Amos 4
4
1Ala awali ti gbata ti Samarii,
ala so akono tongana amama ti bagara ti Bashan so,
ala ma tënë so:
ala yeke te ye ti azo ti mawa na mbana,
ala yeke sara pasi na awayere.
Na pekoni, ala yeke tene na akoli ti ala:
“Ala ga na samba, e nyon-oo!”
2 *KOTA GBIA adeba yanga ti lo, atene:
“Na iri ti mbi so ayeke nde si ayeke nzoni kue,
baa alango ayeke ga
so a yeke gboto ala na yango ti hon na ala,
a yeke gboto ala oko oko kue ti hon na ala
tongana susu so akpo lo na likongo.
3Fade ala yeke sigigi
na lege ti adu ti gbagba ti gbata ni,
zo oko oko ayeke kpe mbirimbiri na lege
so ayeke na dawa ti lo;
fade a yeke bi ala na mbage ti Banga”,
so tënë ti yanga KOTA GBIA laa.
Asandaga ti ala anzere na KOTA GBIA pepe
4“Ala azo ti Israel, ala gue na Betel,
ala sara siokpari ma;
ala gue na Gilgal, ala sara siokpari ahon ti kozo!
Ala mu asandaga ti ala na ndaperere ma;
lango ota na pekoni, ala mu adime ti aye ti ala!
5Mapa ti ala so mama ni ayeke daa so,
ala zö ni na ndö ti gbalaka
ti mu na sandaga ti mungo singila ma.
Aye so ala ga na ni ti mu na mbi
na be ti ala wani so,
ala dekongo na tënë ni si azo kue ama;
ye so ala, azo ti Israel aye laa”;
so tënë ti yanga ti Kota Gbia NZAPA laa.
KOTA GBIA agboto mê ti ala gbaa
6“Mbi *KOTA GBIA, mbi sara si nzara amu
ya ti agbata ti ala kue;
mbi sara si kobe atia na ya ti ada ti ala kue.
Ataa aye so kue, ala kiri na mbage ti mbi pepe;
so tënë ti yanga ti KOTA GBIA laa.
7“So angba na ala nze ota
titene ala to nda ti fâ ale ti kobe ti ala,
mbi laa, mbi gbanzi ngu-Nzapa na ala.
Mbi sara si ngu-Nzapa apika na mbeni gbata
si na mbeni gbata, ngu ni apika pepe.
Mbi sara si ngu-Nzapa apika na ndö ti mbeni yaka
si mbeni yaka angba na holengo ni,
ngbanga ti so ngu ayeke daa pepe.
8Azo alondo na ya ti agbata use wala ota,
nzara ti ngu awoko ala kue
si ala gue ti gi ngu ti nyongo ni na mbeni gbata,
me ala wara ngu alingbi na ala pepe.
Ataa ye so kue, ala kiri na mbage ti mbi pepe;
so tënë ti yanga ti KOTA GBIA laa.
9“Mbi tokua asioni kobela na tere ti ale ti kobe ti ala;
ale ti kobe ni ahole gi na nduzu si afun.
Akete yaka ti ala kue na ayaka ti *vinye ti ala,
ayaka ti fige ti ala na ayaka ti olive ti ala,
agbadola ate ni kue.
Ataa aye so kue, ala kiri na mbage ti mbi pepe;
so tënë ti yanga ti KOTA GBIA laa.
10 Mbi tokua na tere ti ala sioni kobela ti bubango kodro
tongana ti so mbi tokua ando na tere ti azo ti Ezipte so.
Mbi zia lege na awato ti fâ amaseka ti ala ti koli,
awato ni agbu ambarata ti ala ahon na ni.
Na ya ti bâbâ ti ala,
mbi sara si fion ti akuâ afun sioni sioni na hon ti ala.
Ataa aye so kue, ala kiri na mbage ti mbi pepe;
so tënë ti yanga ti KOTA GBIA laa.
11 “Mbi buba aye so kue ayeke na ndo ti ala
tongana ti so mbi buba ando aye kue na Sodome na Gomore.
Ala sigigi na ya ni tongana nduru keke ti wâ
so a gboto ni na ya ti wâ.
Ataa aye so kue, ala kiri na mbage ti mbi pepe;
so tënë ti yanga ti KOTA GBIA laa.
12“Ndani laa Israel, baa lege so
mbi yeke sara ande na mo laa!
Ndali ti so mbi yeke sara ye tongaso na mo,
Israel, leke tere ti mo ti tengbi na Nzapa ti mo!”
13Biani, lo laa lo sara akota hoto,
lo sara pupu,
lo yeke fa na zo aye so lo leke na be ti lo ti sara.
Lo yeke sara si lumiere ti ndaperere
aga vukongo ndo,
lo yeke tambula na ndö ti akota hoto ti sese so:
iri ti lo ayeke KOTA GBIA,
Nzapa so ayeke na ndö ti dunia kue.
Currently Selected:
Amos 4: MNF2010
Highlight
Share
Copy
Want to have your highlights saved across all your devices? Sign up or sign in
© La Société Biblique de Centrafrique 2010
