Amos 5
5
Bia ti mawa ndali ti Israel
1Azo ti Israel, ala ma tënë so: mbi ye ti he bia ti totongo kuâ so na ndö ti ala.
2Lo ti awe, Israel, maseka-wali so,
lo yeke kiri ti londo pepe.
Lo lango na sese na kodro ti lo wani,
zo ti yo lo na nduzu ayeke daa pepe.
3Biani, tënë so Kota Gbia NZAPA atene
na ndö ti azo ti Israel ayeke so:
“Gbata so atokua aturugu saki oko na bira,
gi ngbangbo oko laa ayeke kiri na kodro;
gbata so atokua aturugu ngbangbo oko na bira,
gi baleoko laa ayeke kiri na kodro.”
KOTA GBIA airi azo ti Israel ti kiri na mbage ti lo
4Tënë so *KOTA GBIA atene
na azo ti Israel ayeke so:
“Ala gi mbi si fade ala duti na fini.
5 Me ala gue, agi mbi na Betel pepe,
ala li na Gilgal pepe,
ala gue, asi kâ na Bersheba pepe.
Biani, fade a yeke gbu azo ti Gilgal kue
ti gue na ala na kodro wande
si Betel, da ti Nzapa ayeke ga da ti ayanda.”
6Ala gi KOTA GBIA si fade ala duti na fini.
Tongaso pepe, fade lo yeke ga tongana wâ
na tere ti asewa ti Joseph,
wâ ni ayeke gbi ye kue na Betel
si zo oko ti mingongo ni ayeke duti daa pepe.
7Ala sara si sarango ye na lege ti ndia aga
tongana sioni yoro ti fango zo,
ala yeke do na sese fango ngbanga ti mbirimbiri.
8Lo so lo sara bongbi ti atongoro,
Pleyade na Orion,
lo sara si ndo so avuko pitipiti
aga lumiere ti ndaperere;
lo sara si kota lâ avuko si aga bi.
Lo iri ngu ti kota ngu-ingo ti ga
si lo tuku ni na ndö ti sese:
iri ti lo ayeke KOTA GBIA.
9Lo yeke sara si azo akinda zo ti ngangu,
ala buba ngangu gbagba kue.
10Zo so ayeke ke na awafango-ngbanga
sioni fango ngbanga ti ala,
be ti ala ake lo;
zo so aga ti tene taa-tënë na le ti ngbanga,
ala yeke baa lo na sioni le.
11Ala yeke sara ngangu na azo ti mawa,
ala yeke gbu ale ti kobe ti azo ni na ngangu.
Ndani laa apendere da so ala sara na têne so,
fade ala yeke lango na ya ni pepe;
anzoni vinye so ala lu so,
fade ala yeke nyon vin ni pepe.
12Biani, mbi hinga gba ti asioni ye so ala sara
na asiokpari ti ala so ahon ndoni so.
Ala yeke sara ngangu na azo ti mbirimbiri,
ala yeke mu goro na maboko ti azo.
Na le ti ngbanga, ala yeke kanga lege
titene a fâ ngbanga ti azo ti mawa na legeni.
13Ngoi ni so ayeke ngoi ti sioni,
ndani laa zo ti ndara akai kpoo.
14Ayeke nzoni ala gi lege ti sara nzoni ye,
me ala sara sioni ye pepe.
Tongaso, fade ala yeke duti na fini
si KOTA GBIA, Nzapa so ayeke na ndö ti dunia kue
ayeke duti na ala,
tongana ti so ala wani ayeke tene so.
15Ala ke ye ti sioni, ala ye ye ti nzoni.
Na le ti ngbanga, ala kiri afâ ngbanga na lege ti ndia;
e hinga pepe, fade KOTA GBIA,
Nzapa so ayeke na ndö ti dunia kue
ayeke baa mawa ti tanga ti azo ti sewa ti Joseph.
16Ndani laa, tënë so KOTA GBIA,
Nzapa so ayeke na ndö ti dunia kue atene
ayeke so:
“Na ndo so kue azo ayeke bongbi daa,
fade azo ayeke ma abia ti totongo kuâ;
na ndö ti alege kue, azo ayeke tene:
‘So ye ti mawa ti nyen! So ye ti mawa ti nyen!’
Fade a yeke iri zo ti fango yaka ti ga ti toto kuâ;
a yeke iri nga azo so ahinga lege ti totongo kuâ
ti ga ti toto kuâ.
17Na ya ti ayaka ti *vinye kue,
fade azo ayeke ma abia ti totongo kuâ
na ndembe so mbi yeke hon na popo ti ala”;
tënë so KOTA GBIA atene laa.
Lango ti gango ti KOTA GBIA
18 Mawa na ala,
azo so ayeke ku *lango ti KOTA GBIA!
Nzoni ye ti nyen laa ala yeke wara
na lango ti KOTA GBIA ni nyen?
Lango ni ayeke duti lango ti vukongo ndo,
me lango ti lumiere pepe.
19Lango ni ayeke duti tongana
lango ti mbeni zo so akpe bamara
si lo gue, lo tengbi na ze;
na pekoni, zo ni asi na da ti lo,
lo zia maboko ti lo na tere ti dere ti da
si ngbo ate lo.
20Lango ti KOTA GBIA ni
ayeke duti ande lango ti lumiere?
– Oko pepe! Me ayeke duti lango ti vukongo ndo,
lango so ndo avuko pitipiti,
lango so lumiere ayeke daa kete pepe!
Lege ti vorongo Nzapa so KOTA GBIA ake ni
21 *KOTA GBIA atene:
“Amatanga ti ala so ala yeke sara so,
mbi ke ni, mbi ye ti baa ni mbeni pepe;
abongbi ti ala,
mbi lingbi ti kanga be ti mbi na ni mbeni pepe.
22 Asandaga ti anyama so a yeke gbi ni kue na wâ
na ale ti kobe ti ala so ala ya na mbi na *sandaga so,
be ti mbi anzere na ni oko pepe.
Anyama ti mafuta so ala mu na sandaga ti beoko so,
mbi ye ti baa na le ti mbi oko pepe.
23Ala zia ti so mê ti mbi na abia ti ala ni;
mbi ye ti ma go ti kundi ti ala pepe.
24Me ayeke nzoni fango ngbanga na lege ti ndia
asua tongana ngu
si fango ngbanga ti mbirimbiri
asua tongana ngu so ayeke hole laoko pepe.
25“Ala azo ti Israel, ngu baleosio so ala sara ando na benyama so, ala mu na mbi asandaga ti nyama na ti ale ti kobe? 26Ala yeke yo ando ayanda ti ala so ala wani asara: Sakut, nzapa-gbia ti ala nga na Kewan, tongoro ti ala na nzapa ti ala tongana ti so ala yeke sara fadeso so? Oko pepe!
27 Ndani laa, mbi yeke sara si a gbu ala
ti gue na ala yongoro na peko ti Damas kâ”;
tënë so KOTA GBIA atene laa.
Iri ti lo ayeke “Nzapa so ayeke na ndö ti dunia kue.”
Currently Selected:
Amos 5: MNF2010
Highlight
Share
Copy
Want to have your highlights saved across all your devices? Sign up or sign in
© La Société Biblique de Centrafrique 2010
