Afisu 1

Ikya̱shi a̱ ubuta̱ u Bulusu

1Mpa Bulusu mi ta̱ a kuɗana akaka a nam pa. Mpa feu vuzavusuki vi Yesu Kirisiti Kishi ɗa, adama a na Ka̱shile kaꞋa ka zagbai mu mo okpo nannai. Mi ta̱ a kuɗanaka aza a ciɗa a̱ Ka̱shile a na i a Afisu aza a na i o kutono Yesu Kishi ayin tutu.

2YaꞋan Ka̱shile Esheku a̱ tsu n Vuzagbayin Yesu Kishi u yaꞋanka ɗa̱ kasingai ka̱ta̱ u neke ɗa̱ ma̱ta̱na̱.

Una̱singai adama a̱ Kishi

3Ci neke ucikpi a kubana u Ka̱shile n Esheku a Vuzagbayin a̱ tsu Yesu Kishi. A̱yi ɗa vuza na u zuwakai tsu una̱singai a̱ ubuta̱ u na u nekei tsu ili i singai ra̱ka̱ i na yu uta̱i gaɗi adama a na i ɓa̱nka̱ wuma u tsu a̱ ubuta̱ wi ida̱shi wa ayinviki a singai. U yaꞋan ta̱ nannai ana u ɓolongi tsu n Kishi. 4Kafu Ka̱shile ka yaꞋan aduniyan, u zagba tsu ta̱ tso okpo uma a̱ ni a̱ ubuta̱ u na u ɓolongi tsu n Kishi. U yaꞋan ta̱ nannai adama a na tso okpo ciɗa a kubana wa̱ ni, a̱ kuciya̱ kpamu ili i gbani-gbani wa̱ tsu i na u kutaɗaka tsu ba. 5Adama a na Ka̱shile ki ta̱ a kuciga tsu, a̱yi u sheshe ta̱ ili i na u kuyaꞋanka tsu m megeshe ma ɗe wi ta̱ o kubonoko tsu muku n ni a̱ ubuta̱ wi ili i na Yesu Kishi u yaꞋin. Ka̱shile ka yaꞋan ta̱ nannai adama a na ta u gaꞋin ni nannai, ta kpamu u cigai kuyaꞋan nannai.

6Ci cikpa yi ta̱ adama a ili i gbagbaꞋin i singai i na u yaꞋankai tsu. U nekei tsu kasingai ka nan lo gbani, a̱ ubuta̱ u Kishi vuza na u cigai. 7A̱ ubuta̱ u Yesu Kishi ɗa tso okpoi ba̱ri adama a̱ ubuta̱ wu mpasa mu ukpa̱ u ni, i ɗaɗa i zuwai ɗa a cinukpakai tsu unushi u tsu. Nahannai ɗa Ka̱shile ko yotsongi tsu a na kasingai ka̱ ni ki gba̱ra̱, ɗa u yotsongi tsu kaꞋa n a̱bunda̱i. 8Adama a na Ka̱shile ki ta̱ n ugboji, u yeve ta̱ kpamu ili ra̱ka̱, u yaꞋan ta̱ ili i na u cigai kuyaꞋan.

9U yotsongu tsu ta̱ ili i na yi ishi usokongi, i na u foɓusoi kuyaꞋan a̱ ubuta̱ u Kishi. 10A ayin a na a gaꞋin a yawa baci, kusheshe ku ni ku ɗa u ɓolongu ili ra̱ka̱ i na yi gaɗi n iɗika a̱ ubuta̱ u te m mogono me te, a̱yi ɗa ta na Kishi.

11Ka̱shile ka zagba tsu ta̱ tso okpo uma a̱ ni a̱ ubuta̱ u na u ɓolongi tsu n Kishi. U yaꞋan ta̱ nannai adama a na u sheshe ta̱ ɗe m makyan ma ɗe, ɗa u zuwai kpamu ili i yaꞋan nannai uteku u na wi a kuciga i ɗa dem.

12U yaꞋan ta̱ nannai adama a na a̱tsu, aza a na e keɗei a̱pa̱Ꞌa̱ n cau u Kishi, tsu zuwa uma a cikpa Ka̱shile adama a na a̱yi wi ta̱ n tsugbayin. 13Ili i te i ɗa kpamu yi mayun a̱ kuta̱wa̱ wa̱ ɗa̱. I pana ta̱ Arabali a Singai a ɗa kpamu akaka a mayun ɗa ta na Ka̱shile ka isai ɗa̱. I neke ta̱ a̱ɗu a̱ ɗa̱ u Kishi, ɗa o ɓolongi ɗa̱ n a̱yi. Adama a nannai Ka̱shile ke nekei ɗa̱ Ayinviki a̱ ni a na u yaꞋankai uma a̱ ni uzuwakpani. Ayinviki a̱ ni i ta̱ tsu urotu u na wi o kuyotsongu a na yi uma a̱ Ka̱shile. 14Adama a na a̱tsu ci isa ta̱ Ayinviki a̱ Ka̱shile, a̱tsu kpamu ci ta̱ e kuyeve babu munla̱i a na Ka̱shile ki e kuneke tsu ili i singai i na u yaꞋin uzuwakpani. Ci yeve ta̱ kpamu Ka̱shile ki ta̱ e kuneke tsu ida̱shi i ba̱ri mayin a kubana wa aza a na i uma a̱ ni. Ili i nam pa ya yi ta̱ a kuzuwa uma a cikpa Ka̱shile adama a na wi ta̱ n tsugbayin.

Kavasa ka̱ Bulusu

15Adama a na Ka̱shile ka zuwaka tsu ta̱ una̱singai nahannai, mi ta̱ a kuyaꞋan kavasa a kubana wa̱ ni adama a̱ ɗa̱. Ali ayin a na m panai a na yu ushuki n Vuzagbayin Yesu, ɗa kpamu i cigai uma a̱ Ka̱shile ra̱ka̱, 16n ci yongo ta̱ a kucikpa Ka̱shile adama a̱ ɗa̱ ayin dem. Ayin a na baci de dem mi a kuyaꞋan kavasa, n tsu vasa ta̱ adama a̱ ɗa̱. 17Mi ta̱ a kuyaꞋan kavasa a kubana we Esheku a̱ tsu vuza na wi n tsugbayin n a̱bunda̱i. A̱yi ɗa Ka̱shile ka Vuzagbayin vu tsu Yesu Kishi. N folono yi ta̱ u neke ɗa̱ ugboji, ka̱ta̱ u yotsongu ka̱ci ka̱ ni a kubana wa̱ ɗa̱, adama a na i doku i yevesheke yi mayin. 18Mi ta̱ a kuyaꞋan kavasa kpamu adama a na u zuwa ɗa̱ i yeve mayin, ka̱ta̱ i yeve ili i singai i na wi n i ɗa adama a̱ ɗa̱. Yi ta̱ a kuvana yi isa ili i singai i nam pa, adama a na u ɗeke ɗa̱ ta̱ yo okpo muku n ni. N yaꞋan ta̱ kpamu kavasa i yeve feu mgbayin mu una̱singai n na u yaꞋin uzuwakpani u kuneke uma a̱ ni.

19Mi ta̱ kpamu a kuyaꞋan kavasa adama a na a̱ɗa̱ i yeve utsura u ni u na u lazai ili ra̱ka̱, u na kpamu wi a̱ kuɓa̱nka̱ tsu a̱tsu na ci nekei a̱ɗu. Ɗaɗa utsura u gbayin u te ta na 20u na u yaꞋankai ulinga ana u zuwai Kishi ka̱ ɗenga̱ n wuma kpamu, ɗa u zuwai ni u da̱sa̱ngu a̱ ubuta̱ u tsugbayin e kukiye ku usingai ku ni ɗe gaɗi.†

21Kishi wi ta̱ a kulyaꞋa tsugono a̱ ubuta̱ wu utsura kakau u gbagbaꞋin ra̱ka̱ aza a na i ɗe ko a na i n utsura ka̱u. Kula ku ni ku laꞋa ta̱ kula ku ngono n na mi a kulyaꞋa tsugono ra̱ka̱. Na va mayun ɗa gogo na, wi ta̱ kpamu a kuyaꞋan mayun ayin a na i lo a̱ kuta̱wa̱. 22Ka̱shile ke nekei Kishi tsugono ci ili ra̱ka̱, ɗa u zuwai ni wo okpo kaci ka̱ a̱Ꞌisa̱ a aza o Kutoni, 23ɗaɗa ikyamba i ciɗa. A̱Ꞌisa̱ a a ci isa ta̱ utsura u ni ra̱ka̱ a̱ ubuta̱ u Kishi, a̱yi ɗa kpamu vuza na wi e kuneke wuma wi ili i dem a̱ ubuta̱ dem.

Currently Selected:

Afisu 1: asgNT

Highlight

Copy

Compare