Afisu 2

Gogo na ci ta̱ n wuma

1N ci cau yi ishi ta̱ an keven ki ikyamba, adama a na i iwan ta̱ kupanaka Ka̱shile ɗa i yaꞋansai unushi. 2I ci yongo ta̱ tsu uma a aduniyan a nam pa. I panakai MalyaꞋi, vuza na wi mogono ma̱ wunla̱i u gbani-gbani u na u ci yongo a̱ a̱da̱nga̱shile. MalyaꞋi a̱yi ɗa wunla̱i u na gogo na wi a kuyaꞋan ulinga adama a na u tono n uma a na a iwain kutono Ka̱shile. 3Ra̱ka̱ vu tsu ci ishi ta̱ a kuyaꞋan nwalu ci le. Ci ishi ta̱ a kuyaꞋansa ili i gbani-gbani i na ci cigai dem. Tsu tono ta̱ ili i na a̱shawuya n kusheshe ku wuya a tsu dana tsu ci yaꞋan. Adama a na ci yaꞋan ta̱ kagbani-gbani, Ka̱shile ka yaꞋan ta̱ mayin u takacika tsu baci, uteku u na u kutakacika aza a na a buwai.

4Amma asuvayali a̱ Ka̱shile i ta̱ n a̱bunda̱i, wi ta̱ kpamu a kuciga tsu n a̱bunda̱i. 5A̱yi ɗa u ɓolongi tsu n Kishi, ɗa u nekei tsu wuma u savu. U yaꞋan ta̱ nannai ko a na a ayin a nan lo ci tsa̱ a̱kpisa̱ adama a unushi u tsu. Adama a kasingai ka̱ Ka̱shile koci i ɗaɗa i zuwai ɗa wi isai ɗa̱.

6U ɗengusa̱i tsu a̱ ubuta̱ wu ukpa̱ n Kishi, ɗa u zuwai tsu gaɗi a̱ ubuta̱ u Ka̱shile adama a na tsu da̱sa̱ngu n Kishi ka̱ta̱ kpamu ci lyaꞋa tsugono n a̱yi. Ka̱shile ka yaꞋan ta̱ nannai a̱ ubuta̱ u na u ɓolongi tsu n Yesu Kishi. 7U yotsongi tsu kasingai ka̱ ni a uye u nam pa a̱ ubuta̱ u Yesu Kishi, adama a na a̱ya̱ a na a̱ kuta̱wa̱ uma a fuɗa e ene uteku u na mgbayin n kasingai ka̱ ni ki ɗa kpamu ka laꞋi ili dem.

8Adama a kasingai† ka na Ka̱shile ko yotsongi ɗa̱ ka ɗaɗa koci, ɗa wi isai ɗa̱ a̱ ubuta̱ u na yu ushuki n Kishi. Wi isa ɗa̱ adama ulinga u singai u na i yaꞋin ba. Na va kuneꞋe ku Ka̱shile ku ɗa a kubana wa̱ ɗa̱, adama a ili i na i yaꞋin ba. 9I ɗa i zuwai babu vuza na u kuyaꞋan a̱ra̱ɗi adama a̱ ka̱ci ka̱ ni. 10Ka̱shile ko bonoko tsu ta̱ ili i na ci. A̱ ubuta̱ u Yesu Kishi, Ka̱shile ka yaꞋan tsu ta̱ ciya̱ ci yaꞋan ulinga u singai. Na va ɗaɗa uye u na u foɓusoi ɗe n ayin a ɗe, uteku u na u gaꞋin ci yongo.

Kishi ko ɓolongi tsu a̱ ubuta̱ u te

11A matsa ɗa̱ Ayahuda ba. A̱ɗa̱ ɗa uma a na Ayahuda e ci ɗeke “aza a na a̱ kpa̱ɗa̱i kukiɗa avaja” ka̱ta̱ kpamu e ɗeke ka̱ci ke le, “aza a ukiɗi wa avaja.” (Ukiɗi wa avaja u le ili ɗa koci i na ele a̱ ka̱ci ke le a yaꞋin a ikyamba i le.) 12Ciɓai a ayin a nan lo, i yeve Kirisiti Kishi ba, a̱ɗa̱ uma a iɗika a Israila a ɗa ba. Ka̱shile ka yaꞋin uzuwakpani wu una̱ n ele, amma n a̱ɗa̱ ɗa ba. Ɗa u yaꞋankai le uzuwakpani wi ili n a̱bunda̱i, amma n a̱ɗa̱ kpamu ba. Yi ta̱ ida̱shi a aduniyan a nam pa, amma yi n ili i na i keɗei a̱pa̱Ꞌa̱ ba, i yeve kpamu Ka̱shile ba. 13N ci cau yi ta̱ daꞋin, amma gogo na a na i ɓolongi ka̱ci ka̱ ɗa̱ n Kirisiti Kishi, ɗa Ka̱shile kpamu ka̱ tuka̱i ɗa̱ ɗevu n ka̱ci ka̱ ni a̱ ubuta̱ wu mpasa n Kirisiti Kishi.

14Kishi a̱ ka̱ci ka̱ ni u tuka̱ tsu ta̱ m ma̱ta̱na̱. N ci cau, maꞋiwanai ma Ayahuda n Aza̱ka̱yimbi mi ta̱ tsu mashilya. U takpa ta̱ ɗe maꞋiwanai ma nam pa, ɗa u bonokoi yaba dem uma e te. 15Wila̱ wa Ayahuda wi ta̱ n ili n a̱bunda̱i i na i gaꞋin uma o tono, amma gogo na Kishi ko bonoko le ta̱ ukuna u gbani a̱ ubuta̱ wu ukpa̱ u ni. U yaꞋan ta̱ nannai adama a na u ɓolongu Aza̱ka̱yimbi n Ayahuda a kubana wa̱ ni adama a na u bonoko le ugboku u te. N nannai, ɗa u tuka̱i m ma̱ta̱na̱ we le dem. 16Kusheshe ku Kishi ku ɗa feu wu una maꞋiwanai a̱ ubuta̱ wu ugboku u re wa, ka̱ta̱ o bonoko le ikyamba i te, ka̱ta̱ u bonoko le kpamu u Ka̱shile. Yesu u yaꞋan ta̱ nannai dem a̱ ubuta̱ wu ukpa̱ u ni a maɗanga ma atakaci.

17Kirisiti† Kishi u ta̱wa̱ ta̱ aduniyan a nam pa, ɗa u yaꞋin kadanshi ka Arabali a Singai a na i a kadanshi ka̱ ma̱ta̱na̱. U dana ɗa̱ ta̱ Aza̱ka̱yimbi kadanshi ka nam pa, a̱ɗa̱ na yi ishi daꞋin, koɓolo n a̱tsu Ayahuda a̱tsu vu na ci ɗevu. 18Gogo na ra̱ka̱ vu tsu Ayahuda n Aza̱ka̱yimbi ci ta̱ a kufuɗa tsa̱ ta̱wa̱ u Dada a̱ ubuta̱ wa Ayinviki a̱ Ka̱shile e te adama a ili i na Kishi ka yaꞋankai tsu.

19Adama a nannai, a̱ɗa̱ Aza̱ka̱yimbi† aza a pulai ko omoci a ɗa yi ba. I kucikpa ta̱ yo okpo uma e te a na i ciɗa u Ka̱shile. A̱ɗa̱ ɗa uma a kpaꞋa ku Ka̱shile. 20Yi ta̱ ci iputa̱ i na a tsu maꞋaka kpaꞋa. Azusuki n eneki i ta̱ tsa agisana a̱ kumiꞋi ku kpaꞋa ku nan lo, Yesu Kishi a̱yi ɗa kenene ko mogon ka gbayin. 21A̱yi ɗa vuza na u ka̱na̱i kumaꞋa ka ra̱ka̱ a̱ ubuta̱ u te. Wi ta̱ a kuzuwa ku ɗa ku gbonguro ka̱ta̱ kpamu u bonoko ku ɗa a̱Ꞌisa̱ a ciɗa a u Vuzavaguɗu. 22Adama a na yi a uɓolongi n Kishi, u ɓolongu ɗa̱ ta̱ n aza o Kutoni a na a buwai, adama a na a̱ɗa̱ yo okpo kpaꞋa ku nam pa, ubuta̱ u na Ka̱shile ki o kuyongo n utsura wa Ayinviki a̱ Ka̱shile.

Currently Selected:

Afisu 2: asgNT

Highlight

Copy

Compare