Amos 6

Mawa na akota zo ti kodro ti Israel

1Mawa na ala, azo so alango kpoo na gbata ti *Sion!

Mawa na ala, azo so alango na ndö ti hoto ti Samarii

si ala baa atene, mbeni sioni ye ti sarango ala

ayeke daa pepe so!

Azo ayeke baa ala tongana akota zo mingi

na popo ti amara

si azo ti Israel ayeke ga gi na mbage ti ala!

2Ala gue, abaa gbata ti Kalne;

ala londo na ndo so ala gue na Hamat, kota gbata.

Na pekoni, ala zu ague na Gat, gbata ti azo ti Filistii.

Nyen laa agbata so ahon akodro ti ala na ni, nyen?

Sese ti azo ni akono ahon ti ala?

3Ala yeke gi lege ti pusu lango ti mawa ni yongoro,

andaa ala yeke sara si sarango ngangu na zo

aga na ya ti kodro.

4Ala yeke lango na ndö ti gbogbo

so a sara na pembe ti doli;

ala yeke lango na ya ti ayongoro ngende,

ala yeke te akete taba nga na akete bagara ti mafuta

so a soro ala na ya ti gbagba ti batango ala.

5Ala yeke pika kundi kirikiri ti he na bia.

Titene ala sara ye tongana David,

ala yeke sigigi na afini ye ti mozoko.

6Ala yeke nyon vin na ya ti akota kopo,

ala yeke sara mafuta so afun nzoni na tere ti ala,

me be ti ala ayeke so oko pepe ndali ti ye ti ngangu

so ayeke si na azo ti mara ti Joseph.

7Ndani laa, fadeso ala yeke akozo zo

so a yeke gbu ala ti gue na ala na kodro wande.

Matanga ti ala ahunzi awe, azo ti sopo!

Gbata ti Samarii ayeke buba

8 *KOTA GBIA adeba yanga ti lo, atene: “Na iri ti mbi Nzapa,

mbi ke na be ti mbi kue baba ti Jacob,

be ti mbi ake apendere da ti lo.

Fade mbi yeke zia gbata ti Samarii kue

na maboko ti awato”;

so tënë ti yanga ti KOTA GBIA,

Nzapa so ayeke na ndö ti dunia kue laa.

9Tongana azo baleoko angba na ya ti da oko, fade ala kue ayeke kui. 10Tongaso, mbeni sewa oko ayeke mu akuâ ni na ya ti da ti gue ti gbi ni. Tongana mbeni zo angba na fini na ngbonda ti da ni kâ, sewa ni ayeke hunda lo, atene: “Mbeni zo ayeke na fini na tere ti mo kâ?” Zo ni ayeke kiri tënë: “Ên-en! Zo ayeke daa pepe.” Sewa ni ayeke kiri tënë, atene: “Kanga yanga ti mo! So ngoi ti dingo iri ti KOTA GBIA laa pepe!”

11Biani, KOTA GBIA amu gi yanga:

akota da ayeke tuku na sese gburrr;

ataa akete da ayeke suru kirikiri.

Asongo benda ti ala ayeke senge senge

12Laoko ambarata akpe loro

na ndö ti akota têne?

Laoko zo afâ yaka na abagara

na ndö ti akota têne?

Me ti ala, ala sara si sarango ye na lege ti ndia

aga sioni yoro;

ala sara si fango ngbanga ti mbirimbiri

aga sioni yoro ti fango zo.

13Ala yeke sara ngia, ngbanga ti so ala so benda na Lo-Dabar, gbata so ayeke ye oko pepe so. Na pekoni, ala yeke tene: “Ndali ti ngangu ti e laa e mu gbata ti Karnaim, ngangu gbata so!” 14Me ti mbi, fade mbi yeke tokua na tere ti ala, azo ti Israel, mbeni mara ti sara ngangu na ala, ti londo na Banga ti Lebo-Hamat ngbii asi na tere ti kota ngu ti Gba-ti-ingo, na mbage ti Mbongo; so tënë ti yanga ti KOTA GBIA, Nzapa so ayeke na ndö ti dunia kue laa.

Currently Selected:

Amos 6: MNF2010

Highlight

Copy