Afisu 4

Ikyamba i te

1Mi ta̱ a ugbashi adama a na mi ta̱ a kuyaꞋanka Vuzagbayin tsugbashi, n folono ɗa̱ ta̱, i yongo m ma̱riki a uye u na u yotsoi u na Ka̱shile ke ɗekei ɗa̱ i yongo. 2A̱ ubuta̱ wi ili i na yi a kuyaꞋan dem, yaꞋin babu a̱ra̱ɗi ka̱ta̱ yi indana uma a na a buwai n asuvu a̱ yuwu. Adama a na i ciga uma, remei a̱ɗu, ka̱ta̱ kpamu i yaꞋan wupa a ayin a na baci a yaꞋin ili i gbani-gbani ba. 3Ayinviki a̱ Ka̱shile o bonoko ɗa̱ ta̱ vi te, dakakai i yongo a̱ ubuta̱ u te m ma̱ta̱na̱, adama a na i lyaꞋa kelime n kokpo vi te. 4Ra̱ka̱ vu tsu ukambu wi ikyamba i te i ɗa ci. Ayinviki a̱ Ka̱shile e te a ɗa i lo koci. Ka̱shile kpamu ke nekei tsu a̱pa̱Ꞌa̱ e te kpamu a ayin a na u zagbai ɗa̱ yo okpo uma a̱ ni. 5Ra̱ka̱ vu tsu Vuzagbayin vi te ɗa tsu. Ci ta̱ kpamu o kutono kuyotsongusu ku te. Ci isa ta̱ kpamu kusumbu ka akucina ku te. 6Ra̱ka̱ vu tsu ci ta̱ o kutono Ka̱shile ke te, a̱yi ɗa kpamu Esheku a̱ tsu ra̱ka̱. A̱yi ɗa kpamu wi a kulyaꞋa tsugono ci ili dem, wi ta̱ kpamu a̱ ubuta̱ dem, ɗa wi punu kpamu u yaba dem vu tsu.

7Kishi ke neke ta̱ kpamu yaba dem vu tsu kuneꞋe adama a na ci yaꞋan ulinga u ni. U yaꞋan ta̱ nannai adama a kasingai ka gbayin ka̱ ni. 8Uteku u na Katagarda ka Ciɗa ka danai,

“Ana u banai a̱ ubuta̱ u na u laꞋi n gaɗi ka̱u,

u tonoi n agbashi n a̱bunda̱i a na u ka̱na̱i,

ɗa u nekei uma kuneꞋe kakau.”#Ishp. 68:18.

9(Gogo na mi ta̱ a kuciga i la̱na̱ kadanshi ka nam pa, “U bana ta̱ a̱ ubuta̱ u gaɗi ka̱u.” 10U bana baci a̱ ubuta̱ u gaɗi ka̱u, ili i na wi a kudana i ɗaɗa, wi ishi ta̱ u ta̱wa̱ a̱ ubuta̱ u ɗaka, ɗaɗa aduniyan a nam pa. Vuza na wu uta̱i gaɗi ɗa u ta̱wa̱i iɗika i nam pa, vuza te ɗa n vuza na u banai a̱ ubuta̱ u na u laꞋi n gaɗi ka̱u ra̱ka̱, adama a na u zuwa ili dem yo okpo tsu na i gaꞋin.)

11A̱yi ɗa vuza na u nekei kuneꞋe kakau ku nam pa ka wa aza o Kutoni: u zagbai aza o yoku o okpo azusuki, u zagbai uma o yoku o okpo eneki, aza o yoku kpamu aza a kudana uma kadanshi ka̱ Ka̱shile. Ɗa u zagbai uma o yoku kpamu a̱ la̱na̱ aza o Kutoni, ka̱ta̱ kpamu o yotsongusu le. 12U yaꞋan ta̱ nannai, adama a na uma a nam pa, o foɓuso uma a̱ Ka̱shile a yaꞋanka yi tsugbashi, ka̱ta̱ a aza o Kutoni a na i ikyamba i Kishi, o doku o gbonguro n utsura. 13A uye u nam pa, ra̱ka̱ vu tsu ci ta̱ o kuɓolongu tsu vuza te n tsu na tsu ushuki n Ka̱shile ɗa kpamu ci yevei Maku ma̱ ni, ra̱ka̱ vu tsu kpamu ci ta̱ o kokpo aza a na a lyaꞋi kelime. Ɗaɗa, ci ta̱ o kokpo ci Kishi mayin, vuza na wi derere tsu na u gaꞋin.

14Tso kudoku tsa buwa tsu muku kpamu ba. Ci kpamu o kokpo an kpantsu ku na aɓau a ci ɗika a kubanka a̱ ubuta̱ u na a cikalai ba. Tsa kuzuwa a̱ɗu a̱ tsu a̱ ubuta̱ wa aza a na i a kugbagbala kuya̱nsa̱ tsu n kuyotsongusu ka aꞋuwa ba. 15Tsu kucikpa tsu dansa ili i mayun, ka̱ta̱ ci ciga itoku i tsu, adama a na tsu gbonguro ka̱ta̱ tso okpo vi te n Kishi mayin, vuza na wi kaci ka̱ a̱Ꞌisa̱ a aza o Kutoni. 16Kishi ko ɓolongu ta̱ uma a̱ ni dem a̱ ubuta̱ u te, uteku u na akawa o tsu ɓolongu ukambu wi ikyamba i vuma ra̱ka̱. A ayin a na baci ukambu dem u yaꞋin ulinga u ni, u tsu ɓa̱nka̱ ta̱ akambu o yoku o gbonguro, adama a na ikyamba ya dem i yaꞋan m ma̱ta̱na̱ o kugbonguro n ucigi mayin.

Wuma u savu

17Adama a nannai, mi ta̱ a kudana ɗa̱, mi ta̱ a kudansuka ɗa̱ kpamu a̱ ka̱tsuma̱ ka kula ku Yesu, ka̱sa̱kpa̱i kuyongo tsa aza a na e yevei Ka̱shile ba. Uye u na a ci yaꞋan kusheshe, ukuna u gbani u ɗa. 18Ele i ta̱ a̱ ka̱yimbi, e yeve kpamu ili ba, adama a na a iwan ta̱ kupana. Tsu nan lo a̱ kuciya̱ wuma u na Ka̱shile ke ci neke ba. 19A yaꞋan baci kagbani-gbani, o tsu doku a pana wono ba. E neke ta̱ ka̱ci ke le a̱ ubuta̱ u kuyaꞋan ili i na ikyamba i cigai, a ci yaꞋan ta̱ unushi u tsugbani kakau dem, i kpamu a kufuɗa a̱ ka̱sa̱kpa̱ kuyaꞋan ili i nam pa ba.

20Amma avu, ana vi isai Kishi, ta a danai nu vi yongo nannai ba. 21N yeve ta̱ i pana ta̱ ukuna u ni, a̱ɗa̱ kpamu ta punu yi wa̱ ni, ɗa o yotsongi ɗa̱ ili i mayun i na yi punu a̱ ubuta̱ u Yesu. 22O yotsongusu ɗa̱ ta̱ i ka̱sa̱kpa̱ uye u kuku u na yi ishi o kuyongo n ci cau. N ayin a nan lo, wuma u ɗa̱ wi ta̱ a̱ kuna̱mgba̱ adama a na i ci ciga ta̱ kuyaꞋan ili i gbani-gbani kakau dem. 23Gogo na u gaꞋan ta̱ i ka̱sa̱kpa̱ Ka̱shile ka sabaꞋa wuma u ɗa̱ adama a na i gita̱ kuyaꞋan kusheshe ku savu. 24Ka̱sa̱kpa̱i Ka̱shile ko bonoko ɗa̱ uma a savu. Ka̱shile ka zuwa ɗa̱ ta̱ yo okpo ci ni, adama a nannai yo okpo kpamu ciɗa n usuɓi a̱ ubuta̱ u mayun.

25Ka̱sa̱kpa̱i kuyaꞋan aꞋuwa. Yaba dem vu ɗa̱ u dansa ili i mayun u vutoku vuza vu Kutoni, adama a na ci ta̱ tsu ukambu kakau wi ikyamba i te. 26A ayin a na baci vi yaꞋin wupa, ka̱ta̱ vi yaꞋan unushi ba, ka̱ta̱ vu zuka vu ka̱sa̱kpa̱ kuyaꞋan wupa kafu kanna ka̱ yikpa̱. 27Ka̱ta̱ i neke Kalijani uye u lyaꞋa utsura u ɗa̱ ba. 28Vuza na wi ishi koboki u doku u yaꞋan uboki ba. A na wa yaꞋan nannai, u yaꞋan ulinga ka̱u adama a na u ciya̱ ili i na u kuɓa̱nka̱ aza a unambi.

29Ka̱ta̱ vi ya yaꞋan kadanshi ka gbani-gbani ba, amma vu dansa ili i singai i na i kuzuwa uma a gbama. Dansa ili i na i gaꞋin adama a aza a na a kupanaka wu ka̱ta̱ ili i na vu dansai i gaꞋan le. 30Ka̱ta̱ vu zuwa Ayinviki a̱ Ka̱shile a̱ na̱mgba̱ ka̱tsuma̱ ba. Adama a na Ayinviki a̱ Ka̱shile a ɗa o okpoi tsu urotu u na u yotsongi a na a̱ɗa̱ aza a̱ ni a ɗa. Ka̱shile ke neke ɗa̱ ta̱ Ayinviki adama a na u yotsongu Ka̱shile ki ta̱ a kuzuwa ɗa̱ i ba̱ruwa̱, kanna ku ukocishi ka yawa baci.

31Ka̱sa̱kpa̱i mokovonoi, n wupa, n kuna̱mgba̱ ka̱tsuma̱ n uma. Ka̱ta̱ i yaꞋan kanananai ko i shika uma, ko i yaꞋan ili i yoku i wupa i na i kutuka̱ n atakaci ba. 32A na ya yaꞋan nannai, yaꞋankpanai kasingai, ka̱ta̱ i yotsongu asuvayali. Cinukpakai uma a ayin a na baci a nusakai ɗa̱, tsu na Ka̱shile a̱ ka̱ci ka̱ ni u cinukpakai ɗa̱ unushi u ɗa̱ adama a̱ Kishi.

Currently Selected:

Afisu 4: asgNT

Highlight

Copy

Compare