Ndia ti fani use ni 2
2
1 Na pekoni, e kiri e mu lege ti benyama so ague na mbage ti kota ngu-ingo ti Asosongo, tongana ti so *KOTA GBIA amu lani yanga daa na mbi. E duti na sese ti ahoto ti Seir aninga mingi awe, e ngoro gi ndo oko.
Azo ti Israel afâ ya ti sese ti Edom, ti Moab na ti Amon ti hon
2Mbeni lâ, *KOTA GBIA atene na mbi: 3Ala duti na sese ti ahoto ni aninga mingi awe, ala ngoro gi ndo oko. Fadeso, ala londo, ala mu lege so ague na mbage ti Banga! 4 Mo mu yanga so na azo ti Israel, mo tene: “Ala yeke ga ti fâ ya ti sese ti Seir ti hon; ndo so laa a-ita ti ala, *ahale ti Ezau asara kodro daa. Fade a-ita ti ala ni ayeke sara mbeto ti ala, azo ti Israel; me ala sara hange! 5Ala sara bira na a-ita ti ala ni pepe! Fade mbi yeke mu sese na ala pepe na ya ti kodro ti a-ita ti ala ni, ataa mbeni kete ndo titene ala zia gere ti ala daa. Biani, mbi mu na ahale ti Ezau sese ti ahoto ti Seir titene aga ti ala awe. 6Kobe so ala yeke te, fade ala yeke vo ni vongo na nginza na maboko ti ala; ataa ngu so ala yeke nyon, fade ala yeke vo ni vongo.” 7– Biani, ala azo ti Israel, KOTA GBIA asara tufa na ndö ti ala na ya ti aye so kue ala sara. Lo baa ndo na ndö ti ala na ndembe so ala hon na ya ti kota benyama so. Na ya ti ngu baleosio kue, KOTA GBIA Nzapa ti ala ayeke na ala, ye oko atia ala pepe. –
8E zia ti hon na sese ti a-ita ti e, ahale ti Ezau so asara kodro na Seir. E zia nga ti mu lege so ahon na popo-hoto so ahole kasakasa, nga na lege so ague na Elat nga na Esion-Geber. E ngoro, e mu lege so ague na benyama ti Moab. 9Na pekoni, KOTA GBIA atene na mbi: “Ala azo ti Israel, ala gi tënë na azo ti mara ti Moab pepe; ala tiri bira na ala pepe! Fade mbi yeke mu sese na ala pepe na ya ti kodro ti azo ti Moab ni. Biani, mbi mu sese ti Ar na ahale ti Lot awe titene aga ti ala.” – 10 Ando, azo ti mara ti Emi laa ayeke lango na Ar. Ala yeke angangu zo mingi, ala wu mingi si ala yeke ayongoro zo tongana azo ti mara ti Anak. 11Ambeni zo abaa ala tongana azo ti mara ti Refa; ambeni zo abaa ala nga tongana azo ti mara ti Anak, me azo ti mara ti Moab ayeke iri ala azo ti mara ti Emi. 12Âdu ti sese ti Seir, azo ti mara ti Hor laa alango ando kâ. Me ahale ti Ezau aga atumba ala, ala fâ ala ahunzi ala kue si ala duti na plase ti ala. Mbeni ngoi na pekoni, azo ti Israel asara nga legeoko tongaso na sese so KOTA GBIA amu na ala si ala duti daa so. –
13KOTA GBIA amu yanga na e, atene: “Fadeso, ala londo, ala fâ ngu ti Zered.” E londo si e fâ ngu ni. 14 Ti londo na Kades-Barnea ngbii ti si na lango so e fâ ngu ti Zered, e sara ngu baleota na miombe na lege. Na ngoi ni so, andaa azo so kue ngu ti ala alingbi ti sara bira na ndembe so e londo na Kades-Barnea, ala kue akui, alingbi na dengo ba so KOTA GBIA ade ando na ala. 15KOTA GBIA wani laa aga na tere ti ala ti sara titene ala kue ahunzi na ya ti bâbâ.
16Na ndembe so angangu zo ti bira ni kue akui awe, 17KOTA GBIA atene na mbi: 18“Fadeso, ala yeke gue ti fâ katikati ti sese ti Moab, ala yeke fâ nga ya ti sese ti Ar ti hon. 19Ala yeke si na ndo so abaa le na sese ti azo ti mara ti Amon. Ala gi tënë na azo ti mara ti Amon ni pepe; ala tiri bira na ala pepe! Biani, fade mbi yeke mu sese na ala pepe na ya ti kodro ti azo ti mara ti Amon ni. Mbi mu sese ni na ahale ti Lot awe titene aga ti ala.” 20– Azo abaa atene, sese ni ayeke ti azo ti mara ti Refa. Biani, ando, azo ti mara ti Refa laa alango kâ. Azo ti mara ti Amon airi ala, azo ti mara ti Zamzum. 21Ala yeke angangu zo mingi, ala wu mingi si ala yeke ayongoro zo tongana azo ti mara ti Anak. Me KOTA GBIA afâ ala ahunzi ala kue na gango ti azo ti mara ti Amon; azo ti mara ti Amon atumba ala na ya ti kodro ni si ala duti na plase ti ala. 22KOTA GBIA asara legeoko tongaso ndali ti azo ti mara ti Edom, ahale ti Ezau, so alango na sese ti Seir. Lo fâ azo ti mara ti Hor, lo hunzi ala kue na gango ti azo ti mara ti Edom. Azo ti mara ti Edom atumba azo ti mara ti Hor na ya ti kodro ni si ala duti na plase ti ala, ngbii asi laso. 23Ti azo ti mara ti Avi, ala lango ando na ya ti akete kodro ti sese ti Gaza. Me azo alondo na Kaftor aga, afâ ala kue ahunzi ala si aduti na ya ti akodro ni na plase ti ala. –
24Na pekoni, KOTA GBIA amu yanga na e, atene: “Ala londo, ala gue, afâ ngu ti Arnon. Mbi yeke zia na maboko ti ala Sihon, gbia ti azo ti mara ti Amori, gbia ti Heshebon, lo na kodro ti lo. Ala to nda ti mu kodro ni, ala tiri bira na lo! 25Gi laso laso, mbi yeke to nda ti sara si amara ti dunia kue aduti na kota mbeto ti ala, ala duti na mbeto ti ala. Tongana azo ni ama tënë ti ala, fade be ti ala ayeke fun kue si ala yeke do na mbeto.”
Azo ti Israel amu kodro-gbia ti Sihon
26Moïse atene: So e de na benyama ti Kedemot, mbi tokua azo na Sihon, gbia ti Heshebon, ti tene na lo tënë ti siriri; mbi tene: 27“E ye ti fâ ya ti kodro ti mo ti hon. Fade e yeke ngba gi na ndö ti kota lege, e yeke hon mbage na mbage pepe. 28Kobe so e yeke te na ngu so e yeke nyon, fade e yeke vo ni vongo na nginza na maboko ti mo. Zia na e lege titene e hon hongo senge na ya ti kodro ti mo. 29*Ahale ti Ezau so alango na sese ti Seir, na azo ti mara ti Moab so alango na sese ti Ar azia na e lege si e hon na ya ti sese ti ala. E ye ti gue ti fâ ngu ti Jourdain titene e si na sese so KOTA GBIA Nzapa ti e amu na e.” 30Me Sihon, gbia ti Heshebon, ake titene e hon na ndo ti lo. Andaa KOTA GBIA Nzapa ti ala, azo ti Israel asara lani si li ti lo akpengba si be ti lo akpengba, tongaso si lo lingbi ti zia lo na maboko ti ala; nilaa ye ni asi lani tongaso. 31KOTA GBIA atene na mbi: “Baa, gi laso laso, mbi zia Sihon na kodro ti lo na maboko ti mo awe. Mo to nda ti mu sese ti lo ni titene aga ti mo.” 32Sihon na aturugu ti lo kue asigigi ti tiri bira na e na kodro ti Yahas. 33KOTA GBIA Nzapa ti e azia lo na maboko ti e; e hon ndö ti lo na bira, lo na amolenge ti lo ti koli na aturugu ti lo kue. 34Na pekoni, e mu agbata ti lo kue; e buba ni kue kue kue, e fâ akoli, awali na amolenge, e hunzi ala; e zia zo oko angba na fini pepe. 35Ye so e gbu na peko ti bira ayeke gi anyama ti kodro na akungba so e wara na ya ti agbata so e mu ni. 36Ti londo na gbata ti Aroer so ayeke na yanga ti ngu ti Arnon ti hon na mbage ti gbata so ayeke na popo-hoto ngbii ti si na Galaad, mbeni gbata oko so akara e ayeke daa pepe. KOTA GBIA Nzapa ti e azia agbata ni kue na maboko ti e. 37Me e ndu sese ti azo ti mara ti Amon pepe, so ti tene sese so kue ayeke na tere ti ngu ti Yabok, nga na agbata so ayeke na sese ti ahoto. KOTA GBIA amu lani yanga na e titene e si na ando ni so pepe.
Currently Selected:
Ndia ti fani use ni 2: MNF2010
Highlight
Share
Copy
Want to have your highlights saved across all your devices? Sign up or sign in
© La Société Biblique de Centrafrique 2010