Galatiya 6

Ɓa̱nka̱na̱i

1Uma a̱ va̱, ɗa baci vuza yoku a̱ ka̱tsuma̱ ka̱ ɗa̱ u yaꞋin unushi, ka̱ta̱ a̱ɗa̱ vu na yi n utsura a̱ ubuta̱ wa Ayinviki i bonoko vuma vu nan lo a uye u na wi derere. Amma i yaꞋan nannai sawu. Amma ka̱ta̱ i yaꞋan cicoꞋo, ta lo a̱ɗa̱ feu ya ciga kuyaꞋan icuꞋu yi ili i kavama i nan lo ya. 2Ɓa̱nka̱na̱i yi baci n ucanuku wa̱ a̱miki ka̱u kucanuku. I yaꞋan baci nannai, yi ta̱ a kuyaꞋan ili i na Kishi u cigai ɗa̱ i yaꞋan. 3Vuza na baci u ɗikai ka̱ci ka̱ ni vuza vu ma̱riki amma wi ta na nannai mayun ba, ka̱ci ka̱ ni kaꞋa wi a̱ kuya̱nsa̱. 4Ka̱sa̱kpa̱ yaba dem u kondo tsu na wi o kuyongo. U yaꞋan baci mayin, u kucuwa̱ ta̱ n ulinga u ni. Amma u gisanku ulinga u ni n wa aza o yoku ba. 5Yaba dem mayun u ɗika a̱miki a wawaꞋa a na i a̱ ka̱ci ka̱ ni koci.

6Vuza na dem wi a kupiꞋisa kuyotsongusu ku Ka̱shile, u gaꞋan ta̱ u pece ili i singai i na wi n i ɗa ra̱ka̱ m malum ma̱ ni.

7Ka̱ta̱ i ya̱nsa̱ ka̱ci ka̱ ɗa̱ ba: ka̱ta̱ i sheshe yi ta̱ a kufuɗa kuyaꞋanka Ka̱shile ugboji ba. Uma a ci kyaꞋa ta̱ ili i na a̱ ca̱Ꞌi koci. 8A̱ ca̱Ꞌa̱ baci adama a na a̱ cuwa̱ta̱ngu a̱shawuya a unushi e le, a̱shawuya e le i ta̱ a̱ kutuka̱ le n ukpa̱. Amma a̱ ca̱Ꞌa̱ baci adama a na Ayinviki a pana uyoꞋo, i ta̱ a̱ kuciya̱ wuma u babu uteku a̱ ubuta̱ wa Ayinviki. 9Ka̱ta̱ tso oꞋo n kuyaꞋan kasingai ba, ci ta̱ a̱ kuciya̱ vikyaꞋa vu wuma u babu uteku a ayin a na o yotsoi, ci lyaꞋa baci kelime n kasingai babu kuka̱sa̱kpa̱. 10Adama a nannai, yaꞋan ci yaꞋan kasingai u uma ra̱ka̱ a ayin a na ce enei ka̱ba̱nga̱ dem. Amma u laꞋa ta̱ n kugaꞋan ci yaꞋan kasingai wo otoku a̱ tsu aza o Kutoni.

Bulusu u kotsosoi odoki a̱ ni

11Ye ene ta̱ a̱gita̱tsu a gbagbaꞋin a na n yaꞋin ana n ɗanai n ekiye a̱ va̱.

12Aza a na a cigai Ayahuda a pana uyoꞋo, ele ɗa a gbagbalai adama a na a gutsa ɗa̱ i kiɗa avaja. I ta̱ a kupana wovon ta lo Ayahuda a zuwa le a takacika o tono baci maɗanga ma atakaci ma̱ Kishi koci. 13Aza a na a kiɗai ɗe avaja, ele feu a̱ ka̱ci ke le o tsu tono Wila̱ wa ba, amma a ciga ɗa̱ ta̱ i kiɗa avaja adama a na a̱ ciya̱ a̱ ka̱ga̱ adama a ili i na a gutsakai ɗa̱ i yaꞋan. 14Tsu va̱ tsu ɗa baci, n ciga n ka̱ga̱ adama a ili ba, saidei ukpa̱ u Vuzagbayin vu tsu Yesu Kishi a maɗanga ma atakaci. Adama a maɗanga ma atakaci ma nan lo, n doku n yongo tsu na uma a aduniyan a nam pa i o kuyongo ba. E yeve ta na ili i na i zuwai ɗa mi o kuyongo tsu na mi ba. 15Ko vuma u kiɗa baci kavaja, ko u kiɗa ba, wi n kakuna ba. Ili i na i laꞋi n kokpo i makara i ɗaɗa vuma wi isa ta̱ wuma u savu u Ka̱shile. 16Ka̱shile ki ta̱ e kuneke ma̱ta̱na̱ ma̱ ni wa aza a na o tonoi kadanshi ka nam pa ra̱ka̱, ka̱ta̱ kpamu u zuwaka le una̱singai. Uma a nan lo a ele ɗa uma a mayun a̱ Ka̱shile.

17A̱ kugita̱ gogo na a kubana kelime, ka̱ta̱ i ka̱sa̱kpa̱ vuza u takacika mu n ili i nam pa ba. Alana a na mi na a ɗa a ikyamba i va̱ o yotsongu ta̱ a na mpa vuza vi Yesu ɗa.

18Uma a̱ va̱, yaꞋan kasingai ka Vuzagbayin Yesu Kishi vu tsu ko yongo n a̱ɗa̱ ra̱ka̱. Ta nannai.

Currently Selected:

Galatiya 6: asgNT

Highlight

Copy

Compare