ɗa Ka̱shile ke nekei le feu uzuwakpani u te.

Nuhu† wi ta̱ n uneki u ka̱ɗu, i ɗaɗa i zuwai ɗa u panai ana Ka̱shile ka danai ni ukuna wi ili i na ka̱ta̱ u saꞋwai kene ba. U panakai Ka̱shile ɗa u sheꞋwei kpantsu ku gbayin adama a na wi isa kpaꞋa ku ni. A̱ ubuta̱ wu uneki u ka̱ɗu u ni u ɗa, u yotsongi a na aduniyan a nusai, ɗa wo okpoi vuza te a̱ ka̱tsuma̱ ka aza a na o bonokoi n usuɓi n Ka̱shile a̱ ubuta̱ wu uneki u ka̱ɗu u ni.

Anuhu wi ta̱ n uneki u ka̱ɗu, i ɗaɗa i zuwai ɗa Ka̱shile ka ɗikai ni a kubana gaɗi u ciya̱ u kuwa̱ ba. E ene ikyamba i ni ba, adama a na Ka̱shile ka ɗika yi ta̱ ɗe. Katagarda ka Ciɗa ka danai kafu Ka̱shile ka ɗika yi a kubana gaɗi, u zuwa ta̱ ɗe Ka̱shile ka panai uyoꞋo n a̱yi.

Habila† wi ta̱ n uneki u ka̱ɗu, i ɗaɗa i zuwai ɗa u yaꞋin alyuka u Ka̱shile a uye u na u laꞋi alyuka a na Kayinu† u yaꞋin n kugaꞋan. Ka̱shile ka danai ka pana ta̱ uyoꞋo n kuneꞋe ku na u lyukai, ɗa u ɗekei ni vuma vu usuɓi. Ko a na wo okpoi ɗe magasa mani-mani, ukuna u ni u buwa ta̱ a kuyaꞋan kadanshi n a̱tsu adama a uneki u ka̱ɗu u ni.

Saratu† koɓolo n Ibrahim i ta̱ n uneki u ka̱ɗu, i ɗaɗa i zuwai ɗa a fuɗai a matsai maku, ko a na a kutsai ka̱u ɗa Saratu kpamu wi madari. Ibrahim u neke ta̱ ka̱ɗu a na Ka̱shile ki a kuyaꞋan ili i na u yaꞋin uzuwakpani.

Ibrahim u yaꞋan ta̱ ili i nam pa, adama a na wi ta̱ a kuvana a na wa uwa a̱ ubirini u na Ka̱shile ka̱ ira̱i ɗa ka maꞋi, u na i kuyongo ko wanai.

Musa wi ta̱ n uneki u ka̱ɗu, i ɗaɗa i zuwai ana u gbonguroi, ɗa u iwain kushuku e ɗeke yi maku me mekere mo mogono ma Masar. U cikalai kusoꞋo atakaci koɓolo n uma a̱ Ka̱shile, a na wa pana uyoꞋo wu unushi u ayin kenu. We ene ta̱ u laꞋa ta̱ n kugaꞋan u takacika adama a̱ Kirisiti Kishi, a na wa̱ ciya̱ uciyi u Masar ra̱ka̱, adama a na wi ta̱ a kindana katsupu ka̱ Ka̱shile ka na ki lo a̱ kuta̱wa̱. Adama a uneki u ka̱ɗu u ni, Musa u ka̱sa̱kpa̱i Masar, ɗa u kpa̱ɗa̱i kupana wovon u wupa u mogono. Musa u lyaꞋi kelime nannai adanshi wi ta̱ e kene Ka̱shile ka na vuza wa kufuɗa we kene ba.

Ibrahim wi ta̱ n uneki u ka̱ɗu, i ɗaɗa i zuwai ɗa u nekei Ishaku tsa alyuka ana Ka̱shile ko kondoi ni. Ibrahim ɗa vuza na Ka̱shile ka yaꞋankai uzuwakpani wa, amma u foɓusoi adama a na u neke maku me te ma̱ ni koci tsa alyuka.

Rahapu† kashakanlai kaꞋa, wi ta̱ n uneki u ka̱ɗu, i ɗaɗa i zuwai ɗa u rabasai aza a kasaka a Yahuda. Ɗaɗa i zuwai ɗa a̱ kpa̱ɗa̱i kuna yi, ana a unai aza a na a iwain kupanaka Ka̱shile.

Uma i ta̱ n uneki u ka̱ɗu, i ɗaɗa i zuwai ɗa a pasai Mala ma Shili† adanshi iɗika i ɗekpu i ɗa. Amma ana aza a Masar o tonoi, ɗa a̱ kuwa̱i punu a mala ma ra̱ka̱.

Uma a̱ Ka̱shile i ta̱ n uneki u ka̱ɗu. Ana a walai ɗa a̱ ka̱ra̱Ꞌi likuci i Jeriko ali ayin e cindere, ɗa mashilya ma̱ ni ma̱ yikpa̱i.

Adama a uneki u ka̱ɗu u ni, u foɓusoi Ka̱ɗiva̱ ka Kupasamgbanai† ɗa u zazai mpasa a̱ utsutsu gaɗi n akambu dem adama a na vuza na u kutuka̱ n ukpa̱ u kpa̱ɗa̱ kuna ngaji mi Israila.

Isuhu wi ta̱ n uneki u ka̱ɗu, i ɗaɗa i zuwai ɗa ana wi a̱ kukuwa̱, ɗa u yaꞋin kadanshi adama a ayin a na aza a Israila a̱ kuka̱sa̱kpa̱ iɗika i Masar. Ɗa u danai le a̱ pura̱ etele a̱ ni koɓolo n ele i baci a kulaza.

Yakubu wi ta̱ n uneki u ka̱ɗu, i ɗaɗa i zuwai ko a na wi a̱ kukuwa̱, u telekpe ka̱ci ka̱ ni a kalangu ka̱ ni ɗaɗa u cikpai Ka̱shile. Ɗa u zuwakai yaba dem vu muku n Isuhu† una̱singai.

Ishaku† wi ta̱ n uneki u ka̱ɗu, i ɗaɗa i zuwai ɗa u zuwakai muku n re n ni una̱singai, Yakubu† n Isuwa.† U yeve ta̱ a na Ka̱shile ka kuyaꞋanka le ili i singai na kelime.