Galatiya 5

Kirisiti Kishi u ci neke ta̱ uba̱ruwi

1Ci ta̱ n uba̱ruwi gogo na, adama a na Kishi ka zuwa tsu ta̱ tsu ba̱ruwa̱. Adama a nannai, shamgbai n utsura. Ka̱ta̱ i sabaꞋa yo okpo agbashi a̱ Wila̱ kpamu ba.

2Panai! Mpa Bulusu, n danai ɗa̱ ili i nam pa: Yu ushuku baci ɗa a kiɗai ɗa̱ avaja, ashe Kishi wo okpo ta̱ ukuna u gbani wa̱ ɗa̱. 3Mi ta̱ a kudana ɗa̱ kpamu n utsura, vuza na baci dem u ciya̱i ukiɗi u kavaja sai u tono Wila̱ ra̱ka̱. 4I gbagbala baci kpamu adama a na i zuwa Ka̱shile ka pana uyoꞋo adama o kutono ku Wila̱, i pece ta̱ ka̱ci ka̱ ɗa̱ n Kishi, ɗa i iwain kisa kasingai ka̱ Ka̱shile. 5Ayinviki a ɗa a tsu zuwa tsu ci yeve a na mayun ɗa Ka̱shile ka kisa tsu tsa aza a̱ usuɓi adama a na ci neke ta̱ a̱ɗu n Kishi. 6A̱ɗa̱ aza o Kutoni† e Yesu Kishi a ɗa baci yi, wi n kakuna ba, ko a kiɗa ɗa̱ avaja ko babu. Ili i na i laꞋi n kugaꞋan i ɗaɗa uneki u ka̱ɗu u ɗa̱ u tsu zuwa ɗa̱ ta̱ i ciga uma.

7Uteku u na yi ishi o kutono Kishi wi ta̱ a kulyaꞋa kelime mayin, ali sai ayin a na vuza yoku u zuwai ɗa̱ i shirikpa̱ka̱ ukuna u mayun kucina̱. 8Mayun ɗa ta na vuza nan lo va Ka̱shile kaꞋa ba, vuza na u zagbai ɗa̱. 9Kusasu kenu ku tsu zuwa ta̱ ma̱ra̱ ma shita ka̱u. Ili i na kakuna ka nam pa ki a kudana i ɗaɗa, kuyotsongusu ka aꞋuwa kenu ku tsu ya̱nsa̱ ta̱ uma n a̱bunda̱i. 10Amma mpa mu ushuku ta̱ n Vuzagbayin, yi a̱ kushuku nu nlum ma aꞋuwa n nan lo ba, amma yi ta̱ o kutono ili i na n danai. Ka̱shile ki ta̱ a kutakacika vuza na wi a̱ kuripula̱sa̱ ɗa̱, ko yayi vuza nan lo wi.

11Uma a̱ va̱, mi baci a kuyaꞋan kadanshi ka na sai uma a kiɗa avaja, yi ɗa̱i i zuwai Ayahuda i a kutakacika mu ayin tutu? Mi baci a kuyaꞋan kadanshi ka nan lo, a na ma yaꞋan kadanshi ku ukpa̱ u Kishi, mi ishi a kunusaka le ba. 12N cikala ta̱ yaba dem vu na wi a kugbandarasa ɗa̱, u kiɗa kavaja koci ba, amma ali n arawa u ɓoso.

13Uma a̱ va̱, Ka̱shile ke ɗeke ɗa̱ ta̱ i ba̱ruwa̱! Amma ka̱ta̱ i ka̱sa̱kpa̱ uba̱ruwi u nan lo wo okpo ilaꞋatsu i na i tono a̱shawuya a̱ unushi u ɗa̱ ba. Kucikpa i ciganai ka̱ta̱ i yaꞋankpanai tsugbashi. 14Wila̱ ra̱ka̱ derere ɗa wi n kadanshi ku utsura ke te ka nam pa: “Ciga vuza uteku u na vi cigai ka̱ci ka̱ nu.”#A.Gan. 19:18. 15Amma i lyaꞋa baci kelime m mawansa uteku u ɗa̱ n kunekenei atakaci, i zuka baci ba, yi ta̱ a̱ kula̱nga̱sa̱na̱i gbende gbende.

Ayinviki a̱ Ka̱shile n ili i na ci ci cikala

16Adama a nannai n dana ɗa̱: ka̱sa̱kpa̱i Ayinviki o tono n a̱ɗa̱, ka̱ta̱ i ciya̱ i kpa̱ɗa̱ kutono ili i kavama i na i ci ci cikala. 17Ayinviki n ili i na i ci cikala i ta̱ a tsurala. I ta̱ a̱ vishili uteku u le ayin tutu, adama a na i kpa̱ɗa̱ kuyaꞋan ili i na i cigai kuyaꞋan. 18Amma Ayinviki a ɗa baci i o kutono n a̱ɗa, Wila̱ wi a kulyaꞋa tsugono wa̱ ɗa̱ ba.

19Yaba dem u yeve ta̱ ili i na a̱shawuya a ci yaꞋan: A tsu vaku ta̱ n vuza na i o yolo koɓolo ba. A ci yaꞋan ta̱ ulinga u wono, o ci yongo ta̱ e kusheshe ukuna u tsugbani ka̱u. 20A ci cikpa ta̱ a̱ma̱li. A ci yaꞋan ta̱ nkunu. A ci iwan ta̱ uma. A̱ ci shilika̱ ta̱ uteku u le. A tsu zuwa ta̱ uma e pece kumaci. A ci cikala ta̱ ili i uma. A ci yaꞋan ta̱ n wupa. A ci yaꞋan ta̱ n ucigi u ka̱ci ke le. E ci pecuku ta̱ ka̱ci ke le ugboku kakau. E ci pecuku ta̱ ugboku wawaꞋa. A ci yaꞋan ta̱ cisheꞋe ci ili i uma. O tsu soꞋo ta̱ ka̱ta̱ ma maka le. A tsu bana ta̱ ka̱ɗiva̱ ka na uma a̱ tsu kpa̱ɗa̱ kushiya aci e le, ka̱ta̱ kpamu a yaꞋan ili i kavama i yoku tsu nam pa. 21N kushangu ɗa̱ ta̱ ɗe, mi ta̱ a kushangu ɗa̱ kpamu: Aza a na a ci yaꞋan ili i nam pa i a̱ kuciya̱ una̱singai u tsugono tsu Ka̱shile ba.

22Amma Ayinviki a̱ Ka̱shile i baci o kutono n a̱tsu wi ta̱ a kumatsa ili i nam pa: I yongo m maciganai. I yongo kpamu m ma̱za̱nga̱. Yo okpo aza a̱ ma̱ta̱na̱. I yaꞋan n kureme ku ka̱ɗu ka̱ta̱ i ɓa̱nka̱na̱i. I yaꞋankpanai kasingai. I yaꞋan m mayun a̱ ubuta̱ wi ili dem. 23Yo okpo aza a̱ ma̱riki, n kuka̱na̱ ku ka̱ci ka̱ ɗa̱. Wila̱ wi lo u na u kufuɗa kusa̱nka̱ ɗa̱ kuyaꞋan ili i nam pa ya ba. 24Uma i baci o kutono Yesu Kishi, a̱ ka̱sa̱kpa̱ ta̱ uye wu unushi u le u kuyongo n kusheshe ku wuya ku le ra̱ka̱. 25Adama a na Ayinviki a̱ Ka̱shile e neke tsu ta̱ wuma u savu, yaꞋan ci yaꞋan ili i na u danai tsu ci yaꞋan. 26Ka̱ta̱ ci yaꞋan a̱ra̱ɗi, ko tsu takacikanai uteku u tsu, ko ci yaꞋan cisheꞋe uteku u tsu ba.

Currently Selected:

Galatiya 5: asgNT

Highlight

Copy

Compare