Habakuk 2
2
1Fade mbi yeke ngba na ndo so
mbi yeke sara sanziri daa,
mbi yeke luti na nduzu
na ndö ti ngangu gbagba ti baa ndo.
Mbi yeke ku ti ma tënë
so Nzapa ayeke tene na mbi;
mbi yeke ku tënë so lo yeke kiri na ni
ndali ti demango tere ti mbi.
Kiringo tënë ti Nzapa: azo ti baba ayeke gbu le ni pepe
2 *KOTA GBIA akiri tënë na mbi, atene:
“Ye so mo baa na ya ti mbeni ye tongana bango-li so,
mo su ni na mbeti,
mo kpaka gere ti mbeti ni nzoni na le ti atêne
si azo adiko ni nzoni.
3Ye so mo baa na ya ti mbeni ye tongana bango-li so
ayeke si na ngoi so alingbi,
ngoi ni ayeke ga nduru nduru;
tënë ni ayeke mvene pepe.
Me tongana ye ni angba ti ninga, mo ku ni,
ngbanga ti so nyen na nyen kue, ye ni ayeke si
tongana ngoi ni alingbi.
4 Su tënë ni tongaso:
‘Zo so baba ahon ndö ti lo, fade lo yeke kui;
me fade zo ti mbirimbiri ayeke na fini
na lege ti batango tënë ti yanga ti Nzapa.’
5Biani, mosoro ayeke handa zo handango:
zo ti baba ayeke duti kpoo pepe,
lo yeke zi yanga ti lo kota tongana ndo ti akuâ;
lo yeke tongana kuâ so nzara ti lo ayeke hunzi pepe.
Lo bongbi amara kue na tere ti lo,
lo zia azo kue na gbe ti komandema ti lo.
6Me ti azo so lo zia ala na gbe ti komandema ti lo so,
fade ala kue ayeke kasa lo, ala yeke he lo na ngia
si ala yeke tene atënë ti songo be na lo.”
Atënë oku ti ye ti mawa so ayeke si
Fade ala yeke tene:
“Mawa na mo,
mo so mo yeke bongbi
na ndö ti tere, na ndö ti tere
aye so ayeke ti mo pepe!
Mo yeke bongbi ni ngbii asi lawa?
Gba ti ayongo laa mo bongbi ni na ndö ti mo.
7Azo so asara boon na mo so,
ala yeke londo hio ti ga na tere ti mo pepe?
Ala yeke londo ti yingi mo pepe?
Ala yeke nzi nga aye ti mo.
8So mo nzi aye ti amara mingi so,
fade tanga ti azo so angba
so ayeke nzi aye ti mo,
ndali ti so mo tuku mene ti azo,
mo sara ye ti ngangu na kodro ti azo ni,
na gbata ti ala nga na azo ti gbata ni.
9Mawa na mo,
mo so mo yeke mu ye ti azo na lege ti nzi
ndali ti asewa ti mo!
Mo yeke sara tongaso titene mo duti na kota ndo
si ye ti mawa alingbi ti wara mo pepe.
10Na sarango ye tongaso,
mo yeke zia kamene na le ti asewa ti mo,
mo yeke buba fini ti gba ti amara,
mo yeke buba nga fini ti mo wani.
11Ataa atêne ti dere ti da ayeke dekongo:
‘Mawa!’
si ayongoro keke ti li ti da ayeke mu tënë
na yanga ti atêne ni.
12“Mawa na mo,
mo so mo leke gbata na lege ti tukungo mene,
mo zia gere ti gbata
na lege ti sarango ye ti ngangu na azo!
13 Ndani laa, kua so amara asara
ayeke hunzi na le ti wâ,
azo ayeke baa pasi na kua senge senge.
Aye so kue alondo na KOTA GBIA pepe?
Lo so lo yeke na ndö ti dunia kue so.
14 Biani, fade azo ayeke hinga gonda ti KOTA GBIA
si gonda ni ayeke si singo na ndö ti sese
tongana ti so ngu asi singo na ya ti kota ngu-ingo.
15“Mawa na mo,
mo so mo mu samba na mba ti mo,
mo tuku sioni samba na mba ti mo,
lo nyon ngbii ahon ndö ti lo,
azo abaa tere ti lo so ayeke ndumbu
si ala he lo.
16Ti mo, mo baa fade mo tene,
azo ayeke gonda mo mingi,
me gba ti kamene laa ayeke hon ndö ti mo.
Ngoi titene mo nyon ti mo samba ni laa;
ngoi titene mo fa *pito ti mo na le ti azo laa!
Fade KOTA GBIA ayeke sara titene
mo nyon kopo ti ngonzo
so ayeke na maboko ti lo ti koli.
Fade gonda ti mo ayeke ga ye ti kamene!
17Biani, ye ti ngangu so mo sara na akeke ti Liban,
fade ayeke kiri na li ti mo wani;
mo fâ anyama mingi,
fade anyama ni ayeke zia mbeto na be ti mo.
Aye so kue ayeke si
ndali ti so mo tuku mene ti azo,
mo sara ye ti ngangu na kodro ti azo ni,
na gbata ti ala nga na azo ti gbata ni.
18Yanda so zo amu keke si aleke na ni,
kua ti lo ayeke nyen?
Wen so zo akporo na wâ
si lo leke na limo ti yanda ni so,
limo ni ayeke fa tënë ti mvene.
Wakode-kua laa aleke aye ni so,
ala yeke tene tënë pepe;
lo zia be ti lo na ndö ti ayanda ni ngbanga ti nyen?
19“Mawa na mo,
mo so mo tene na nduru keke, mo tene: ‘Londo!’,
wala mo tene na têne
so ayeke buburu, mo tene: ‘Zingo!’
Têne ni ayeke fa ye na zo?
Ataa a kanga lôro na wen ti nginza na tere ni,
lo yeke na fini pepe.
20Me KOTA GBIA ayeke na ya ti kota da ti lo
so ayeke nde si ayeke nzoni kue.
Ayeke nzoni azo ti sese kue akai kpoo na dawa ti lo!”
Currently Selected:
Habakuk 2: MNF2010
Highlight
Share
Copy
Want to have your highlights saved across all your devices? Sign up or sign in
© La Société Biblique de Centrafrique 2010
