Afisu 5

Ida̱shi a̱ ubuta̱ u kutashi

1Yongoi tsu na Ka̱shile ki, adama a na a̱ɗa̱ muku n ni n ɗa n na u cigai ka̱u. 2Ciga uma ayin tutu uteku u na Kishi ka cigai tsu, ali ɗa u kuwa̱i adama a̱ tsu. U nekei wuma u ni tsa alyuka u Ka̱shile, ɗaɗa wo okpoi ci ili i ma̱gula̱ni† a̱ ubuta̱ u Ka̱shile.

3Ka̱ta̱ i ka̱sa̱kpa̱ a cina unushi u tsugbani e mere ma̱ ɗa̱ ba, ko ili i yoku i wono, ko kuciga ili n a̱bunda̱i. IcuꞋu yu unushi i nan lo i kuciya̱ ubuta̱ wi ida̱shi e mere ma uma a̱ Ka̱shile ba. 4U gaꞋan kpamu i yaꞋan kadanshi ko wono e mere ma̱ ɗa̱, ko i yaꞋan kadanshi ka tsulau m ma̱ɗa̱ɗi ma wasasa ba. A na ya yaꞋan nannai, kucikpai i cikpa Ka̱shile adama a ili i na wi a kuyaꞋan adama a̱ ɗa̱. 5I yeve ta̱ ili i nam pa ya mayun ɗa: Vuza na baci wi a kuyaꞋansa unushi u tsugbani, ko kuyaꞋansa i gbani-gbani, ko kuciga ili n a̱bunda̱i, vuza nam pa u kuꞋuwa o tsugono ci Kishi n tsu Ka̱shile ba. Vuza na wi n ucigi wi ili n a̱bunda̱i wi ta̱ a kuyaꞋanka ka̱ma̱li tsugbashi. 6Ka̱ta̱ i ka̱sa̱kpa̱ vuza u ya̱nsa̱ ɗa̱ a̱ ubuta̱ u kudana ɗa̱ ili i na yi ya aꞋuwa ba. Megeshe ma buwa ka̱u ba, ana Ka̱shile ka kutakacika uma a na a̱ kpa̱ɗa̱i kupanaka yi, ɗa i a kuyaꞋan ili i gbani-gbani i nan lo. 7Ka̱ta̱ i ɓolongu ka̱ci ka̱ ɗa̱ n aza a na i a kuyaꞋan ili i gbani-gbani i nan lo ba.

8N ayin a cau, yi ta̱ a̱ ka̱yimbi, amma gogo na yi ta̱ uɓolongi n Vuzagbayin, ɗa i uwai kpamu a kutashi. Tsu nan lo i yongo an uma a na i a̱ ubuta̱ u kutashi. 9N dana ta̱ nannai adama a na kutashi ku tsu zuwa ta̱ uma a yaꞋan ili i singai, n i na yi derere, n i mayun.

10Adama a nannai, piꞋisai ili i na i yokpoi Vuzagbayin ka̱ta̱ i yaꞋan i ɗa. 11Ka̱ta̱ i ɓolongu ka̱ci ka̱ ɗa̱ a kuyaꞋan ili n uma a na i a̱ ka̱yimbi ba. Ili i nan lo ya i wasasa i ɗa. A na ya yaꞋan nannai, zuwai uma e yeve a na ili i nam pa i gbani-gbani i ɗa. 12Ili i wono i ɗa vuza u dansa ili i na uma a nan lo i a kuyaꞋan a usokongi. 13Amma ayin a na baci kutashi ka akanai le, yaba dem wi ta̱ e kene uteku u na ili ya i yotsoi, 14adama a na kutashi ku tsu yotsongu ta̱ ili dem. Ɗaɗa i zuwai ɗa a danai,

“A̱ɗa̱ vu na yi alavu, jimgbai!

Ɗenga̱i a̱ ukpa̱,

Kishi ki ta̱ a kakana ɗa̱.”

15Adama a nannai, zukai n uteku u na yi o kuyongo. Ka̱ta̱ i yongo tsa alau ba, amma yongoi n ugboji. 16YaꞋin ulinga n ayin a na i ciya̱i dem adama a kuyaꞋan ulinga u singai, adama a na uma a ci yaꞋan ta̱ kagbani-gbani a ayin a nam pa a. 17Ka̱ta̱ yo okpo alau ba, amma piꞋisai ili i na Vuzagbayin wi a kuciga i yaꞋan. 18Ka̱ta̱ i soꞋo ali ma maka ɗa̱ ba, adama a na ili i nan lo i ɗaɗa i kula̱nga̱sa̱ ɗa̱. A na ya yaꞋan nannai, ka̱sa̱kpa̱i Ayinviki a̱ Ka̱shile a shana punu wa̱ ɗa̱. 19Cananai ishipa i kucikpa Ka̱shile kakau dem adama a na i nekenei katsura ka̱ a̱ɗu. YaꞋin ishipa i na i kucikpa Vuzagbayin n a̱ɗu a̱ ɗa̱ dem. 20Nekei Ka̱shile Esheku a̱ tsu tsugbayin ayin tutu, adama a Vuzagbayin vu tsu Yesu Kishi.

A̱ma̱ci n ali

21Panakpanai, adama a na i neke Kishi tsugbayin.

22A̱ɗa̱ a̱ma̱ci, panakai ali a̱ ɗa̱ uteku u na yi a kupanaka Vuzagbayin, 23adama a na vali a̱yi ɗa kaci ka vuka, tsu na Kishi wi kaci ka̱ a̱Ꞌisa̱ a aza o Kutoni, ɗaɗa ta na ikyamba i ni. A̱yi ɗa kpamu vuza na wi a kisa i ɗa. 24Adama a nannai vuka dem u panaka vali vi ni a̱ ubuta̱ wi ili dem, uteku u na aza o Kutoni i a kupanaka Kishi.

25A̱ɗa̱ ali a na i yaꞋin yolo, yaba dem u ciga vuka vi ni, uteku u na Kishi ka cigai a̱Ꞌisa̱ a aza o Kutoni ali u kuwa̱i adama a ɗa, 26ciya̱ u bonoko a ɗa ciɗa. U tsu za̱Ꞌa̱ le ta̱ m mini n kadanshi ka̱ ni feu. 27U yaꞋan ta̱ nannai adama a na u bonoko aza a̱ a̱Ꞌisa̱ a̱ ni an vuka vu savu n tsuloboi, ka̱ta̱ u tuka̱ yi wa̱ ni tsu vuma vu na wi babu ikpa̱vici ko a̱shinda̱ ko unata u yoku kenu. U kucikpa u yongo ciɗa babu unushi. 28Ta kpamu nannai, vali u ciga vuka vi ni, uteku u na u cigai ikyamba i ni. Vali vu na baci vi cigai vuka vi ni wi ta̱ a kuciga ka̱ci ka̱ ni. 29Babu vuza na u saꞋwai kuꞋiwan ikyamba i ni, amma u ci lyaꞋatangu ta̱ i ɗa ka̱ta̱ kpamu u la̱na̱ i ɗa kpamu mayin. Ili i nan lo i ɗa Kishi ka yaꞋankai a̱Ꞌisa̱ a aza o Kutoni a̱ ni, 30adama a na a̱ tsu ugboku u ɗa kakau wi ikyamba i ni.

31Uteku u na Katagarda ka Ciɗa ka danai, “Vuza u ka̱sa̱kpa̱ esheku a̱ ni n a̱na̱ku a̱ ni ka̱ta̱ u yaꞋan yolo, ele aza e re e le o okpo vi te.”#Ugi. 2:24. 32Ili i mayun yi ta̱ punu i na yi usokongi punu a̱ ubuta̱ u kuyotsongusu u nam pa wa. Mi ta̱ a kadanshi ka̱ Kishi n a̱Ꞌisa̱ a aza o Kutoni. 33Amma ili i nam pa ya feu mayun ɗa wa̱ ɗa̱: mayun ɗa vali dem u ciga vuka vi ni tsu na u cigai ka̱ci ka̱ ni, vuka kpamu dem u neke vali vi ni tsugbayin.

Currently Selected:

Afisu 5: asgNT

Highlight

Copy

Compare