Habakuk 1
1
1So ayeke nengo tënë so wayanga-Nzapa Habakuk abaa na ya ti mbeni ye tongana bango-li.
Habakuk adekongo na KOTA GBIA ti mu maboko na lo
2 *KOTA GBIA, mbi dekongo na mo
ti mu maboko na mbi aninga awe;
mo yeke ma mbi pepe ngbii asi lawa?
Mbi dekongo na mo, mbi tene:
“Sarango ngangu na azo ahon ndoni!”,
me mo zi azo ni pepe.
3Mo sara si mbi baa ye ti sioni ngbanga ti nyen?
Azo ayeke sara ngangu na amba ti ala,
mo yeda ti baa ni na le ti mo ngbanga ti nyen?
Ye so mbi yeke baa mbage na mbage
ayeke gi gbungo ye ti azo na ngangu
na sarango ngangu na azo.
Tongana fango ngbanga ayeke daa,
papa ayeke daa lakue.
4 Ndani laa azo ayeke sara ye
alingbi na ndia pepe,
ala yeke fâ ngbanga na lege ti ndia pepe.
Zo ti sioni ayeke hon ndö ti zo ti mbirimbiri,
awafango-ngbanga ayeke fâ ngbanga kirikiri.
Nzapa akiri tënë: azo ti Babilone amu ya ti kodro kue
5 Kota Gbia atene:
“Ala zi le ti ala, ala baa ye so ayeke si
na popo ti amara nde;
fade li ti ala ayeke ga kirikiri,
li ti ala kue ayeke kpe!
So ala de na fini so,
ala yeke baa mbeni ye so ayeke si,
ataa mbeni zo atene peko ni na ala,
ala yeke yeda na ni pepe.
6 Baa, mbi yeke sara si azo ti Babilone aga,
azo ti mara so ayeke sioni mingi so,
ala so ayeke baa mawa ti zo pepe so.
Ala yeke hon na ya ti akodro ti dunia kue
ti mu sese ti azo,
sese so ayeke ti ala pepe.
7Ala yeke asioni zo,
ala yeke zia mbeto na be ti azo.
Ala wani ayeke sara ndia ti li ti ala,
ala yeke sara si iri ti ala awu.
8Ambarata ti ala ayapu na loro ahon ze,
ala yeke hon hio na bira tongana ambo ti ngonda
so ayeke gi anyama na lakui.
Azo ti kpengo na mbarata ti ala
alondo yongoro si ala ga,
ala mu ndo kue,
ala yeke huru tongana *ngoalo
so ayeke huru ti ti na ndö ti nyama.
9Ala yeke ga,
kua ti ala ayeke gi ti sarango ngangu na zo,
le ti ala angba gi na dawa ti ala;
ala bongbi azo ti kanga gbani gbani tongana mbutu.
10Ala yeke baa agbia tongana ambumbuse zo,
akota zo ti kodro aga tongana ye ti ngia na le ti ala.
Agbata so angangu gbagba ayeke na tere ni,
ala yeke he ni hengo na ngia,
ala yeke bongbi gba ti sese na tere ti gbagba ni
si ala yeke mu agbata ni.
11Ala hon tongana ngangu pupu,
ala yeke hon ti ala hongo,
tongaso tënë aga na li ti ala.
Ngangu ti ala wani laa ayeke nzapa ti ala.”
Habakuk akiri airi Nzapa
12 *KOTA GBIA, ngbene ye giriri,
mo yeke Nzapa ti mbi pepe?
Nzapa ti mbi, mo so mo yeke nde
si mo yeke nzoni kue, zia e kui pepe!
KOTA GBIA, mo soro azo so titene ala fâ ngbanga na li ti e.
Mo so mo yeke Kota Têne
so mbi luti na ndö ni ti bata tere ti mbi,
mo mu lege na ala titene ala pika e.
13Le ti mo alingbi na bango asioni ye pepe,
ngangu so zo ayeke sara na mba ti lo,
mo lingbi ti yeda ti baa ni pepe.
Azo so ayeke ka amba ti ala so,
mo lingbi ti yeda ti baa ala?
So azo ti sioni ayeke buba azo
so ayeke mbirimbiri ahon ala so,
mo ke ti zi yanga ti mo daa ngbanga ti nyen?
14Mo sara si azo aga tongana asusu
na ya ti kota ngu-ingo;
ala ga tongana akete nyama
so makonzi ti ala ayeke daa pepe.
15Azo ti Babilone agbu azo tongana ti so
a yeke gbu susu na yango,
tongana ti so a yeke gboto susu na ya ti gbanda,
tongana ti so a yeke gbu susu na ngbengbe.
Na pekoni, azo ni ayeke na ngia,
ala yeke dodo na ngia.
16Ndani laa, ala yeke mu *sandaga na gbanda ti ala,
ala yeke zö dukani na ngbengbe ti ala,
ngbanga ti so, ndali ti gbanda ni na ngbengbe ni
si ala wara gba ti susu na nzoni kobe ti tengo ni.
17Fade azo ti Babilone
ayeke ngba ti bi gbanda ti ala ni
ti fâ na azo tongaso?
Ala so ayeke baa mawa ti zo pepe so.
Currently Selected:
Habakuk 1: MNF2010
Highlight
Share
Copy
Want to have your highlights saved across all your devices? Sign up or sign in
© La Société Biblique de Centrafrique 2010
