Afisu 3

Ulinga u Bulusu

1Mpa Bulusu mi ta̱ a̱ kunu ku ugbashi adama a ulinga u na Yesu Kishi u zuwai mu n yaꞋanka ɗa̱ a̱ɗa̱ Aza̱ka̱yimbi. 2I yeve ta̱ ɗe a na Ka̱shile a̱ ubuta̱ u kasingai ka̱ ni u neke mu ta̱ ulinga u nam pa n yaꞋan adama a na m ɓa̱nka̱ ɗa̱. 3Ka̱shile ka zuwai mu n yeve kusheshe ku na wi ishi u sokongi. Mi ishi ta̱ ɗe n ɗanaka wu kenu adama a ili i nam pa. 4A ayin a na baci vi kecei ili i na n ɗanai, yi ta̱ e kene ili i na n yevei adama e kusheshe ku nam pa ku na ki adama a̱ Kishi. 5Ka̱shile ko yotsongu kusheshe ku nam pa u uma a cau ba. Amma gogo na u yotsongu ta̱ ku ɗa a̱ ubuta̱ wa Ayinviki a̱ Ka̱shile. U yotsongu ta̱ ku ɗa u uma a na u zagbai o okpo azusuki a̱ ni n eneki.

6Ili i na Ka̱shile ke sheshei i ɗa na: A̱ɗa̱ Aza̱ka̱yimbi yi ta̱ a kisa una̱singai ra̱ka̱ u na Ka̱shile ke ci neke, derere tsu na Ayahuda feu a isai u ɗa. Aza̱ka̱yimbi n Ayahuda o okpo ta̱ ili i te. A̱ɗa̱ Aza̱ka̱yimbi yi ta̱ a kisa ili i na Ka̱shile ka yaꞋankai uma a̱ ni uzuwakpani adama a na yi ta̱ uɓolongi n Yesu Kishi. Ili i na Arabali a Singai a danai i ɗaɗa. 7Na va ɗaɗa Arabali a Singai a na mi a kudansa. Adama a na Ka̱shile ki ta̱ n kasingai, u nekei mu ulinga u nam pa u kudana yaba dem Arabali a Singai a nam pa, u tsu ɓa̱nka̱ mu ta̱ n yaꞋan na va n utsura u na u nekei mu.

8Mpa ɗa vuza na n laꞋi n kenu a̱ ka̱tsuma̱ ka uma a̱ Ka̱shile dem, amma ko n nannai, Ka̱shile ke nekei mu ulinga u nam pa u kudana Aza̱ka̱yimbi ukuna wi ili i singai i na Kishi ke ci neke. Ili i singai i nam pa i laꞋa ta̱ uteku u na uma e kuyeve. 9Ka̱shile, vuza na u yaꞋin ili dem, u nekei mu ulinga u kudana uma ra̱ka̱ ukuna u kusheshe u ni u na wi ishi u sokongi n ayin a̱ ugiti.

10U yaꞋin ili i nam pa nannai adama a na u yotsongu ngono n utsura kakau gaɗi uteku u na a̱yi wi n ugboji dem a̱ ubuta̱ wi ili dem i na u ci yaꞋan. Ka̱shile ko yotsongu ta̱ ili i nam pa a̱ ubuta̱ wi ili i na u yaꞋankai aza o Kutoni a̱ ni. 11Ka̱shile ke sheshe ta̱ kuyaꞋan ili i nam pa n ayin a ɗe, ali kafu u yaꞋan aduniyan, gogo na u zuwai a ɗa a̱ gita̱ adama a ili i na Yesu Kishi Vuzagbayin vu tsu u yaꞋin.

12Adama a na ci neke ta̱ a̱ɗu wa̱ ni, ɗa kpamu ci uɓolongi n a̱yi, gogo na ci ta̱ a kufuɗa tsa bana u Ka̱shile n uba̱ruwi babu kpamu wovon. 13Ye ene mu baci o kusoꞋo atakaci adama a̱ ɗa̱, mi ta̱ o kufolono ɗa̱ ka̱ta̱ utsura u ka̱ɗu u ɗa̱ u jebe ba. Atakaci a nam pa i ta̱ a̱ kutuka̱ ɗa̱ n tsugbayin.

Kishi ka ciga tsu ta̱

14Adama a nannai, n tsu kuɗa̱ngu ta̱ kelime ke Esheku a̱ tsu, ka̱ta̱ n vasa adama a̱ ɗa̱. 15A̱yi ɗa Esheku a mayun a umaci ra̱ka̱, a aza a na i gaɗi n aza a na i a aduniyan dem. 16Ka̱shile ki ta̱ a kufuɗa ka zuwaka ɗa̱ una̱singai n a̱bunda̱i. Adama a nannai n folono yi ta̱ adama a na Ayinviki a̱ ni e neke ɗa̱ utsura, ka̱ta̱ a̱ɗu a̱ ɗa̱ a tsurakpa. 17N folono ta̱ kpamu Kishi ko yongo a̱ a̱ɗu a̱ ɗa̱, adama a na a̱ɗa̱ i neke ta̱ a̱ɗu n a̱yi. Mi ta̱ kpamu a kuyaꞋan kavasa i yongo a kuciga Ka̱shile, ka̱ta̱ i ciganai feu ayin tutu. I yaꞋan baci nannai, yi ta̱ o kokpo an megele ma na aralu a̱ ni a uwai a iɗika, n kpaꞋa ku na kpamu ku ciya̱i kumiꞋi ku singai. 18Nannai ɗa, a̱ɗa̱ n uma a̱ Ka̱shile ra̱ka̱, i kuyeve uteku u na Kishi ka cigai tsu. Wi ta̱ a kuciga tsu n a̱bunda̱i ali tsu na u lazai kugisanku. 19Ko a na vuza wi a kufuɗa we yeve ra̱ka̱ uteku u na Kishi ki a kuciga tsu ba, n folono ta̱ Ka̱shile adama a na i yeve, ka̱ta̱ i ciya̱ yo okpo tsu na u yotsoi, ɗaɗa tsu na Ka̱shile ki.

20Ka̱shile ki ta̱ n utsura u na u yaꞋan ili i na i laꞋi ka̱bunda̱i ki ili i na tsu folonoi ni, ko ili i na tsa kufuɗa tsa sheshe dem. U ci yaꞋan ta̱ i ɗa n utsura u ni u na wi a kuyaꞋanka ulinga punu a̱ a̱ɗu a̱ tsu. 21YaꞋan ci cikpa yi ko wanai n ko wanai, adama a tsugbayin tsu na u yotsongi a̱ ubuta̱ wi ili i na wi a kuyaꞋan a̱ ubuta̱ wa̱ a̱Ꞌisa̱ a aza o Kutoni n ubuta̱ u Yesu Kishi kpamu! Ta nannai.

Currently Selected:

Afisu 3: asgNT

Highlight

Copy

Compare