Ndia ti fani use ni 1
1
KOZO TËNË TI MOÏSE NA AZO TI ISRAEL
1–4
1So ayeke atënë so Moïse atene na azo ti Israel kue na ngoi so ala yeke na mbage ti ngu ti Jourdain, na benyama, na lando so ahole kasakasa, nduru na Suf. Lando ni ayeke na popo ti Paran, ti Tofel, ti Laban, ti Haserot na ti Di-Zahab. 2– Ti londo na hoto ti Horeb ti si na Kades-Barnea, zo ayeke sara lango baleoko na oko na lege, tongana lo mu lege so ague na sese ti ahoto ti Seir. – 3Na kozo lango ti nze baleoko na oko ti ngu baleosio ni, na peko ti so azo ti Israel alondo na sese ti Ezipte asigigi, Moïse atene atënë so kue *KOTA GBIA amu yanga na lo ti tene na ala. 4Moïse atene atënë ni na ala na peko ti so lo kinda Sihon, gbia ti azo ti mara ti Amori so ayeke lango na gbata ti Heshebon; lo kinda nga na gbata ti Edrei, Og, gbia ti Bashan so ayeke lango na gbata ti Ashetarot.
5Na To ti Jourdain, na sese ti Moab, Moïse ato nda ti fa ndia ti Nzapa. Atënë so lo tene ayeke so:
Nzapa amu yanga na azo ti Israel ti londo ti gue
6Na ndembe so e yeke lani na hoto ti Horeb, *KOTA GBIA Nzapa ti e atene na e: “Ala duti na gbe ti hoto so aninga mingi awe. 7 Fadeso, ala londo, ala gue na sese ti ahoto so azo ti mara ti Amori ayeke daa nga na asese so ayeke na tere ni, so azo ti Kanaan ayeke lango daa, so ti tene na lando ti Jourdain, na sese ti ahoto, na *Kodro-ti-gbeni, na sese ti Negev nga na sese so ayeke na tere ti kota ngu-ingo ti Mediterane. Ala gue nga ngbii, ala si na ahoto ti Liban nga na *bale ti Efrate. 8Ala baa: mbi mu na ala sese so awe. Ala gue, amu ni titene aga ti ala, ngbanga ti so ayeke sese so mbi, KOTA GBIA, mbi deba yanga ti mbi ti mu na akotara ti ala Abraham, Isaac na Jacob nga na *ahale ti ala na peko ti ala!”
Moïse azia awafango-ngbanga na yanga ti kua ti ala
9Na ngoi ni so, mbi Moïse, mbi tene na ala, mbi tene: “Mbi lingbi ti yo kungba ti bango ndo na ndö ti ala gi mbi oko pepe. 10*KOTA GBIA Nzapa ti ala asara si ala wu mingi awe. Laso, ala wu mingi tongana atongoro ti le ti nduzu. 11Ayeke nzoni KOTA GBIA, Nzapa ti akotara ti ala asara titene ala kiri awu gbani gbani fani saki oko ahon ti so. Ayeke nzoni lo sara tufa na ndö ti ala tongana ti so lo mu zendo ni na ala. 12Mbi oko, mbi lingbi ti yo kungba ti lekengo atënë ti ala, akpale ti ala nga na apapa ti ala tongana nyen? 13Alingbi ala soro na ya ti amara ti ala oko oko, ambeni zo ti ndara, azo so ahinga ndo si iri ti ala awu nzoni; fade mbi yeke zia azo ni na li ti ala.” 14Ala kiri tënë na mbi, atene: “Ye so mo fa na e ti sara so ayeke nzoni.” 15Tongaso, mbi mu azo so ayeke na li ti amara ti ala, azo ti ndara na azo so iri ti ala awu nzoni, mbi zia ambeni na li ti azo saki oko, ambeni na li ti azo ngbangbo oko, ambeni na li ti azo baleoku, ambeni na li ti azo baleoko. Mbi zia ambeni ti baa ndo na ndö ti akua na ya ti amara oko oko. 16Na ngoi ni so, mbi mu yanga na awafango-ngbanga ti ala, mbi tene: “Alingbi ala ma atënë so a-ita ti ala aga na ni na gbe ti ala nzoni. Tongana mbeni zo ti Israel awara tënë na mba ti lo wala na mbeni wande so aga aduti na popo ti ala si lo ga na tënë ni na gbe ti ala, ayeke nzoni ala fâ ya ti ngbanga ni na legeni. 17Tongana ala yeke fâ ngbanga, ayeke nzoni ala mu mbage ti mbeni zo pepe. Ataa senge zo, ataa kota zo, ala ma tënë ti lo nzoni. Ala sara mbeto ti zo oko pepe, ngbanga ti so fango ngbanga alondo na Nzapa. Tongana mbeni tënë akara ala, ala ga na ni na mbi si mbi lingbi ti gi nda ni.” 18Na ngoi ni so, mbi mu yanga na ala ti sara aye so kue alingbi ala sara.
Azo ti Israel ake ti li na sese ti Kanaan
19 Na pekoni, e londo na hoto ti Horeb alingbi na yanga so *KOTA GBIA Nzapa ti e amu na e. E fâ ya ti kota benyama so ayeke mu mbeto na zo, benyama so ala baa ni so; e mu lege so ague na mbage ti sese ti ahoto so azo ti mara ti Amori ayeke daa. Na pekoni, e si na Kades-Barnea. 20Kâ, mbi tene na ala, mbi tene: “Fadeso ala si na sese ti ahoto so azo ti mara ti Amori ayeke daa; KOTA GBIA Nzapa ti e ayeke mu na e sese ni. 21Ala baa: KOTA GBIA Nzapa ti ala amu na ala sese ni awe. Ala gue, amu ni tongana ti so KOTA GBIA, Nzapa ti akotara ti ala amu lani yanga daa na ala. Ala sara ye ti koli, ala sara mbeto pepe!”
22Tongaso ala kue, ala ga abaa mbi si ala tene: “E tokua ambeni koli ti gue kozoni ti *bembe ndo na sese ni si. Fade ala yeke fa na e tënë na ndö ti lege so e lingbi ti hon daa, nga na agbata so e yeke si daa.” 23Mbi yeda na tënë ti ala ni. Tongaso, mbi soro na popo ti ala akoli baleoko na use, koli oko na ya ti mara oko oko. 24 Akoli ni amu lege, ala gue na mbage ti sese ti ahoto; ala si na popo-hoto ti Eshekol si ala bembe ndo ni. 25Ala ko ale ti keke ti sese ni si ala ga na ni na e; ala fa peko ti tambula ti ala ni na e, atene: “Sese so KOTA GBIA Nzapa ti e ayeke mu na e so ayeke nzoni sese!” 26Me ala, azo ti Israel, ala sara ngangu li na KOTA GBIA Nzapa ti ala; ala ke ti li na ya ti sese ni. 27Na ya ti ada ti ala ti bongo, ala kasa ndo, atene: “Be ti KOTA GBIA ake e awe, nilaa lo sara si e sigigi na sese ti Ezipte so. Lo ye ti zia e na maboko ti azo ti mara ti Amori titene ala fâ e ti hunzi e! 28 E yeke gue ti gi nyen kâ? A-ita ti e asara si be ti e afun kue, ngbanga ti so ala tene: ‘Azo ti sese ni ayeke ngangu ahon e, ala yeke ayongoro zo mingi ahon e. Agbata ti ala akono mingi, angangu gbagba ayeke na tere ni si ayo akpo le ti nduzu.’ Ala baa nga azo ti mara ti Anak kâ!”
29Mbi tene na ala, mbi tene: “Be ti ala ado pepe, ala sara mbeto ti azo ni pepe! 30KOTA GBIA Nzapa ti ala, lo so lo yeke tambula na dawa ti ala, fade lo wani, lo yeke tiri bira ndali ti ala, tongana ti so lo sara na le ti ala na sese ti Ezipte 31nga na ya ti benyama. Ala wani, ala baa na le ti ala: na lege so ala tambula daa ngbii asi na ndo so, lo yo ala tongana ti so babâ ayeke yo molenge ti lo.” 32Me na ya ti aye so kue, ala zia be ti ala na ndö ti KOTA GBIA Nzapa ti ala pepe. 33Lani, lo laa lo yeke mu li ti tambula ni na ala ti gi ndo so ala lingbi ti sara bâbâ ti ala daa. Na bi, lo yeke na ya ti ngbongboro wâ ti za na lege so ala yeke tambula daa; na kota lâ, lo yeke na ya ti ngbongboro mbinda.
34KOTA GBIA ama demango tere ti ala si na ya ti ngonzo ti lo, lo deba yanga ti lo, lo tene: 35“Ala asioni zo ti ngoi ti fadeso, nzoni sese so mbi deba yanga ti mbi ando ti mu na akotara ti ala, fade zo oko na popo ti ala ayeke baa ni pepe! 36Gi Kaleb oko, molenge ti Yefune laa ayeke baa ni. Fade mbi yeke mu na lo, lo na *ahale ti lo, sese so gere ti lo ado so, ngbanga ti so lo sara ye alingbi na atënë ti yanga ti mbi kue.”
37Ndali ti ala, azo ti Israel, Nzapa asara ngonzo na tere ti mbi nga, lo tene: “Mo nga, fade mo yeke si na sese ni pepe! 38Me Josué, molenge ti Nune, lo so lo yeke sara kua na gbe ti mo, lo laa lo yeke si ande na sese ni. Ayeke nzoni mo mu ngangu na be ti lo; lo laa lo yeke mu sese ni na azo ti Israel titene aga ti ala.” 39Na pekoni, KOTA GBIA atene na ala kue, atene: “Ala tene: ‘Fade akete molenge ti e ayeke ga tongana ye so a gbu na peko ti bira.’ Laso, amolenge ni ade ti hinga popo ti nzoni na sioni pepe. Me amolenge ni laa ayeke si ande na sese ni. Mbi yeke mu sese ni na ala, ala yeke mu ni si ayeke ga ti ala. 40Me ti ala ababâ ni, alingbi ala kiri, ala gue na benyama na mbage ti kota ngu-ingo ti Asosongo.”
41Ala kiri tënë na mbi, ala tene: “E sara siokpari so ake KOTA GBIA awe. Fadeso, e ye ti gue na bira alingbi na yanga so KOTA GBIA Nzapa ti e amu na e.” Ala oko oko kue amu aye ti bira ti ala; ala baa ti ala atene, mungo sese ti ahoto ni na bira ayeke fade ye ti ngia! 42Tongaso KOTA GBIA atene na mbi: “Mo tene na ala ti gue na bira ni pepe, ngbanga ti so mbi yeke na ala pepe. Tongaso pepe, fade awato ti ala ayeke kinda ala.” 43Mbi Moïse, mbi tene tënë na ala, me ala ma mbi pepe. Ala sara ngangu li na KOTA GBIA si na lege ti kuru baba ti ala, ala gue na sese ti ahoto ni. 44Azo ti mara ti Amori so ayeke lango na sese ni kâ, aga awara ala, azo ti Israel. Azo ni ahon ndö ti ala na bira na sese ti Seir; tongana ti so awotoro ayeke tumba zo, azo ti Amori atumba ala ngbii asi na Horma. 45Na kiringo ti ala, azo ti Israel, ala toto na KOTA GBIA; me lo ma ala pepe, lo dingi mê ti lo kete pepe ti ma ala. 46Nilaa ala ngba na Kades-Barnea aninga, ala duti kâ lango mingi.
Currently Selected:
Ndia ti fani use ni 1: MNF2010
Highlight
Share
Copy
Want to have your highlights saved across all your devices? Sign up or sign in
© La Société Biblique de Centrafrique 2010