Ndia ti fani use ni 3
3
Azo ti Israel amu kodro-gbia ti Og
1Moïse atene: Na pekoni, e mu lege, e gue na mbage ti nduzu, na sese ti Bashan. Og, gbia ti Bashan, lo na aturugu ti lo aga awara e ti tiri bira na e na gbata ti Edrei. 2Tongaso *KOTA GBIA atene na mbi: “Sara mbeto ti lo pepe! Mbi yeke zia lo na maboko ti mo, lo na aturugu ti lo nga na sese ti lo. Fade mo yeke sara na lo gi ye so mo sara na Sihon, gbia ti azo ti Amori, so lo yeke lango lani na gbata ti Heshebon.” 3KOTA GBIA Nzapa ti e asara si e so nga benda na ndö ti Og na aturugu ti lo; e hon ndö ti ala, tongaso e zia mbeni zo oko angba na fini pepe. 4Na pekoni, e mu agbata ti lo kue; mbeni oko ti kara e ayeke daa pepe: agbata baleomene ti sese ti Argob, na sese ti Bashan, ndo so Og ayeke le-gbia lani daa. 5Angangu gbagba ayeke na tere ti agbata ni, agbagba ni ayo na nduzu mingi, a kanga yanga ti agbagba ni na angbongboro wen. Agbata mingi ayeke nga daa so agbagba ayeke na tere ni pepe. 6E buba agbata ni kue kue kue, e fâ akoli, awali na amolenge, e hunzi ala, tongana ti so e sara lani na kodro ti Sihon, gbia ti Heshebon. 7Me e gbu na peko ti bira anyama ti kodro na akungba ti agbata ni kue.
Kangbingo ya ti sese ti Galaad
8Moïse atene: Na ngoi ni so, e mu sese ti agbia use ti azo ti mara ti Amori so aduti na To ti Jourdain, ti londo na ngu ti Arnon ngbii asi na hoto ti Hermon. 9– Azo ti Sidon adi iri ti hoto so Sirion, azo ti mara ti Amori adi iri ni Senir. – 10E mu agbata kue ti kpangbara sese so ayeke na mbage ti nduzu; e mu nga sese kue ti Galaad na ti Bashan, ngbii asi na Salka nga na Edrei, agbata use so Og ayeke le-gbia daa, na sese ti Bashan. 11– Og, gbia ti Bashan ayeke tanga ti azo ti mara ti Refa so angba na fini. Laso na Raba, li-kodro ti azo ti mara ti Amon, azo angba ti baa gbogbo ti lo, gbogbo ti lo ti wen so yongoro ni ahon metere osio, nduru ni ayeke metere use. –
12Na ngoi ni so, e mu sese so kue ayeke na Banga ti gbata ti Aroer, na tere ti ngu ti Arnon titene aga ti e. Mbi mu ndambo ti sese ti ahoto ti Galaad na azo ti mara ti Ruben nga na azo ti mara ti Gad; mbi mu sese ni na ala na agbata ni kue. 13Tanga ti sese ti Galaad nga na sese ti Bashan kue, so ti tene kodro so Og ale-gbia lani daa, mbi mu ni na ndambo ti mara ti Manase. – Sese ti Argob kue na ti Bashan, azo adi iri ni sese ti azo ti mara ti Refa. 14Yair, mbeni *hale ti Manase amu sese ti Argob so kue ayeke na sese ti Bashan ngbii asi na katikati ti sese ti azo ti mara ti Geshur na ti Maaka. Lo zia iri ti lo na ndö ti sese ti Argob ni, lo tene “akete kodro ti Yair”; iri ni angba ngbii asi laso. – 15Mbi mu sese ti Galaad na ahale ti Makir, mbeni molenge ti Manase. 16Ti azo ti mara ti Ruben na ti Gad, mbi mu na ala mbage ti sese so alondo na Galaad ngbii asi na tere ti ngu ti Arnon. Yanga ti ngu ti Arnon ayeke katikati ti sese ni na mbage ti Mbongo; ngu ti Yabok ayeke katikati ni na sese ti azo ti mara ti Amon. 17Katikati ti sese ni na mbage ti Do amu tere ti popo-hoto ti Jourdain ti gue na ni, ti londo na kota ngu ti Genezaret ngbii asi na kota ngu ti Gba-ti-ingo, ague ngbii asi na gbe ti hoto ti Pisga, na mbage ti To.
18Na ngoi ni so, mbi mu yanga na amara so awara sese ti ala awe so, mbi tene: “Fadeso, KOTA GBIA Nzapa ti ala azia sese ni na maboko ti ala awe titene ala mu ni aga ti ala. Ala angangu zo ti bira so kue ayeke na popo ti ala, alingbi ala mu aye ti bira ti ala, ala hon na li ni kozo na a-ita ti ala, azo ti Israel, ala fâ ngu ti Jourdain. 19Gi awali ti ala, na amolenge ti ala, na gba ti anyama ti ala ayeke ngba ge na ya ti agbata so mbi mu na ala. – Mbi hinga, mbi tene, ala yeke na anyama gbani gbani. – 20 Ala mu maboko na a-ita ti ala ngbii KOTA GBIA asara titene ala nga, ala wara lege ti duti kpoo tongana ti so ala duti ge so. Ala mu maboko na a-ita ti ala ni titene ala nga, ala wara sese so KOTA GBIA Nzapa ti ala, azo ti amara ti mbage ti To, aye ti mu na ala na mbage ti ngu ti Jourdain kâ. Na pekoni, fade ala oko oko akiri na ndo ti ala, na sese so mbi mu na ala.”
21Na ngoi ni so, mbi mu yanga na Josué; mbi tene na lo, mbi tene: “Mo wani, mo baa na le ti mo ye so kue KOTA GBIA Nzapa ti ala asara na agbia use ti azo ti mara ti Amori. Fade lo yeke sara gi mara ti ye so na agbia so kue mo yeke si na sese ti ala na peko ti so ala yeke fâ ngu ti Jourdain. 22Ala sara mbeto ti agbia ni so pepe, ngbanga ti so KOTA GBIA Nzapa ti ala ayeke tiri bira, lo wani ndali ti ala.”
Moïse ayeke si na sese ti Kanaan pepe
23Moïse atene: Na ngoi ni so, mbi voro tere ti mbi na *KOTA GBIA, mbi tene: 24“Kota Gbia NZAPA, mo to nda ti fa na mbi, zo ti kua ti mo, kota ti mo na ngangu ti maboko ti mo. Mbeni nzapa nde, ataa na yayu, ataa na ndö ti sese so alingbi ti sara akota ye tongana mo ayeke daa pepe! 25Mbi gbu gere ti mo, zia mbi fâ ngu, mbi gue, mbi baa nzoni sese so ayeke na mbage ti ngu ti Jourdain, na pendere sese ti ahoto so nga na ahoto ti Liban maa!” 26Me ndali ti ala, KOTA GBIA asara ngonzo na tere ti mbi; lo ke ti ma mbi si lo tene: “Awe! Zia ti so mê ti mbi na tënë so! 27 Mo ma na li ti hoto ti Pisga; mo yo le ti mo na nduzu, mo baa ndo na mbage ti Do, na mbage ti Banga, na mbage ti Mbongo nga na mbage ti To. Mo baa ndo ni mbirimbiri! Me mo yeke fâ ngu ti Jourdain so pepe! 28Mo mu yanga na Josué. Mo sara titene lo gbu ngangu, lo sara ye ti koli. Biani, lo laa lo yeke gue na azo ni ti fâ ngu ti Jourdain, lo laa lo yeke mu sese so mo yeke baa so na azo ni titene aga ti ala.” 29Ngbene ye kâ, e laa e ngba ge na popo-hoto so abaa le na kodro ti Bet-Peor so.
Currently Selected:
Ndia ti fani use ni 3: MNF2010
Highlight
Share
Copy
Want to have your highlights saved across all your devices? Sign up or sign in
© La Société Biblique de Centrafrique 2010